ខេត្តកណ្តាល សកម្មភាពដឹកដីខ្សាច់ចាក់លុបព្រែកសាធារណៈបុកគ្រឹះសាងសង់សំណង់រឹងអត់ច្បាប់ចំនួន2កន្លែង ជាប់តាមបណ្តោយផ្លូវជាតិលេខ1 ក្នុងភូមិកោះចិន ឃុំគគីរ ស្រុកកៀនស្វាយ ខេត្តកណ្តាល ។ នៅតែបន្តដំណើរការបានដោយរលូនគ្មានរំខានដល់អាជ្ញាធរ ឬមន្ត្រីជំនាញស្ថាប័នពាក់ព័ន្ធណាមួយឡើយ។…
ខេត្តកណ្តាល សកម្មភាពដឹកដីខ្សាច់ចាក់លុបព្រែកសាធារណៈបុកគ្រឹះសាងសង់សំណង់រឹងអត់ច្បាប់ចំនួន2កន្លែង ជាប់តាមបណ្តោយផ្លូវជាតិលេខ1 ក្នុងភូមិកោះចិន ឃុំគគីរ ស្រុកកៀនស្វាយ ខេត្តកណ្តាល ។ នៅតែបន្តដំណើរការបានដោយរលូនគ្មានរំខានដល់អាជ្ញាធរ ឬមន្ត្រីជំនាញស្ថាប័នពាក់ព័ន្ធណាមួយឡើយ។
គួរបញ្ជាក់ថា ព្រែកបង្កង គឺជាព្រែកសាធារណៈកើតមានតាំងពីដូនតាដែលមានជម្រៅជ្រៅ និងទទឹងប្រហែល40ម៉ែត្រ។ ព្រែកនេះមានសារសំខាន់ណាស់សម្រាប់ជាប្រយោជន៍ដល់ប្រជាពលរដ្ឋរស់នៅអមសងខាងមាត់ព្រែក ក្នុងឃុំគគីរ និងឃុំដីឥដ្ឋ ប្រើប្រាស់ទឹកដូចជា មុជ ដាំស្លរ ស្រោចស្របផលដំណាំផ្សេង ជាពិសេសសម្រាប់រំដោះជំនន់ទឹកភ្លៀវនារដូវវស្សាចេញទៅដៃទន្លេមេគង្គ ដើម្បីបញ្ជៀសនូវផលប៉ះពាល់ និងការរស់នៅរបស់បងប្អូនក្នុងឃុំទាំង2ខាងលើ។ ស្រាប់តែមានបុគ្គល2នាក់ 1-ឈ្មោះ រ៉ាជា អាជីវករលក់គ្រឿងអគ្គិសនីនៅផ្សារគគីរ បានធ្វើសកម្មភាពបុកគ្រឹះសាងសង់សំណង់រឹងផ្ទះ2ល្វែងអត់ច្បាប់រំលោភ លើដីចំណីព្រែកសាធារណៈរយៈពេលជាង1ឆ្នាំ ឥឡូវមកដល់ពេលសាងសង់បានសម្រេចចូលប្រហែល70%ភាគរយហើយ។ និងម្នាក់ទៀតមិនស្គាល់ឈ្មោះរស់នៅឯរាជធានីភ្នំពេញ ក៏បាននិងកំពុងមកជួលឡានដឹកដីខ្សាច់ចាក់លុបបិទប្រព័ន្ធរំដោះទឹកជិតហើយ ក៏ចាប់ផ្តើមដំណើរការបុកគ្រឹះសាងសង់សំណង់អត់ច្បាប់ដែរ។ មិនតែប៉ុណ្ណោះកន្លែងនេះថែមទាំងធ្វើការដឹកជញ្ជូនខ្សាច់តាមរថយន្តតូច-ធំជាច្រើនគ្រឿង បណ្តាលឲ្យជ្រុះដីខ្សាច់រប៉ាត់រប៉ាយពេញលើដងផ្លូវថ្នល់ជាតិលេខ1 ត្រង់ចំណុចមុខកន្លែងចូលចាក់ខាងលើវត្តស្លាកែតបន្តិច គឺថ្នល់ជាតិក្លាយទៅជាដីខ្សាច់តែម្តង ។
ពាក់ព័ន្ធបញ្ហានេះ ខាងមន្ត្រីជំនាញសូរិយាដីស្រុក-ខេត្តក៏ធ្លាប់បានអះអាងប្រាប់ថា ការសាងសង់សំណង់នេះ គ្មានអ្នកណាហ៊ានចេញច្បាប់សាងសង់ឲ្យទេ ព្រោះដីគ្មានប័ណ្ណ តែធ្វើម៉េចខាងជំនាញគ្មានកម្លាំងគ្រប់គ្រាន់ចុះទៅហាមឃាត់គេ បានត្រឹមតែធ្វើរបាយការណ៍បញ្ជូនទៅឲ្យរដ្ឋបាលខេត្ត ដើម្បីរកវិធានការណ៍បន្ត។ ចំណែកលោកអ៊ូ ឈាង អភបាលស្រុក ក៏ធ្លាប់បានប្រាប់ដែរថា លោកទទួលស្គាល់ថា ការសាងសង់នេះពិតជាប៉ះពាល់ដីព្រែកសាធារណៈ និងអត់ច្បាប់មែន ប៉ុន្តែជាមួយពលរដ្ឋយើងចេះតែបិទភ្នែក បិទច្រមុះ ខ្លះឲ្យគាត់ទៅហើយ បើអ្នកព័ត៌មានចង់ដឹងពីច្បាប់ទម្លាប់ច្បាស់ទៅសួរមន្ត្រីសូរិយាដីចុះ។
ទោះយ៉ាងណាករណីនេះ បន្ទាប់ពីសារព័ត៌មានចេញផ្សាយជាច្រើនលេខរួចមក គេតែងតែសង្កេតឃើញវត្តមានអស់លោកមន្ត្រីមិនដឹងជាស្ថាប័នណាខ្លះទេ ជិះសុទ្ធតែរថយន្តទំនើបៗចុះទៅជួបម្ចាស់សំណង់អត់ច្បាប់ទាំងនោះស្ងាត់ៗ រួចក៏ត្រឡប់មកវិញ រីឯដំណើរការសាងសង់នៅតែបន្តដដែល៕
ចែករំលែកព័តមាននេះ