នៅពេលអាមេរិកដកខ្លួនពីពិភពលោក ប្រព័ន្ធរូបិយវត្ថុអន្ដរជាតិប្រហែលជាផ្លាស់ប្តូរ ប៉ុន្តែអាចមិនមែនដឹកនាំដោយរូបិយប័ណ្ណយន់របស់ចិនទេ ។ នៅក្នុងរឿង Blade Runner 2049 បង្ហាញថា រយៈពេល៣២ឆ្នាំទៀត…
នៅពេលអាមេរិកដកខ្លួនពីពិភពលោក ប្រព័ន្ធរូបិយវត្ថុអន្ដរជាតិប្រហែលជាផ្លាស់ប្តូរ ប៉ុន្តែអាចមិនមែនដឹកនាំដោយរូបិយប័ណ្ណយន់របស់ចិនទេ ។
នៅក្នុងរឿង Blade Runner 2049 បង្ហាញថា រយៈពេល៣២ឆ្នាំទៀត រាប់ពីឥឡូវនេះទៅ ទីក្រុង Los Angeles នឹងមានរូបរាងដូចទីក្រុងធំៗរបស់ចិននាពេលបច្ចុប្បន្ន ដែលប្រមូលផ្តុំទៅដោយផ្សែងខ្មៅបំពុលបរិស្ថាន គ្របដណ្ដប់ដោយអគារខ្ពស់ៗ និងពោរពេញទៅដោយការផ្សព្វផ្សាយពាណិជ្ជកម្ម ។
តើប្រាក់ដុល្លារអាមេរិកនៅតែមានឥទ្ធិពលលើពិភពលោក ឬរូបិយប័ណ្ណចិនបានយកឈ្នះរួចទៅហើយ ឬក៏មានរូបិយប័ណ្ណផ្សេងទៀតកើនឡើង រហូតអាចដឹកនាំពិភពលោកទាំងមូល ?
ប្រធានាធិបតីអាមេរិក លោក Donald Trump ហាក់ធានាថា អាមេរិកបានដកថយ យ៉ាងហោចណាស់មួយផ្នែកពីតួនាទីជាអ្នកដឹកនាំសកល ។ សព្វថ្ងៃនេះ ពិភពលោកគួររំពឹងថា ប្រាក់ដុល្លារអាមេរិកនឹងនៅតែជារូបិយប័ណ្ណបម្រុងដ៏សំខាន់ ដែលបានប្រើដើម្បីធ្វើវិក្កយបត្រ និងទូទាត់ពាណិជ្ជកម្មជាអន្តរជាតិសម្រាប់រយៈពេលដ៏យូរខាងមុខ ។ ប៉ុន្តែទាក់ទងនឹងហិរញ្ញវត្ថុអន្តរជាតិ តំណែងប្រាក់ដុល្លារប្រហែលជាគ្មានសុវត្ថិភាពទេ ។
សំណួរគឺ តើចុងបញ្ចប់នៃប្រាក់ដុល្លារ គឺជាការកើនឡើងនៃរូបិយប័ណ្ណចិនឬ ? ស្របនឹងសេដ្ឋវិទូលោក Barry Eichengreen បានព្យាករ ។
អ្នកបង្កើតគោលនយោបាយរបស់ចិនសង្ឃឹមថា នឹងអភិវឌ្ឍន៍តួនាទីរូបិយប័ណ្ណចិនក្នុងហិរញ្ញវត្ថុអន្តរជាតិ ដើម្បីពង្រឹងជំហរភូមិសាស្ត្រនយោបាយរបស់ខ្លួន ចាប់ពីឆ្នាំ១៩៩០មក ។ នៅប៉ុន្មានឆ្នាំថ្មីៗនេះ ថ្នាក់ដឹកនាំចិនបានប្រឹងប្រែងរួមគ្នាដើម្បីបំពេញនូវមហិច្ឆតានេះ ជាពិសេស តាមរយៈការធ្វើឲ្យរូបិយប័ណ្ណចិនមានលក្ខណៈអន្តរជាតិ ។
ប៉ុន្តែហិរញ្ញវត្ថុដឹកនាំដោយរូបិយប័ណ្ណចិន មិនទាន់ត្រៀមខ្លួនរួចរាល់ដើម្បីប្រកួតប្រជែងជាមួយប្រទេសដទៃទេ កុំថាឡើយអាមេរិក។ រូបិយប័ណ្ណចិននៅតែតាមពីក្រោយតម្លៃរូបិយប័ណ្ណបម្រុងផ្សេងទៀត ដូចជា ប្រាក់ដុល្លារ ប្រាក់អឺរ៉ូ ប្រាក់យេនជប៉ុន និងផោនអង់គ្លេស ។
ហេតុផលមួយនៃភាពទន់ខ្សោយរបស់រូបិយប័ណ្ណចិនក្នុងហិរញ្ញវត្ថុអន្តរជាតិ ទោះបីជាវាមានវឌ្ឍនភាពគួរឱ្យកត់សម្គាល់តាំងពីឆ្នាំ២០១០ក៏ដោយ ក៏វានៅតែជារូបិយប័ណ្ណអន្តរជាតិមិនពេញលេញ ។ រូបិយប័ណ្ណចិនមិនច្បាស់លាស់ និងមិនអាចដូរនៅទីផ្សារក្រៅប្រទេសឡើយ។ ជាលទ្ធផល វាមានសារសំខាន់តិចតួចណាស់ សម្រាប់វិនិយោគិនអន្ដរជាតិ ។
សូម្បីតែប្រទេសចិនផ្ទាល់ ក៏ប្រើប្រាស់រូបិយប័ណ្ណរបស់ខ្លួនបានត្រឹមប្រហែល១ភាគ៤នៃពាណិជ្ជកម្មអន្ដរជាតិប៉ុណ្ណោះ ហើយហិរញ្ញវត្ថុអន្តរជាតិក្នុងប្រទេសនេះនៅតែប្រើប្រាស់ប្រាក់ដុល្លារ ។ ក្រុមហ៊ុនចិនដូចជា Alibaba, Baidu និង Tencent បានចុះបញ្ជីនៅទីក្រុងញូវយ៉ក ឬហុងកុង ជាកន្លែងប្រើប្រាស់ប្រាក់ដុល្លារអាមេរិក ឬដុល្លារហុងកុង ។ ប្រាក់កម្ចីរីកចម្រើនយ៉ាងឆាប់រហ័ស និងការវិនិយោគក្រៅប្រទេសភាគច្រើនរបស់ចិន គឺគិតជាប្រាក់ដុល្លារ ។
ហេតុផលមួយដែលយើងមិនគួររំពឹងថា ប្រព័ន្ធហិរញ្ញវត្ថុអន្តរជាតិ នឹងដឹកនាំដោយរូបិយប័ណ្ណចិន ព្រោះមេដឹកនាំចិនមិនបង្ហាញពីការប្តេជ្ញាចិត្តអភិវឌ្ឍន៍ប្រាក់យន់ក្លាយជាជម្រើសពិតប្រាកដជាងប្រាក់ដុល្លារទេ ។ ផ្ទុយទៅវិញ ពួកគេបន្តប្រើវិធីសាស្ត្រសហប្រតិបត្តិការមួយដើម្បីធ្វើកំណែទម្រង់ប្រព័ន្ធរូបិយវត្ថុអន្ដរជាតិ ដែលពួកគេអះអាងថា មិនគួរពឹងផ្អែកលើរូបិយប័ណ្ណប្រទេសណាមួយឡើយ ។
ទោះជាយ៉ាងណា ដើម្បីកសាងប្រព័ន្ធពហុរូបិយប័ណ្ណមួយ ពិភពលោកត្រូវធ្វើកំណែទម្រង់ស្ថាប័នអន្តរជាតិដ៏ទូលំទូលាយ ។ នេះជាចំណុចមួយដែលលោក Zhou Xiaochuan អភិបាលធនាគារប្រជាជនចិន បាននិយាយនៅឆ្នាំ២០០៩ ប្រឆាំងនឹងគំនិតថា មានតែការប្រើប្រាស់ប្រាក់ដុល្លារអាមេរិកប៉ុណ្ណោះ ទើបអាចធានាដំណើរការប្រព័ន្ធរូបិយវត្ថុអន្ដរជាតិ ៕
ប្រភពពី ៖ www.project-syndicate.org
ចែករំលែកព័តមាននេះ