ខេត្តកំពត ៖ ក្មេងទំនើងពីរក្រុម បានបើកឆាកប្រយុទ្ធគ្នាយ៉ាងសាហាវនៅលើស្ពានព្រែកកំពង់បាយ ហៅស្ពានថ្មថ្មី បណ្តាលឱ្យភាគីម្ខាងដែលមានគ្នាបីនាក់ ដែលកំពុងឈរចាំមិត្តភក្តិនៅលើស្ពាន បានលោតចុះទឹកទាំងបីនាក់ដើម្បីគេចខ្លួនឱ្យផុតពីមុខដាវសាម៉ូរ៉ៃពីភាគីដែលដេញកាប់ ។ ការលោតទឹកនេះ…
ខេត្តកំពត ៖ ក្មេងទំនើងពីរក្រុម បានបើកឆាកប្រយុទ្ធគ្នាយ៉ាងសាហាវនៅលើស្ពានព្រែកកំពង់បាយ ហៅស្ពានថ្មថ្មី បណ្តាលឱ្យភាគីម្ខាងដែលមានគ្នាបីនាក់ ដែលកំពុងឈរចាំមិត្តភក្តិនៅលើស្ពាន បានលោតចុះទឹកទាំងបីនាក់ដើម្បីគេចខ្លួនឱ្យផុតពីមុខដាវសាម៉ូរ៉ៃពីភាគីដែលដេញកាប់ ។ ការលោតទឹកនេះ ពីរនាក់បានហែលឡើងមកលើច្រាំងវិញ រីឯម្នាក់ទៀតបានបាត់ខ្លួនទៅក្នុងទឹក រហូតមកដល់ព្រឹកថ្ងៃទី២២ តុលា ។
ហេតុការណ៍នេះ បានកើតឡើងកាលពីវេលាម៉ោង២ និង៣០នាទីរំលងអធ្រាត្រឈានចូលថ្ងៃទី២២ តុលា នៅចំណុចលើស្ពានថ្មព្រែកកំពង់បាយ ស្ថិតនៅក្នុងភូមិកំពង់បាយខាងត្បូង សង្កាត់កំពង់បាយ ក្រុងកំពត ។ បើតាមភាគីជនរងគ្រោះឈ្មោះ អូន តេង ភេទប្រុស អាយុ១៧ឆ្នាំ មានទីលំនៅភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប បានប្រាប់សមត្ថកិច្ចថា មុនពេលកើតហេតុ ពួកខ្លួនមានគ្នា៦នាក់ជិះម៉ូតូពីរគ្រឿង ចេញមកពីលេងវត្តអង្គគ្រឹស្នា ក្នុងឃុំត្រពាំងព្រីង ស្រុកទឹកឈូ នៅវេលាម៉ោង១រំលងអធ្រាត្រថ្ងៃទី២២ តុលា ។
ពេលមកដល់ក្រុងកំពតត្រង់ចំណុចខាងត្បូងសាលាខេត្ត បាននាំគ្នាហាត់ប្រាណរហូតដល់ម៉ោង២និង៣០នាទីថ្ងៃដដែលទើបឈប់ហាត់ក៏ជិះម៉ូតូមករកកន្លែងចាក់សាំង ។ ពេលជិះម៉ូតូមកដល់លើស្ពានមិត្តភក្តិបីនាក់បានចុះចាំពួកគេនៅទីនោះ ហើយឱ្យម៉ូតូដែលទៅចាក់សាំងទាំងពីរចាក់រួចចាំមកដឹកពួកគេទៅផ្ទះវិញ ។
ប្រភពដដែលបានឱ្យដឹងទៀតថា ពេលពួកខ្លួនទៅចាក់សាំងម៉ូតូរួចត្រឡប់មកយកមិត្តភក្តិវិញ ស្រាប់តែបាត់ពួកគេទាំងបីនាក់ ហើយឃើញម៉ូតូក្រុមជនទំនើងជិះត្រឡប់ចុះត្រឡប់ឡើង មិនដឹងថាមានបំណងអ្វីទេ ។ លុះបាត់មិត្តភក្តិមិនឃើញក៏ស្រែកហៅផង ដើររកផងក៏ឃើញមិត្តភក្តិម្នាក់ហែលទឹកនៅឱបសសរស្ពាន និងម្នាក់ទៀតហែលទៅឡើងនៅខ្យូសហាងតាឪក៏ហៅឡើងមក រីឯម្នាក់ទៀតបានបាត់ខ្លួនរកមិនឃើញ ។ បន្ទាប់ពីមានហេតុការណ៍នេះកើតឡើងពួកខ្លួនបានឃើញសមត្ថកិច្ចនៅយាមក្បែរស្ពានជួយអន្តរាគមន៍រាយការណ៍ដល់កម្លាំងអធិការដ្ឋានក្រុងមកនាំក្រុមខ្លួនដែលនៅសល់គ្នា៥នាក់ទៅកាន់អធិការដ្ឋានក្រុងដើម្បីសួរនាំបន្ទាប់ពីមានហេតុការណ៍នោះមក ។
សមត្ថកិច្ចនគរបាលក្រុងឱ្យដឹងថា ជនរងគ្រោះដែលបានបាត់ខ្លួនក្នុងទឹកឈ្មោះ សេង អ៊ានភេទប្រុស អាយុ១៩ឆ្នាំ ឯភាគីក្រុមជនទំនើងមានគ្នា៨នាក់ ។ ករណីនេះសមត្ថកិច្ចកំពុងស្រាវជ្រាវនិងក្តាប់បានមុខសញ្ញាខ្លះៗហើយ ។ មន្ត្រីសមត្ថកិច្ចនិយាយថា មិនដឹងជាមានមូលហេតុអ្វីទេ តែបើតាមការពិនិត្យលើក្រុមទាំង២គឺជាក្រុមក្មេងទំនើងដើរលេងយប់និងធ្លាប់មានបញ្ហាអ្វីជាមួយគ្នាហើយទើបឈានដល់ដេញកាប់ប្រហារគ្នាបែបនេះ។
ទោះជាបែបណា ក្រុមដែលដេញកាប់ក្រុមម្ខាងទៀតឱ្យជួបគ្រោះថ្នាក់គឺជាអ្នកខុស ។
ព័ត៌មានចុងក្រោយរហូតមកដល់ម៉ោង៤និង១០នាទីរសៀល ថ្ងៃទី២២ តុលា សពយុវជនដែលបាត់ខ្លួនត្រូវបានរកឃើញនៅចំណុចក្រោមស្ពានដែលលោត។ សពមានស្នាមមុតនឹងវត្ថុរឹង ៕
ចែករំលែកព័តមាននេះ