ការស្រាវជ្រាវថ្មីមួយបានបង្ហាញថា ស្ត្រីមានផ្ទៃពោះនៅត្រីមាសចុងក្រោយគួរតែដេកចំហៀង ។ ការស្រាវជ្រាវបានរកឃើញថាទម្លាប់នៃការគេងរបស់ស្ត្រីមានផ្ទៃពោះមានឥទ្ធិពលយ៉ាងខ្លាំងចំពោះអត្រាបេះដូងរបស់ទារក ។ បេះដូងរបស់ទារកក្នុងផ្ទៃនឹងមិនសូវសកម្មទេនៅពេលម្តាយរបស់ពួកគេគេងផ្ងារ ។
ការស្រាវជ្រាវពីមុនបានបង្ហាញថា ការគេងផ្ងារក្នុងត្រីមាសចុងក្រោយអំឡុងពេលមានផ្ទៃពោះដាក់សម្ពាធកាន់តែខ្លាំងទៅលើសរសៃឈាមដែលផ្គត់ផ្គង់ដល់ស្បូនដែលជាហេតុនាំឱ្យមានការកាត់បន្ថយការផ្គត់ផ្គង់អុកស៊ីសែនដល់ទារក ។
អ្នកដឹកនាំការស្រាវជ្រាវលោកសាស្ត្រាចារ្យ Peter Stone ពីសាកលវិទ្យាល័យ Auckland បានថ្លែងថា៖«ឥឡូវនេះមានភស្តុតាងគ្រប់គ្រាន់ដើម្បីណែនាំឱ្យម្តាយចៀសវាងក្នុងការគេងផ្ងារនៅពេលមានផ្ទៃពោះនៅត្រីមាសចុងក្រោយ »។
ក្រុមអ្នកស្រាវជ្រាវបានវិភាគលើស្ត្រីដែលមានសុខភាពល្អចំនួន២៩នាក់ដែលមានផ្ទៃពោះពី៣៤ទៅ៣៨សប្តាហ៍ ។ អត្រាបេះដូងរបស់ទារកត្រូវបានកត់ត្រាជាបន្តបន្ទាប់ពេញមួយយប់ ។ ការគេងរបស់អ្នកចូលរួមត្រូវបានតាមដានតាមរយៈការថតវីដេអូ ។
លទ្ធផលបង្ហាញពីការគេងរបស់ស្ត្រីមានផ្ទៃពោះមានឥទ្ធិពលខ្លាំងទៅលើការប្រែប្រួលនៃអត្រាបេះដូងរបស់ទារក ។ នៅពេលស្ត្រីគេងផ្ងារ ទារកក្នុងផ្ទៃចាប់ផ្តើមលែងសកម្មជាងពេលដែលម្តាយរបស់ពួកគេគេងចំហៀង ។
ប្រសិនបើម្តាយរបស់ពួកគេផ្លាស់ប្តូរទីតាំងក្នុងពេលគេង ដូចជាប្តូរពីការគេងខាងឆ្វេងទៅគេងផ្ងារ នោះទារកក្នុងផ្ទៃចាប់ផ្តើមលែងកម្រើក ។
លោកសាស្ត្រាចារ្យ Stone បាននិយាយថា៖« ក្នុងស្ថានភាពដែលទារកមិនមានសុខភាពល្អដូចជាទារកដែលមិនសូវលូតលាស់ ទារកនោះអាចនឹងមិនអាចទ្រាំទ្រចំពោះផលប៉ះពាល់នៃការគេងផ្ងាររបស់ម្តាយ » ។
ឥឡូវនេះមានភស្តុតាងគ្រប់គ្រាន់ដើម្បីណែនាំឱ្យអ្នកម្តាយចៀសវាងក្នុងការគេងផ្ងារពេលមានផ្ទៃពោះនៅត្រីមាសចុងក្រោយ មិនត្រឹមតែដោយសារតែទិន្នន័យអេពីដេមីទេ ប៉ុន្តែដោយសារតែអ្នកស្រាវជ្រាវបានបង្ហាញថាវាមានឥទ្ធិពលយ៉ាងច្បាស់លើទារក ។
ការស្រាវជ្រាវពីមុនបានបង្ហាញថាស្ត្រីមានផ្ទៃពោះគេងផ្ងារប្រឈមមុខនឹងការកើនឡើងហានិភ័យនៃការបង្កើតកូនមកស្លាប់ ។ ដោយសារតែទម្ងន់របស់ទារកដាក់សម្ពាធលើសរសៃឈាមដែលចិញ្ចឹមស្បូន បន្ទាប់មកវានឹងកាត់បន្ថយការផ្គត់ផ្គង់អុកស៊ីសែនដល់ទារក ៕
ចែករំលែកព័តមាននេះ