រាជធានីភ្នំពេញ ៖ បុរសវ័យកណ្តាលម្នាក់មិនដឹងថាទើបតែចេញមកពីផឹកស៊ីនៅឯណាទេ បានបើករថយន្តមួយគ្រឿងក្នុងស្ថានភាពស្រវឹងខ្លាំង ហើយបើករថយន្តចុចកញ្ចក់ និងស៊ីផ្លេបើកលឿនរេពេញផ្លូវរកបុកគេឯងហេតុការណ៍នេះកើតឡើងពីវេលាម៉ោង៩យប់ថ្ងៃទី២៣ ខែតុលា ឆ្នាំ២០១៧ ។
សមត្ថកិច្ចបានឲ្យដឹងថា មុនពេលកើតហេតុប្រជាពលរដ្ឋបានប្រទះឃើញរថយន្តមួយគ្រឿង ពណ៌ខ្មៅ ស្លាកលេខ ភ្នំពេញ២K-២២៤៨ បើកដោយបុរសម្នាក់វ័យជិត៥០ឆ្នាំ ធ្វើដំណើរតាមបណ្តោយផ្លូវជាតិលេខ៥ ពីជើងទៅត្បូង ក្នុងស្ថានភាពស្រវឹងជោគជាំ លុះមកដល់ចំណុចសង្កាត់ទួលសង្កែ ខណ្ឌឬស្សីកែវ អ្នកបើករថយន្តបានចុចកញ្ចក់រថយន្តមុខក្រោយរួចស៊ីផ្លេ តាមផ្លូវជាប់រហូត និងបើករថយន្តលឿនរកបុកគេឯងនឹងរេពេញផ្លូវ ធ្វើឲ្យប្រជាពលរដ្ឋនាំគេជិះគេចខ្លាចគាត់បុក ភ្លាមៗនោះដែរសមត្ថកិច្ចបាននាំគ្នាដេញតាមចាប់ តែគាត់បានព្យាយាមបើករត់ ហើយស្រែកជេរគេជេរឯងតាមផ្លូវរហូត លុះបើកទៅដល់ចំណុចស្ពានភ្លោះកោះពេជ្រទើបឈប់ត្រូវបានក្រុមសន្តិសុខកោះពេជ្រនាំគ្នាបិទបារ៉ាសទើបឃាត់ទាំងរថយន្ត និងតៃកុងយកទៅប៉ុស្តិ៍ទន្លេបាសាក់ ។ នៅពេលឃាត់អ្នកបើកស្រវឹងយក ទៅដល់ប៉ុស្តិ៍នគរបាលទន្លេបាសាក់ ដោយសារតែគាត់ស្រវឹងខ្លាំងពេកបានដោះខោអាវចេញទាំងអស់សូម្បីតែលីអូក៏អត់ទុកដែរ ។
ស្របពេលនោះនគរបាលចរាចរណ៍ខណ្ឌចំការមនបានយកឧបករណ៍វាស់ជាតិអាល់កុលមកវាស់ ឃើញថាគាត់មានជាតិអាល់កុលដល់ទៅ០.៧៥មិល្លីម៉ែត្រក្នុងមួយលីត្រខ្យល់ ប៉ុន្តែបុរសខាងលើមិនបានបង្កគ្រោះដល់អ្នកដទៃនោះទេ ទើបសមត្ថកិច្ចគ្រាន់តែធ្វើការអប់រំ និងធ្វើកិច្ចសន្យាឲ្យសាច់ញាតិព្រមទាំងប្រពន្ធកូនមកទទួលយកត្រឡប់ទៅផ្ទះវិញ ៕
ចែករំលែកព័តមាននេះ