ខេត្តត្បូងឃ្មុំ ៖ មានអំពើឃាតកម្មយ៉ាងសាហាវព្រៃផ្សៃ ដោយពីរនាក់ប្តីប្រពន្ធត្រូវបានជនមិនស្គាល់មុខឡើងមកកាប់ប្រហារជាច្រើនកាំបិតឡើងសុសសាច់ ហេតុការណ៍នោះកើតឡើងអាចតាំងពីចម្លោះម៉ោង៧ទៅ៨យប់ ថ្ងៃទី២០ ខែតុលា ឆ្នាំ២០១៧ ស្ថិតនៅភូមិទី៥ ឃុំរកាខ្នុរ ស្រុកក្រូចឆ្មារ ហើយរហូតមកដល់វេលាម៉ោង១០ព្រឹក ថ្ងៃទី២១ តុលា ទើបបង្កឲ្យមានការភ្ញាក់ផ្អើលដល់សមត្ថកិច្ចចុះទៅពិនិត្យសព។
លោកវរសេនីយ៍ឯក សាំ ហេង ប្រាប់ឲ្យដឹងថា អ្នកដែលស្លាប់ ១-ប្តីឈ្មោះ គឹម សេងគាង អាយុ៤៨ឆ្នាំ មានមុខរបរទិញ-លក់ម៉ូតូ ស្លាប់នៅរានផ្ទះបាយ និង២-ប្រពន្ធឈ្មោះ ហួយ ពៅ អាយុ៤៥ឆ្នាំ មានរបរលក់ខោអាវជជុះ បានស្លាប់នៅមាត់ទ្វារលើផ្ទះ ។
លោកប្រាប់បន្តថា កាលពីយប់កើតហេតុពលរដ្ឋក្បែរខាងបានឮសូរសំលេងស្ត្រីជាប្រពន្ធស្រែកខុសពីធម្មតាក៏នាំគ្នាដើរទៅមើលជិតដល់ ស្រាប់តែស្ងាត់នឹកស្មានតែប្តីប្រពន្ធនេះឈ្លោះគ្នា រួចនាំគ្នាត្រឡប់វិញ។ លុះដល់ព្រឹកថ្ងៃទី២១ ប្អូនប្រុសរបស់ស្ត្រីរងគ្រោះមិនឃើញបងយកខោអាវមកលក់នឹកឆ្ងល់ក៏មកតាមរកដល់ផ្ទះ ។ ពេលនោះរុញទ្វារខាងមុខជាប់គន្លឹះក៏ដើរទៅឡើងតាមជណ្តើរខាងក្រោយ ស្រាប់តែរុញទៅឃើញបងស្រី និងបងថ្លៃស្លាប់ក្នុងថ្លុកឈាមយ៉ាងរន្ធត់ ទើបបង្កឲ្យមានការភ្ញាក់ផ្អើលតែម្តង ។ ចំពោះរបស់ទ្រព្យជនរងគ្រោះ ក្នុងនោះមានរថយន្តម៉ាកហាយឡិនឌ័រ១គ្រឿង ម៉ូតូ៤គ្រឿង លុយ៣.៧០០ដុល្លារ ព្រមទាំងគ្រឿងអលង្ការមិនបានបាត់នោះទេ ។
រហូតមកដល់រសៀលថ្ងៃទី២២ តុលា សមត្ថកិច្ចបានសន្និដ្ឋានថា មិនមែនជាករណីប្លន់សម្លាប់ទេ តែអាចរឿងគំនុំច្រើនជាង ។ ហើយប្តីប្រពន្ធដែលស្លាប់នេះមានកូនពីរនាក់ តែកូនៗមិនបាននៅជាមួយនោះទេ គឺកំពុងតែសិក្សានៅរាជភ្នំពេញ ។ ចំណែកស្នាមកាប់នោះ ឃាតករអាចប្រើកាំបិតត្នោត ឫកាំបិតប៉័ងតោ ដោយកាប់ត្រូវសុសសាច់១៥កន្លែង រីឯប្រពន្ធវិញក៏ត្រូវជាច្រើនកាំបិតដែរ ។ ហើយខណៈពេលនេះសមត្ថកិច្ចកំពុងតែស្រាវជ្រាវតាមប្រមាញ់ឃាតករមកផ្តន្ទារទោសតាមច្បាប់៕
ចែករំលែកព័តមាននេះ