ប្រទេសអាហ្វហ្គានីស្ថាន ៖ ការវាយប្រហារអត្តឃាតថ្មីមួយនៅក្រុងកាប៊ុលដែលបណ្តាលឱ្យស្លាប់ទាហានថ្មីអាហ្វហ្គានីស្ថាន១៥នាក់ កាលពីថ្ងៃទី២១ តុលា ជាការវាយប្រហារលើកទី២ រយៈពេល២៤ម៉ោងក្រោយការវាយប្រហារប្រឆាំងព្រះវិហារស៊ីអុីតមួយញ៉ាំងឱ្យចំនួនអ្នកស្លាប់ឡើងដល់ជាង២០០នាក់ ក្នុងការវាយប្រហារភេរវកម្មនានានៅអាហ្វហ្គានីស្ថានចាប់ពីថ្ងៃទី១៧ តុលា មក ។
សរុបមានការវាយប្រហារ៧លើករយៈពេលតែ៥ថ្ងៃនៅអាហ្វហ្គានីស្ថាន ក្នុងនោះការវាយប្រហារ៥លើកសំដៅលើកងកម្លាំងសន្តិសុខគឺកងទ័ព និងប៉ូលិស ។
អ្នកនាំពាក្យក្រសួងការពារប្រទេសអាហ្វហ្គានីស្ថានឧត្តមសេនីយ៍ DAVLAT WAZIRI និយាយថា ទាហានថ្មី១៥នាក់នៃកងទ័ពអាហ្វហ្គានីស្ថានបានត្រូវសម្លាប់កាលពីថ្ងៃទី២១ តុលា ដោយជនអត្តឃាតម្នាក់ដែលដើរមករករថយន្តបឺសធុនតូច ដែលពួកគេជិះចេញពីសាលាយោធាធ្វើឱ្យគ្រឿងផ្ទុះដាក់ជាប់ខ្លួនគេផ្ទុះ ។ ក្រៅពីអ្នកស្លាប់ទាហានថ្មី៤នាក់ទៀតរងរបួស ។
ពួកតាលីបង់ប្រកាសទទួលខុសត្រូវចំពោះការវាយប្រហារនេះ ក្នុងសារមួយផ្ញើដល់សារព័ត៌មាន ។ វាជាការវាយប្រហារថ្មីនៅរដ្ឋធានីកាប៊ុល បន្ទាប់ពីក្រុមរដ្ឋអ៊ិស្លាមវាយប្រហារព្រះវិហារស៊ីអីុតមួយនៅភាគខាងលិចក្រុង បណ្តាលឱ្យមនុស្សស្លាប់៥៦នាក់ និងរបួស៥៥នាក់ កាលពីយប់ថ្ងៃទី២០ តុលា ក្នុងចំណោមពួកស៊ីអុីតដែលមកសូត្រធម៌ក្នុងព្រះវិហារនេះ ។
ក្រៅពីការវាយប្រហារប្រឆាំងព្រះវិហារ IMAM ZAMAN ការវាយប្រហារភាគច្រើនប្រកាសទទួួលខុសត្រូវដោយពួកតាលីបង់ដោយពួកនេះបានបង្កើនប្រតិបត្តិការរបស់ពួកគេនាសប្តាហ៍កន្លងទៅ ៕
ចែករំលែកព័តមាននេះ