ខេត្តបាត់ដំបង ៖ លោកឧត្តមសេនីយ៍ត្រី អ៊ុក ឃ្នួច មេបញ្ជាការតំបន់ប្រតិបត្តការសឹករងបាត់ដំបង បានទទួលស្វាគមន៍ គណៈកម្មការស្នងការនយោបាយ ក្រុមជំនាញរុករកអដ្ឋិធាតុ នៃរដ្ឋាភិបាលវៀតណាមបានជួបសំណេះសំណាលក្នុងទីបញ្ជាការតំបន់ប្រតិបត្តការសឹករងបាត់ដំបង វេលាព្រឹកថ្ងៃទី២២ ខែតុលា ឆ្នាំ២០១៧ ដែលភាគីវៀតណាមមានលោក វ៉ ង្វៀនជៀន អនុប្រធានស្នងការនយោបាយយោធភូមិភាគទី៧វៀតណាម ជាប្រធានគណៈប្រតិភូចំនួន៥នាក់ អមដោយមេបញ្ជាការរងតំបន់ប្រតិបត្តការសឹករងបាត់ដំបងចំនួន១២នាក់បានចូលរួម។
លោកឧត្តមសេនីយ៍ត្រី អ៊ុក ឃ្នួច មេបញ្ជាការតំបន់ប្រតិបត្តការសឹករងបាត់ដំបងបានរំលឹកពាក្យស្លោកប្រធាន ហូ ជីមិញ ថា (ជួយមិត្ត គឺជាការជួយខ្លួនឯង) និងមានមតិស្វាគមន៍ហើយបានបញ្ជាក់ថាសភាពការណ៍សន្តិសុខ ទាំងក្នុងស្រុក និងតាមបណ្តាព្រំដែនមានភាពល្អប្រសើរ ហើយបានរំលឹកចលនាតស៊ូ រណសិរ្សសង្គ្រោះជាតិកម្ពុជា២ធ្នូ ដែលមានតែកងទ័ពប្រជាជនវៀតណាមទេ បានចេញមុខមកតស៊ូរំដោះប្រជាជនក្នុងប្រទេសកម្ពុជាលុះត្រាទទួលបានជ័យជំនះ ថ្ងៃ៧មករា ឆ្នាំ១៩៧៩ឲ្យរួចចាកផុតពីបនប្រល័យពូជសាសន៍ជាតិឯង។ ហើយបានបន្តជួយឧបត្ថម្ភតំបន់ប្រតិបត្តការសឹករងនូវអាគារស្នាក់នៅ ជួយផ្តល់សម្ភារប្រើប្រាស់ក្នុងអង្គភាពតាមបច្ចេកវិទ្យាទំនើបសរុបជាទឹកប្រាក់ប្រមាណ១៤ម៉ឺនដុល្លារ ក្នុងឆ្នាំ២០១៦ ដោយយោងតាមកិច្ចព្រមព្រៀងរវាងរាជរដ្ឋាភិបាល និងក្រសួងការពារជាតិនៃប្រទេសទាំងពីរ។
លោកឧត្តមសេនីយ៍ត្រី អ៊ុក ឃ្នួច បានបន្តទៀតថា ក្នុងនាមកងទ័ពកម្ពុជានិងវៀតណាមកន្លងមកតែងតែជួយគ្នាទៅវិញទៅមក គឺជាមិត្តភាពសាមគ្គីភាពដូចបងដូចប្អូន ហើយចំពោះការរួមចំណែកជួយរុករកអដ្ឋិធាតុកងទ័ពវៀតណាមដែលបានស្លាប់បាត់ខ្លួននៅក្នុងប្រទេសកម្ពុជាក្នុងពេលមានសង្គ្រាមនោះសម្រាប់ខេត្តបាត់ដំបងបានសហការជិតស្និទ្ធជាមួយក្រុមការងារ K70,K71 ចំនួន១១ ដំណាក់កាល ដោយចាប់ផ្តើមអនុវត្តន៍ពីថ្ងៃទី០៣ ខែមករា ឆ្នាំ២០០៣ យើងរួមគ្នារុករកឃើញចំនួន១៩៥អដ្ឋិធាតុ ព្រមទាំងធ្វើពិធីផ្ទេរប្រគល់ទទួលធ្វើមាតុភូមិនិវត្តន៍យ៉ាងសមរម្យ។ លោកឧត្តមសេនីយ៍ត្រីបានបន្តទៀតថា អ្វីៗយើងជួបការលំបាកនោះមកពីលក្ខណៈភូមិសាស្ត្រមានការប្រែប្រួល តែយើងកំពុងតែរួមសហការរួមគ្នាជាមួយវៀតណាមរុករកជាបន្តទៅទៀត នៅចំណុចសេសសល់ខ្លះៗដូចជា ក្នុងស្រុកគាស់ក្រឡ ស្រុករុក្ខគីរី ស្រុកមោងឫស្សី ស្រុកបាណន់ ស្រុកបវេល ស្រុកសំឡូត និងស្រុកសំពៅលូនជាបន្តទៅទៀត។
បន្ទាប់មកលោក វ៉ ង្វៀនជៀន អនុប្រធានស្នងការនយោបាយយោធភូមិភាគទី៧ប្រទេសវៀតណាមបានថ្លែងថា ដោយអនុវត្តន៍តាមអនុស្សរណៈ នៃការយោគយល់គ្នាក្នុងការរួមសហការណ៍រុករកអដ្ឋិធាតុវៀតណាមដែលបាត់ខ្លួននៅកម្ពុជាកន្លងមកនេះគឺមានកិច្ចសហការបានល្អ សំខាន់អាជ្ញាធរខេត្តបាត់ដំបង និងប្រជាជនជួយសម្រួលទើបយើងទទួលបានលទ្ធផលល្អប្រសើរ ហើយសុំសំណូមពរជាបន្តសុំប្រញាប់ចុះរុករកឲ្យបានឆាប់ព្រោះតែការប្រែប្រួលលក្ខណៈភូមិសាស្ត្រនៅក្នុងតំបន់នេះកំពុងតែមានការអភិវឌ្ឍណ៍ខ្លាំងគ្រប់ទីកន្លែង អាចបាត់បង់កន្លែងខ្លះដែលយើងមិនទាន់បានទៅដល់។ ភាគីវៀតណាមក៏សូមថ្លែងអំណរគុណទាំងកងទ័ព និងប្រជាជនទាំងអស់ដែលបានជួយរួមសហការក្នុងកិច្ចការនេះ ហើយជំនួសមុខឲ្យគណៈកម្មការរាជរដ្ឋាភិបាលវៀតណាមបានប្រគល់សិទ្ធិឲ្យយោធភូមិភាគទី៧បន្តរួមសហការណ៍រុករកអដ្ឋិធាតុជាបន្តទៅទៀត។ ដោយក្នុងឆ្នាំ២០១៧នេះរាល់ការចំណាយ បន្តរួមសហការណ៍បន្តគឺខាងយោធភូមិភាគទី៧វៀតណាមជាអ្នកចំណាយ ក្នុងនោះភាគីវៀតណាមបានប្រគល់ថវិកាជួយក្រុមការងាររបស់គណៈកម្មការតំបន់ប្រតិបត្តការសឹករងបាត់ដំបងចំនួន១ម៉ឺនដុល្លារ សម្រាប់បន្តការរុករកបន្តទៅទៀត៕
ចែករំលែកព័តមាននេះ