រាជធានីភ្នំពេញ ៖ ស្ត្រីវ័យចំណាស់ម្នាក់កំពុងតែអង្គុយមើលទូរទស្សន៍នៅក្នុងផ្ទះដោយមិនបានចាក់គន្លឹះទ្វារ ស្រាប់តែមានចោរពីរនាក់ប្រដាប់ដោយកូនកាំបិតចុងស្រួចចូលទៅធ្វើសកម្មភាពភ្ជង់ប្លន់យកលុយអស់ជាង១,០០០ដុល្លារ (មួយពាន់ដុល្លារ) បង្កឲ្យមានការភ្ញាក់ផ្អើលកាលពីវេលាម៉ោង០៩និង១០នាទីយប់ ថ្ងៃទី២៣ ខែតុលា ឆ្នាំ២០១៧ ត្រង់ចំណុចផ្ទះលេខ៦៨…
រាជធានីភ្នំពេញ ៖ ស្ត្រីវ័យចំណាស់ម្នាក់កំពុងតែអង្គុយមើលទូរទស្សន៍នៅក្នុងផ្ទះដោយមិនបានចាក់គន្លឹះទ្វារ ស្រាប់តែមានចោរពីរនាក់ប្រដាប់ដោយកូនកាំបិតចុងស្រួចចូលទៅធ្វើសកម្មភាពភ្ជង់ប្លន់យកលុយអស់ជាង១,០០០ដុល្លារ (មួយពាន់ដុល្លារ) បង្កឲ្យមានការភ្ញាក់ផ្អើលកាលពីវេលាម៉ោង០៩និង១០នាទីយប់ ថ្ងៃទី២៣ ខែតុលា ឆ្នាំ២០១៧ ត្រង់ចំណុចផ្ទះលេខ៦៨ ភូមិ៣ ក្រុម៣ សង្កាត់ផ្សារដេប៉ូទី៣ ខណ្ឌទួលគោក ។
ស្ត្រីរងគ្រោះមានឈ្មោះ ស៊ុន ថា ភេទស្រី អាយុ៥៧ឆ្នាំ មុខរបរនៅផ្ទះ ស្នាក់នៅកន្លែងកើតហេតុ មានប្តីជាសន្តិសុខឯកជន បានរៀបរាប់ប្រាប់ឲ្យដឹងថា នៅមុនពេលកើតហេតុ រូបគាត់ និងចៅប្រុសម្នាក់អាយុ៥ឆ្នាំកំពុងតែអង្គុយមើលទូរទស្ស៍នៅក្នុងផ្ទះតែពីរនាក់ ។ លុះដល់វេលាកើតហេតុ ចៅប្រុសរបស់គាត់ក៏បានដេកលក់ ហើយទ្វារផ្ទះមិនបានចាក់គន្លឹះ ស្រាប់តែមានចោរពីរនាក់បានដើរចូលទៅក្នុងផ្ទះ ដោយមាននកាន់រូបថតកូនប្រុសរបស់ស្ត្រីរងគ្រោះដែលបានជាប់ពន្ធនាគារជាងបួនខែមកហើយ ពីបទលួចម៉ូតូ យកទៅឲ្យស្ត្រីរងគ្រោះមើល ហើយសួរទៅស្ត្រីរងគ្រោះថា មានស្គាល់មនុស្សក្នុងរូបនេះអត់ ពេលនោះស្ត្រីរងគ្រោះក៏ឆ្លើយទៅវិញថាស្គាល់ តើក្មួយមានការអីដែរ ។ ស្របពេលនោះ ចោរម្នាក់បានដកកូនកាំបិតចុងស្រួចមួយដើម យកទៅភ្ជង់.កស្ត្រីរងគ្រោះ ហើយសួរស្ត្រីរងគ្រោះថា មានលុយអត់ ខ្ញុំសុំលុយខ្លះយកជិះឡានទៅសៀមរាប ស្ត្រីរងគ្រោះក៏ឆ្លើយទៅវិញថា គាត់គ្មានលុយទេ រាល់ថ្ងៃគាត់រស់ដោយសារគេទេ ចំណែកលុយកាក់ប្តីរបស់គាត់ជាអ្នកទុកដាក់ទាំងអស់ ។ ពេលនោះជនសង្ស័យម្នាក់ក៏បានរើកកាយខោអាវដែលដាក់នៅក្នុងទូទាញទំលាក់មកដីរាយប៉ាយពេញផ្ទះ និងឡើងទៅលើជាន់ឡៅតឿរុះរើវ៉ាលី និងរបស់របរផ្សេងៗទៀត បន្ទាប់មកជនសង្ស័យទាំងពីរនាក់នោះបានរត់គេចខ្លួនបាត់ស្រមោលដោយសុវត្ថិភាព ។
ក្រោយពេលកើតហេតុ ស្ត្រីរងគ្រោះបានទំនាក់ទំនងហៅប្តីរបស់គាត់ឲ្យមកផ្ទះ ពេលដែលប្តីរបស់មកដល់ផ្ទះ ទើបដឹងថាបាត់លុយខ្មែរអស់ចំនួន៨០ម៉ឺនរៀល និងលុយដុល្លារចំនួន១,០០០ដុល្លារ រួចក៏រាយការណ៍ប្រាប់សមត្ថកិច្ចមូលដ្ឋានឲ្យមកជួយអន្តរាគមន៍ ។
សមត្ថកិច្ចមូលដ្ឋានបានចុះមកដល់កន្លែងកើតហេតុ ហើយបាននាំស្ត្រីរងគ្រោះទៅប៉ុស្តិ៍នគរបាលរដ្ឋបាលផ្សារដេប៉ូទី៣ ធ្វើការសួរនាំ និងដាក់ពាក្យបណ្ដឹងដើម្បីវែកមុខចោរយកមកដាក់ទោសទៅតាមផ្លូវច្បាប់ ៕
ចែករំលែកព័តមាននេះ