ខេត្តព្រៃវែង ៖ ចាត់ទុកថាគឺជាសំណាង១ក្នុង១ម៉ឺនគ្រោះថ្នាក់ ដែលបុរសម្នាក់ខណៈដែលកំពុងជិះម៉ូតូលើដងផ្លូវ ត្រូវរថយន្តបែនដឹកដីខ្នាតយក្ស បុកពីក្រោយបណ្តាលឲ្យដួល ហើយកិនត្រូវក្បាលបណ្តាលឲ្យបែកខ្ទេចមួកសុវត្ថិភាព ប៉ុន្តែមិនត្រូវក្បាលជនរងគ្រោះ។ ហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់នេះ បានកើតឡើងកាលពីវេលាម៉ោង៣រសៀល ថ្ងៃទី២១តុលា នៅលើកំណាត់ផ្លូវជាតិលេខ១ ត្រង់ចំណុចភូមិ១ ឃុំព្រែកខ្សាយ(ខ) ស្រុកពាមរក៍ ខេត្តព្រៃវែង។ ជនរងគ្រោះត្រូវបានគេស្គាល់ថាឈ្មោះ ឡេង សឿង ភេទប្រុស អាយុ៣៦ឆ្នាំ មានទីលំនៅក្នុងភូមិត្នោតច្រុះ ឃុំល្វា ស្រុកព្រះស្តេច ខេត្តព្រៃវែង បានរងរបួសបាក់ដៃទាំងសងខាង តែមិនប៉ះពាល់ដល់អាយុជីវិតទេ។
ទាក់ទិននឹងហេតុការណ៍នៃគ្រោះថ្នាក់ចរាចរណ៍នេះ ត្រូវបានសាក្សីនៅកន្លែងកើតហេតុប្រាប់ឲ្យដឹងថា នៅមុនពេលកើតហេតុគេឃើញជនរងគ្រោះ ជិះម៉ូតូ១គ្រឿងម៉ាកហុងដា C125 ពណ៌ខ្មៅ ពាក់ស្លាកលេខ ព្រៃវែង1J-6902 បើកបរមកពីទិសខាងកើតឆ្ពោះទៅលិច លុះមកដល់ចំណុចកើតហេតុ ម៉ូតូបានបន្ថយល្បឿន ព្រោះវាក់នឹងរថយន្តកុងតឺន័រដែលនៅខាងមុខ។ ភ្លាមនោះក៏ត្រូវបានរថយន្តបែនដឹកដី១គ្រឿងម៉ាកហ៊ីយ៉ាន់ដាយ ពណ៌សលាយខៀវ ពាក់ស្លាកលេខ ព0354 ភព3 បើកមកពីក្រោយបុកកៀរម៉ូតូជនរងគ្រោះបណ្តាលឲ្យដួល ហើយរថយន្តបានកិនពីលើចំក្បាលជនរងគ្រោះ ដែលមានពាក់មួកសុវត្ថិភាពផង បណ្តាលឲ្យបែកមួកសុវត្ថិភាពខ្ទេច ប៉ុន្តែសំណាងល្អជនរងគ្រោះមិនបានដាក់ខ្សែក្រវាត់មួកសុវត្ថិភាពនៅក្រោមចង្កា ទើបបណ្តាលឲ្យក្បាលរបូតចេញពីមួក រួចផុតពីសេចក្តីស្លាប់។
ប៉ុន្តែដៃទាំងសងខាងរបស់ជនរងគ្រោះ បានបោកនឹងថ្នល់ហើយត្រូវម៉ូតូសង្កត់យ៉ាងខ្លាំងទៀត បណ្តាលឲ្យបាក់ដៃទាំងសងខាងតែម្តង។ ទោះជាយ៉ាងណាក៏ដោយ ក្រោយកើតហេតុនោះអ្នកបើកបររថយន្តបង្កឈ្មោះ វ៉ាន់ ឆៃ ភេទប្រុស អាយុ២២ឆ្នាំ មានទីលំនៅក្នុងឃុំឈើកាច់ ស្រុកបាភ្នំ ខេត្តព្រៃវែង មិនបានរត់គេចខ្លួនទៅណាទេ ដោយបាននៅជួយមើលជនរងគ្រោះ និងអះអាងថាធានាសងការខូចខាត និងព្យាបាលជំងឺជូនជនរងគ្រោះទាំងស្រុង។ ចំណែកជនរងគ្រោះភ្លាមៗក្រោយកើតហេតុ ត្រូវបានគេនាំយកមកព្យាបាលនៅក្នុងមន្ទីរពេទ្យបង្អែកអ្នកលឿង រីឯម៉ូតូ និងរថយន្តបង្កសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកពាមរក៍ រង់ចាំការដោះស្រាយនៅពេលក្រោយ៕
ចែករំលែកព័តមាននេះ