ខេត្តបន្ទាយមានជ័យ ៖ លោកឧត្តមសេនីយ៍ទោ អាត់ ខែម ស្នងការនគរបាលខេត្តជាអនុប្រធានសមាគមអតីតយុទ្ធជនកម្ពុជាខេត្តបន្ទាយមានជ័យ នៅថ្ងៃទី២៣ ខែតុលា ឆ្នាំ២០១៧ អមដំណើរដោយលោកឧត្តមសេនីយ៍ត្រី វង្ស វ៉ិត ស្នងការរងផែនធនធានមនុស្ស លោកវរសេនីយ៍ឯក ស៊ី ឌី អធិការនគរបាលក្រុងសិរីសោភ័ណ បានចុះពិ និត្យមើលការសាងសង់ផ្ទះជូនអតីតយោធិនពិការចំនួន២គ្រួសារមានគ្រួសារលោក ផុន ម៉ី អាយុ៤៧ឆ្នាំ និងគ្រួសារលោក វ៉ាត តុង អាយុ៥០ឆ្នាំ កំពុងរស់នៅភូមិអូរអំពិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ដែលបានទទួលអំណោយផ្ទះពីសមាគមអតីតយុទ្ធជនកម្ពុជាខេត្តបន្ទាយមានជ័យ១គ្រួសារ១ខ្នង ។
លោកឧត្តមសេនីយ៍ទោ អាត់ ខែម ស្នងការនគរបាលខេត្តជាអនុប្រធានអតីតយុទ្ធជនខេត្តបន្ទាយមានជ័យបានបញ្ជាក់ថា តាមគោលការណ៍របស់សមគមអតីតយុទ្ធជនកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជាប្រធានសមាគមអតីតយុទ្ធជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា គឺតែងតែយកចិត្តទុកដាក់ អតីតជាយុទ្ធជន យុទ្ធនារី ជាកងកម្លាំងប្រដាប់អាវុធជាតិ ដែលកន្លងមកយ៉ាងធំធេង ក្នុងការបូអាយុជីវិត សាច់ស្រស់ ឈាមស្រស់ ដើម្បីបុព្វហេតុជាតិមាតុភូមិ និងប្រជាពលរដ្ឋគ្រប់ដំណាក់កាលនៃប្រវត្តិសាស្ត្រសង្គមជាតិ ។
លោក ផុន ម៉ី អាយុ៤៧ឆ្នាំ និងគ្រួសារលោក វ៉ាត តុង អាយុ៥០ឆ្នាំ ជាយោធិនពិការទាំង២នាក់បានថ្លែងអំណរគុណសម្តេចអគ្គមហាសេនាបតីតេជោ ហ៊ុន សែន ជាប្រធានសមាគមអតីតយុទ្ធជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងក្រុមការងាររបស់សមាគមអតីតយុទ្ធជនកម្ពុជាខេត្តដែលបានចុះមកជួយធ្វើផ្ទះរបស់ខ្ញុំបាទទាំង២គ្រួសារផ្ទះនេះផងដែរដូចជាផ្ទះបុណ្យរបស់ខ្ញុំដែលខិតខំតស៊ូមក ៕
ចែករំលែកព័តមាននេះ