រាជធានីភ្នំពេញ ៖ អណ្តាតភ្លើងបានឆេះយ៉ាងសន្ធោសន្ធៅ លេបត្របាក់ឃ្លាំងស្តុកថ្នាំលាបផ្ទះនិងសាំងក្រអូប ដែលមានទំហំបណ្តោយ២៥ម៉ែត្រគុណនឹង១៦ម៉ែត្រ បង្កការភ្ញាក់ផ្អើលកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី២២ តុលា នៅភូមិ៦ សង្កាត់បឹងទំពុន២ ខណ្ឌមានជ័យ…
រាជធានីភ្នំពេញ ៖ អណ្តាតភ្លើងបានឆេះយ៉ាងសន្ធោសន្ធៅ លេបត្របាក់ឃ្លាំងស្តុកថ្នាំលាបផ្ទះនិងសាំងក្រអូប ដែលមានទំហំបណ្តោយ២៥ម៉ែត្រគុណនឹង១៦ម៉ែត្រ បង្កការភ្ញាក់ផ្អើលកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី២២ តុលា នៅភូមិ៦ សង្កាត់បឹងទំពុន២ ខណ្ឌមានជ័យ ។
ប្រភពព័ត៌មានពីអ្នកជិតខាងដែលរស់នៅជិតកន្លែងភ្លើងឆេះបានប្រាប់ឱ្យដឹងថា នៅមុនពេលកើតហេតុ គេឃើញមានភ្លើងឆេះចេញពីឃ្លាំងស្តុកថ្នាំលាបផ្ទះនិងសាំងក្រអូបយ៉ាងសន្ធោ សន្ធៅ បង្កការភ្ញាក់ផ្អើលពេញតំបន់រស់នៅដ៏កកកុញនេះនាំគ្នាជួយយកបំពង់ពន្លត់អគ្គិភ័យមកបាញ់ពន្លត់ តែមិនរលត់ ទើបទូរស័ព្ទប្រាប់សមត្ថកិច្ចឱ្យជួយហៅរថយន្តពន្លត់អគ្គិភ័យមកជួយអន្តរាគមន៍បាញ់ពន្លត់រយៈពេលជាង១ម៉ោង ទើបភ្លើងរលត់អស់ទៅវិញ ។
ក្នុងហេតុការណ៍ ភ្លើងឆេះឃ្លាំងខាងលើនេះ មិនមាននរណាម្នាក់គ្រោះថ្នាក់ដល់អាយុជីវិតទេ គឺគ្រាន់តែខូចខាតសម្ភារនិងឃ្លាំងអស់ទាំងស្រុង ដោយសារតែសម្ភារដែលស្តុកក្នុងឃ្លាំងសុទ្ធតែជាសាំងក្រអូបនិងថ្នាំលាបផ្ទះ ដែលងាយនឹងឆេះ។ ចំណែកទីតាំងខាងលើនេះមានផ្លូវចេញចូលតូចចង្អៀត រថយន្តពន្លត់អគ្គិភ័យចូលម្តងបានតែមួយគ្រឿងប៉ុណ្ណោះ ។ ម្យ៉ាងទៀតអ្នករស់នៅជិតខាងភ័យស្លន់ស្លោគ្រប់គ្នា ដែលម្នាក់ៗគិតតែពីជញ្ជូនទ្រព្យសម្បត្តិចេញពីផ្ទះ ព្រោះទំហំនៃការឆេះនេះវាធំធេងណាស់ ភ្លើងជះរន្ទាលពេញក្នុងតំបន់ដែលមានលំនៅឋានកកកុញដូចម្រាមដៃ គ្មានអ្នកណាដេកបានទេ រហូតដល់ភ្លឺ ។
សមត្ថកិច្ចបានប្រាប់ឱ្យដឹងថា ម្ចាស់ទីតាំងខាងលើមានឈ្មោះ ឈឹត សុកន ភេទប្រុសអាយុ៤៥ឆ្នាំ ជាមន្ត្រីនគរបាល នៅក្រសួងមហាផ្ទៃ ។ករណីភ្លើងឆេះខាងលើនេះប្រើប្រាស់រថយន្តទឹកសរុបទាំងអស់២០គ្រឿង ក្នុងនោះរថយន្តរបស់ស្នងការដ្ឋានរាជធានីភ្នំពេញមកចំនួន១៥គ្រឿង ស្មើនឹង៣០ជើង ។ ចំណែករថយន្តរបស់ក្រុមហ៊ុនស្រាបៀរកម្ពុជា១គ្រឿង ខណ្ឌជ្រាយចង្វា៤គ្រឿងក៏បានមកជួយអន្តរាគមន៍ដែរ។
ចំពោះមូលហេតុដែលបណ្តាលឱ្យឆេះកណ្តាលអធ្រាត្រនេះនៅមិនទាន់ដឹងថា បណ្តាលពីមូលហេតុអ្វីនោះទេ ហើយសមត្ថកិច្ចកំពុងធ្វើការស្រាវជ្រាវពីមូលហេតុដែរ ។ ប៉ុន្តែព័ត៌មានចុងក្រោយគេនិយាយថា មកពីឆ្លងចរន្តអគ្គិសនីក្នុងឃ្លាំង ដែលពេញទៅដោយគ្រឿងឆេះ ៕
ចែករំលែកព័តមាននេះ