ខេត្តកណ្ដាល ៖ នគរបាលស្រុកស្អាងបានធ្វើការឆែកឆេរផ្ទះ និងឃាត់ខ្លួនមនុស្សពីរនាក់រកឃើញថ្នាំញៀនចំនួន៥៩កញ្ចប់ កាលពីវេលាម៉ោង៣នឹង៤៧នាទីរសៀលថ្ងៃទី២២ ខែតុលា ឆ្នាំ២០១៧ នៅភូមិព្រែករាំង ឃុំទឹកវិល ស្រុកស្អាង ។
លោក សេង សុជាតិ អធិការនគរបាលស្រុកស្អាងបានឱ្យដឹងថា ជនសង្ស័យដែលបានចាប់ខ្លួនឈ្មោះ យ៉ាន សុខរឿន ភេទស្រី អាយុ៣៦ឆ្នាំ មុខរបរលក់ត្រី ទីលំនៅបច្ចុប្បន្ន ភូមិព្រែករាំង ឃុំទឹកវិល ស្រុកស្អាង ខេត្តកណ្តាល ។ វត្ថុតាងចាប់យករួមមាន ម្សៅក្រាមពណ៌សសង្ស័យថា ជាសារធាតុញៀន(ម៉ាទឹកកក) ចំនួន៤០កញ្ចប់តូច ។ ម្នាក់ទៀតឈ្មោះ ឃី ណុច ត្រូវជាប្អូនថ្លៃជនសង្ស័យខាងលើ ភេទប្រុស អាយុ៣៣ឆ្នាំ មុខរបរលក់ត្រី នៅភូមិឃុំ ជាមួយគ្នា ដកហូយយកបានថ្នាំញៀនចំនួន១៩កញ្ចប់ ក្នុងនោះកញ្ចប់ធំពីរ ។
លោកអធិការបានឱ្យដឹងបន្ថែមថា នៅថ្ងៃទី២២ ខែតុលា ឆ្នាំ២០១៧ ក្រោយពេលទទួលបានព័ត៌មានពីប្រជាពលរដ្ឋល្អថា មានអំពើជួញដូរគ្រឿងញៀននៅចំណុចផ្ទះជនសង្ស័យភូមិព្រែករាំង ឃុំទឹកវិល ស្រុកស្អាង ខេត្តកណ្តាល ភ្លាមនោះកម្លាំងផ្នែកប្រឆាំងបទល្មើសគ្រឿងញៀនស្រុកសហការណ៍ជាមួយកម្លាំងប៉ុស្ដិ៍នគរបាលរដ្ឋបាលព្រែកគយ និងកម្លាំងប៉ុស្តិ៍នគរបាលរដ្ឋបាលទឹកវិលបានទៅដល់កន្លែងកើតហេតុជួបប្រទះជនសង្ស័យខាងលើ និងមានការឯកភាពពីលោក លាវ ស្រេង ព្រះរាជអាជ្ញាសាលាដំបូងខេត្តកណ្តាលនៅវេលាម៉ោង៣នឹង៤៥នាទី ថ្ងៃទី២២ ខែតុលា ឆ្នាំ២០១៧ អនុញ្ញាត្តឲ្យធ្វើការត្រួតពិនិត្យឆែកឆេរលំនៅឋានជនសង្ស័យទាំងពីរខាងលើបានរកឃើញគ្រឿងញៀនប្រភេទម៉ាទឹកកកចំនួន៤០កញ្ចប់តូច និង១៩កញ្ចប់ រួចឃាត់ខ្លួនជនសង្ស័យរួមទាំងវត្ថុតាងបញ្ជូនមកអធិការដ្ឋាននគរបាលស្រុកស្អាងដើម្បីធ្វើការសាកសួរ ៕
ចែករំលែកព័តមាននេះ