ខេត្តព្រះវិហារ ៖ អគ្គិភ័យមួយបានឆាបតូបផ្សារកំពង់ប្រណាក ផ្នែកខាងលើក្រោយ ស្ថិតក្នុងភូមិកណ្តាល សង្កាត់កំពង់ប្រណាក ក្រុងព្រះវិហារ កាលពីវេលាម៉ោងប្រមាណ២២និង០០នាទី ថ្ងៃទី២៣ ខែតុលា…
ខេត្តព្រះវិហារ ៖ អគ្គិភ័យមួយបានឆាបតូបផ្សារកំពង់ប្រណាក ផ្នែកខាងលើក្រោយ ស្ថិតក្នុងភូមិកណ្តាល សង្កាត់កំពង់ប្រណាក ក្រុងព្រះវិហារ កាលពីវេលាម៉ោងប្រមាណ២២និង០០នាទី ថ្ងៃទី២៣ ខែតុលា ឆ្នាំ២០១៧ នេះ ដោយពុំទាន់ដឹងមូលហេតុច្បាស់លាស់នៅឡើយ និងបានបណ្តាលឲ្យតូបមួយចំនួនរងការខូចខាតទាំងស្រុង បង្កការភ្ញាក់ផ្អើលដល់ប្រជាពលរដ្ឋ ។
នេះបើតាមសម្តីរបស់ប្រជាពលរដ្ឋដែលរស់នៅក្បែរផ្សារកំពង់ប្រណាក បានឲ្យដឹងថា មុនពេលកើតហេតុគេ បានឮសំឡេងផ្ទុះនៅលើដំបូងផ្សារ ស្រាប់តែមិនបានប៉ុន្មាននាទីផង ក៏ឃើញមានផ្សែងចេញពីដំបូលផ្សាររហូតដល់មានអណ្តាតភ្លើងមកជាមួយផង ។ ក្រោយឃើញហេតុការណ៍នេះភ្លាមៗ ប្រជាពលរដ្ឋក៏បានរាយការណ៍សមត្ថកិច្ចភ្លាមៗ ដើម្បីជួយអន្តរាគមន៍ ។
នៅក្នុងហេតុការណ៍នោះ ឃើញមានអាជីវករផ្សារមួយចំនួនបាន ដឹកជញ្ជូនអីវ៉ាន់ចេញពីតាមតូបនីមួយៗក្នុងផ្សារកំពង់ប្រណាក ទៅរកកន្លែងសុវត្ថិភាព ព្រោះខ្លាចអគ្គិភ័យរាលដាលឆេះពេញផ្សារ ។ បន្ទាប់ពីទទួលដំណឹងថា មានហេតុការណ៍នេះកើតឡើងភ្លាម ស្នងការដ្ឋាននគរបាលខេត្តព្រះព្រះវិហារ អធិការក្រុងព្រះវិហារ និងបញ្ជាការដ្ឋានអាវុធហត្ថខេត្តព្រះវិហារ ក៏បានបញ្ជូនកម្លាំង និងរថយន្តពន្លត់អគ្គិភ័យទៅជួយអន្តរាគមន៍ពន្លត់ភ្លាមៗ តែដោយសារតែអណ្តាតភ្លើងបានវាយប្រហារខ្លាំងទៅលើតូបលក់សំលៀកបំពាក់ និងតូបលក់ចាបហ៊ួយ ធ្វើឲ្យឆាបឆេះក្នុងតូបគ្មានសល់ ។ សមត្ថកិច្ច និងប្រជាពលរដ្ឋទាំងអស់នៅក្នុងហេតុការណ៍នោះ បាននាំគ្នាជួយពន្លត់ និងទប់ស្កាត់អគ្គិភ័យនេះឲ្យរលត់ទៅវិញនៅវេលាម៉ោង២៣និង៣០នាទី ដោយមិនមានការរាលដាលទៅតូបផ្សេងទៀតឡើយ ។
តាមព័ត៌មានបឋមពីសមត្ថកិច្ចបានឲ្យដឹងថា តូបដែលរងការប៉ះពាល់ដោយអគ្គិភ័យមានចំនួន១២តូប ធ្ងន់ស្រាល ដោយឡែកចំពោះបញ្ហាដែលបង្កឲ្យកើតមានអគ្គិភ័យឆាបឆេះនេះ សមត្ថកិច្ចនៅមិនទាន់បញ្ជាក់ប្រាប់ឲ្យដឹងនៅឡើយទេ ឬឯប្រជាពលរដ្ឋដែលនៅក្បែរៗនោះ បាននិយាយថា អាចបណ្តាលមកពីករណីទុរស្សេខ្សែភ្លើង ៕
ចែករំលែកព័តមាននេះ