រាជធានីភ្នំពេញ ៖ រថយន្តសាំងយ៉ុងដឹកបុគ្គលិកក្រុមហ៊ុនរចនាមង្គលមកពីរត់តុកោះពេជ្រជាង២០នាក់ បើកឆ្លងផ្លូវបែកជាបួនមិនបានប្រយ័ត្ន ក៏ត្រូវរថយន្តតូយ៉ូតាព្រូសបុកចំកង់ក្រោយចំហៀងខាងស្តាំ បណ្តាលឲ្យរងការខូចខាតទាំងសងខាង ហេតុការណ៍នេះបានកើតឡើងកាលពីវេលាម៉ោង១០និង៣០នាទីយប់ ថ្ងៃទី២២ ខែតុលា ឆ្នាំ២០១៧ តាមបណ្តោយផ្លូវ១០៦កែងផ្លូវ៥១ នៅចំណុចខាងលិចស្ពាននាគ ស្ថិតនៅក្នុងសង្កាត់វត្តភ្នំ ខណ្ឌដូនពេញ ។
តាមប្រភពព័ត៌មានពីសាក្សីដែលឃើញហេតុការណ៍ បានឲ្យដឹងថា មុនពេលកើតហេតុ គេបានឃើញរថយន្តមួយគ្រឿងម៉ាកសាំងយ៉ុង ពណ៌ស ពាក់ស្លាកលេខ ភ្នំពេញ ២Y-២១៣០ ជិះគ្នាជិត២០នាក់ ជារថយន្តដឹកបុគ្គលិកឲ្យក្រុមហ៊ុនរចនាមង្គល ចំនួនជាង២០នាក់ មកពីរត់តុនៅកោះពេជ្រ ធ្វើដំណើរមកតាមបណ្តោយផ្លូវ១០៦ ក្នុងទិសដៅពីកើតទៅលិច ខណៈពេលបើកមកដល់ចំណុចកើតហេតុខាងលើ គាត់បើកឆ្លងផ្លូវបែកជាបួននោះ ជិតផុតទៅហើយក៏ស្រាប់តែមានរថយន្តមួយគ្រឿងម៉ាកតូយ៉ូតាព្រូស ពណ៌ស អត់ស្លាកលេខ ធ្វើដំណើរមកតាមបណ្តោយផ្លូវ៥១ ក្នុងទិសដៅពីជើងទៅត្បូងក្នុងល្បឿនលឿន សង្ស័យស្រវឹង បើកមកដល់ផ្លូវបែកជាបួន មិនបានបន្ថយល្បឿននោះទេ ក៏ជ្រុលទៅបុកចំកង់រថយន្តខាងស្តាំពេញទំហឹង បណ្តាលឲ្យរថយន្តសាំងយ៉ុងរងការខូចខាតបែកកង់ក្រោយចំហៀងខាងស្តាំ និងកំពឹតទ្វារក្រោយខាងស្តាំ ឬឯរថយន្តតូយ៉ូតាព្រូសវិញខូចខាតហើបកាងមុខ និងខ្ទេចមួយចំហៀងខាងឆ្វេង ភា្លមៗនោះដែរ ម្ចាស់រថយន្តតូយ៉ូតាព្រូសចង់ទាមទារឲ្យខាងរថយន្តសាំងយ៉ុងសង ប៉ុន្តែបានសមត្ថកិច្ចមូលដ្ឋានជួយសម្របសម្រួល ទើបខាងរថយន្តព្រូសមិនទាមទារឲ្យជួសជុលទៀត ។
ក្រោយពេលកើតហេតុ រថយន្តសាំងយ៉ុង និងរថយន្តតូយ៉ូតាព្រូស សុខចិត្តយករថយន្តយកទៅជួសជុលដោយខ្លួនឯងរៀងៗខ្លួនបញ្ចប់រឿង ៕
ចែករំលែកព័តមាននេះ