រាជធានីភ្នំពេញ ៖ បុរសម្នាក់បានបើករថយន្តយ៉ាងលឿនសុខៗស្រាប់តែរថយន្តផ្ទុះកង់ខាងក្រោយ បណ្តាលឲ្យរេចង្កូតជ្រុលទៅបុក និងក្បាលនាគពុះចែកផ្លូវបាក់អស់ចំនួនមួយកង់ ព្រមទាំងរងការខូចខាតរថយន្តផងដែរ ហេតុការណ៍បានកើតឡើងនៅវេលាម៉ោង៩និង១៥នាទីយប់ថ្ងៃទី២២ ខែតុលា ឆ្នាំ២០១៧ ភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុបុរសម្នាក់ អាយុ៤០ឆ្នាំ មិនដឹងថាទៅណានោះទេ បានបើករថយន្តមួយគ្រឿង ពណ៌ស្ករ ស្លាកលេខ ភ្នំពេញ២N-៣៣៧៨ ធ្វើដំណើរតាមផ្លូវជាតិលេខ២ ក្នុងទិសដៅពីត្បូងទៅជើង យ៉ាងលឿនខណៈមកដល់ចំណុចខាងលើមិនដឹងជាយ៉ាងមិច ស្រាប់តែរថយន្តផ្ទុះកង់ក្រោយចំហៀងឆ្វេង លាន់ដូចគ្រាប់បែក និងធ្វើឲ្យរថយន្តរេចង្កូតជ្រុលទៅបុកនឹងក្បាលនាគពុះចែកផ្លូវពេញទំហឹងបាក់អស់ចំនួន១កង់ហើយថែមទាំងឲ្យរថយន្តរងការខូចខាតក្រពិតខាំងមុខចំហៀងខាងឆ្វេង និងបាក់រ៉ូទីលខាងឆ្វេង តែមិនមានគ្រោះថ្នាក់ដល់អ្នកបើករថយន្តទេ ។ បន្ទាប់ពីបង្កគ្រោះថ្នាក់ហើយ គេឃើញបុរសរូបនោះ បានបើករថយន្តមកអែបខាងចិញ្ចើមផ្លូវ រួចហើយបានរត់គេចខ្លួនពីកន្លែងកើតហេតុបាត់ស្រមោលតែម្តង ។
ក្រោយពេលកើតហេតុសមត្ថកិច្ចមូលដ្ឋានជំនាញខណ្ឌមានជ័យបានចុះទៅកន្លែងកើតហេតុ ហើយបានទំនាក់ទំនងហៅខាងជំនាញក្រុង ឲ្យមកស្ទូចយករថយន្តបង្កទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញដើម្បីរង់ចាំធ្វើការដោះស្រាយ ៕
ចែករំលែកព័តមាននេះ