រាជធានីភ្នំពេញ ៖ បុរសម្នាក់ជិះម៉ូតូមួយគ្រឿងបោះពួយយ៉ាងលឿន ខ្វះការប្រុងប្រយ័ត្នត្រង់ចំណុចផ្លូវខ្វែង ក៏ជ្រុលទៅបុករថយន្តដឹកទឹកកកមួយគ្រឿងទៀត ចំពីមុខពេញទំហឹង បណ្ដាលឲ្យបុរសម្នាក់រងរបួសធ្ងន់ធ្ងរ ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះ ហេតុការណ៍នេះកើតឡើងកាលពីវេលាម៉ោង០៣ទាបភ្លឺ ថ្ងៃទី២៣ ខែតុលា ឆ្នាំ២០១៧ ត្រង់ចំណុចតាមបណ្ដោយផ្លូវឧកញ៉ាម៉ុងរឹទ្ធី កែងនិងផ្លូវហាណូយ ស្ថិតក្នុងសង្កាត់គោកឃ្លាង ខណ្ឌសែនសុខ ។
តាមប្រភពព័ត៌មានពីកន្លែងកើតហេតុបានឲ្យដឹងថានៅមុនពេលកើតហេតុ គេឃើញរថយន្តកូរ៉េមួយគ្រឿង ពណ៌ស ពាក់ស្លាកលេខ ភ្នំពេញ ២AG-៤៩៩២ ជាប្រភេទរថយន្តកូរ៉េមួយតោនដឹកទឹកកក បើកបរដោយបុរសពីរនាក់ តាមបណ្តោយផ្លូវឧកញ៉ាម៉ុងរិទ្ធី ក្នុងទិសដៅពីកើតទៅលិច ។ លុះមកដល់ចំណុចកើតហេតុ ក៏បានបត់ឆ្វេងទៅផ្លូវហាណូយ ខណៈពេលនោះស្រាប់តែមានម៉ូតូមួយគ្រឿងទៀតម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ ១E-៦៩៤០ ដែលបើកបរដោយបុរសម្នាក់ តាមបណ្តោយផ្លូវហាណូយ ក្នុងទិសដៅពីត្បូងទៅជើង និងក្នុងល្បឿនយ៉ាងលឿនដូចហោះ រួចក៏ជ្រុលទៅបុករថយន្តចំពីមុខពេញទំហឹង បណ្ដាលឲ្យបុរសដែលជាអ្នកបើកបរម៉ូតូរងរបួសធ្ងន់ធ្ងរ ត្រូវបានរថយន្តសង្គ្រោះដឹកបញ្ជូនទៅសង្គ្រោះនៅគ្លីនិកឯកជន ឬឯម៉ូតូរងការខូចខាតផ្នែកខាងមុខយ៉ាងដំណំ ចំណែកឯរថយន្តរងការខូចខាតកំពឹតផ្នែកខាងមុខចំហៀងខាងឆ្វេង ចំណែកឯអ្នកបើកបររថយន្តទាំងពីរនាក់បានរត់គេចខ្លួនបាត់ស្រមោល ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ និងបានទាក់ទងទៅសមត្ថកិច្ចជំនាញផ្នែកចរាចរណ៍ឲ្យចុះមកធ្វើការវាស់វែងយករថយន្ត និងម៉ូតូទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋានរាជធានីភ្នំពេញ ដើម្បីរងចាំធ្វើការដោះស្រាយគ្នានៅពេលក្រោយ ៕
ចែករំលែកព័តមាននេះ