រាជធានីភ្នំពេញ ៖ មានការភ្ញាក់ផ្អើលមួយបានកើតឡើង ខណៈពេលដែលឡកម្ដៅនៅក្នុងរោងចក្រកាត់ដេរមួយកន្លែងបានផ្ទុះឡើងលាន់សូរយ៉ាងកក្រើក ព្រមទាំងមានការឆាបឆេះថែមទៀតផង ហើយបានបង្កឲ្យមានកម្មករម្នាក់បានរងរបួសធ្ងន់ ហើយភ្លាមៗនោះ ខាងរោងចក្រមិនបានឲ្យអ្នកខាងក្រៅចូលទៅពិនិត្យនោះឡើយ ទាំងអាជ្ញាធរ សមត្ថកិច្ច…
រាជធានីភ្នំពេញ ៖ មានការភ្ញាក់ផ្អើលមួយបានកើតឡើង ខណៈពេលដែលឡកម្ដៅនៅក្នុងរោងចក្រកាត់ដេរមួយកន្លែងបានផ្ទុះឡើងលាន់សូរយ៉ាងកក្រើក ព្រមទាំងមានការឆាបឆេះថែមទៀតផង ហើយបានបង្កឲ្យមានកម្មករម្នាក់បានរងរបួសធ្ងន់ ហើយភ្លាមៗនោះ ខាងរោងចក្រមិនបានឲ្យអ្នកខាងក្រៅចូលទៅពិនិត្យនោះឡើយ ទាំងអាជ្ញាធរ សមត្ថកិច្ច និងក្រុមអ្នកកាសែត ។ លុះរយៈពេលជាង១ម៉ោងក្រោយពីដឹកអ្នករបួសទៅពេទ្យបាត់ ទើបអនុញ្ញាតឲ្យអាជ្ញាធរខណ្ឌ សង្កាត់ នគរបាល និងប៉េអឹម ចូលទៅពិនិត្យ ដោយឡែកការផ្ទុះឆេះខាងលើនោះ មិនទាន់ត្រូវបានគេដឹងថា បណ្ដាលមកពីមូលហេតុអ្វីនៅឡើយទេ ។
នៅកន្លែងទីតាំងឡកម្ដៅនោះ បានទទួលរងនូវការខូចខាតខ្ទេចខ្ទីរ ដោយធ្លាយ និងដំបូលរោងព្រមទាំងបាក់ជញ្ជាំង ហើយបំណែកឡបានខ្ទាតចេញក្រៅ ចូលទៅក្នុងរោងចក្រដែកដែលស្ថិតនៅចម្ងាយជាង៣០ម៉ែត្រពីគ្នាទៀតផង ។ ហេតុការណ៍នោះបានកើតឡើង កាលពីវេលាម៉ោង១១និង៣០នាទីព្រឹក ថ្ងៃទី២៣ ខែតុលា ឆ្នាំ២០១៧ នៅក្នុងរោងចក្រកាត់ដេរយីហោ《ប្រាយស្កាយ》ដែលមានទីតាំងស្ថិតនៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ ខណៈពេលដែលរោងចក្របានផ្អាកដំណើរការទៅហើយ ដើម្បីឲ្យកម្មករកម្មការិនីទាំងអស់ដែលធ្វើការនៅទីនោះចេញក្រៅហូបបាយថ្ងៃត្រង់ លុះបន្តិចក្រោយមកបន្ទាប់ពីកម្មករចេញក្រៅស្ទើរតែអស់ ស្រាប់តែឡកម្ដៅនោះបានផ្ទុះឡើងលាន់យ៉ាងកក្រើកតែម្ដង មិនតែប៉ុណ្ណោះមានទាំងការឆាបឆេះឡើងថែមទៀតផង ។ ខណៈនោះមុនដំបូងម្នាក់ៗមិននឹកស្មានថាឡនោះផ្ទុះទេ ប៉ុន្តែក្រោយពេលនាំគ្នាចូលទៅមើល ទើបដឹងថាឡកម្ដៅនោះផ្ទុះ និងបាននាំគ្នាយកបំពុងពន្លត់អគ្គិភ័យទៅបាញ់ពន្លត់ និងមានរថយន្តពន្លត់អគ្គិភ័យចេញទៅអន្តរាគមន៍ពន្លត់ទើបភ្លើងរលត់ទៅវិញ ។
ប្រភពដដែលបានបន្តទៀតថា មូលហេតុដែលនាំឲ្យមានការផ្ទុះឡើងនោះ មិនទាន់ត្រូវបានគេដឹងថា បណ្ដាលមកពីអ្វីនៅឡើយទេ ហើយមិនតែប៉ុណ្ណោះនៅទីតាំងឡកម្ដៅនោះ បានរងការខូចខាទាំងស្រុង ដោយបានបាក់ និងធ្លុះធ្លាយដំបូល ធ្លាយជញ្ជាំងថ្ម ហើយបំណែកឡបានខ្ទាតហោះចេញក្រៅ ទៅបុកចូលក្នុងរោងចក្រដែកយីហោ《ឃ្យូស៊ីន》ដែលស្ថិតនៅចម្ងាយជាង៣០ម៉ែត្រពីគ្នានោះថែមទៀត ។
ក្រោយពេលកើតហេតុ មិនមាននរណាបានដឹងឲ្យប្រាកដថា មានមនុស្សប៉ុន្មាននាក់រងរបួស ឬមានអ្នកស្លាប់ដែរ ប៉ុន្តែខាងតំណាងរោងចក្របាននិយាយប្រាប់នគរបាលថា មានកម្មករតែម្នាក់ប៉ុណ្ណោះ ដែលបាទទួលរងរបួសនៅក្នុងការផ្ទុះខាងលើនេះ ។ ទោះបីជាបែបណា អាជ្ញាធរ និងសមត្ថកិច្ចខណ្ឌ សង្កាត់ កំពុងសហការណ៍ជាមួយមន្ត្រីជំនាញមកពីស្ថាប័នពាក់ព័ន្ធ ធ្វើការស្រាវជ្រាវរកមូលហេតុពិត នៃការផ្ទុះនេះហើយ ៕
ចែករំលែកព័តមាននេះ