ខេត្តព្រៃវែង ៖ កាលពីរសៀលថ្ងៃទី២០ ខែតុលា ឆ្នាំ២០១៧ កំលាំងការិយាល័យព្រហ្មទណ្ឌនៃស្នងការដ្ឋាននគរបាលខេត្តព្រៃវែងសហការជាមួយកំលាំងអធិការដ្ឋាននគរបាលស្រុកបាភ្នំ បានបើកប្រតិបត្តិការចុះបង្ក្រាបវង់ល្បែងស៊ីសងមួយកន្លែង ស្ថិតនៅភូមិមាត់ព្រៃ ឃុំជើងភ្នំ ស្រុកបាភ្នំ ដោយបានធ្វើឱ្យប្រជាពលរដ្ឋមានការអបអរសាទរ និងគាំទ្រជាខ្លាំងចំពោះចំណាត់ការនេះ ។
ប៉ុន្តែនៅក្នុងរបាយការណ៍ស្តីពីលទ្ធផលនៃការបង្ក្រាបនេះបែរជាត្រូវបានគេមើលឃើញថា មានភាពមិនប្រក្រតីមួយបានកើតឡើងដោយសារតែរបាយការណ៍លទ្ធផលនៃការបង្ក្រាបរបស់ថ្នាក់ខេត្ត និងថ្នាក់ស្រុក មានការខុសគ្នាស្រឡះ ដោយកំលាំងជំនាញខេត្តបញ្ជាក់ថា ចាប់បានក្រុមអ្នកលេងល្បែងចំនួន៧នាក់ ព្រមជាមួយម៉ូតូ៦គ្រឿង ប៉ុន្តែសមត្ថកិច្ចស្រុកបាភ្នំអះអាងថា ចាប់មនុស្សមិនបានទេ គឺចាប់បានតែម៉ូតូ៦គ្រឿង ដោយឡែកមនុស្សរត់រួចទាំងអស់ ។ ចំពោះករណីនេះបានធ្វើឱ្យមហាជនមានការងឿងឆ្ងល់ជាខ្លាំង ព្រោះពេលចុះទៅបង្ក្រាបនោះ កំលាំងនគរបាលខេត្ត និងនគរបាលស្រុក គឺចុះទៅជាមួយគ្នាធ្វើការជាមួយគ្នា ហេតុអ្វីលទ្ធផលដែលចេញមកស្រាប់តែខុសគ្នាបែបនេះទៅវិញ ។
កំលាំងនគរបាលខេត្តបានអះអាងថា ចាប់មនុស្សបាន៧នាក់ ដោយមានទាំងរូបថតមនុស្សទាំង៧នាក់ឈរថតជាមួយម៉ូតូដែលចាប់បានជាអំណះអំណាងផងដែរ ប៉ុន្តែបែរជាលោកអធិការស្រុកបាភ្នំអះអាងថា ចាប់មនុស្សអត់បានទេ អញ្ចឹងតើមនុស្ស៧នាក់នោះជានរណា? ចំពោះចម្ងល់មួយនេះ ត្រូវបានមន្ត្រីតូចតាចម្នាក់នៅក្នុងស្រុកបាភ្នំលួចបង្ហើបឱ្យដឹងថា នៅក្នុងប្រតិបត្តិការចុះបង្ក្រាបទីតាំងបើកលេងល្បែងខាងលើនោះ ភ្លាមៗគឺសមត្ថកិច្ចចាប់បានតែម៉ូតូ៦គ្រឿងប៉ុណ្ណោះ ប៉ុន្តែពេលនាំយកម៉ូតូមកដល់អធិការស្រុកសមត្ថកិច្ចស្រាវជ្រាវស្គាល់ម្ចាស់ម៉ូតូ ក៏ទាក់ទងហៅម្ចាស់ម៉ូតូមកកាន់អធិការស្រុកធ្វើការអប់រំណែនាំ រួចក៏ចាប់ឱ្យម្ចាស់ម៉ូតូបង់លុយលោះយកម៉ូតូទៅវិញ ហើយលុយដែលបានមកគឺខាងសមត្ថកិច្ចខេត្តយកទៅទាំងអស់ ដោយឡែកខាងស្រុកបានត្រឹមតែហត់ប៉ុណ្ណោះ ៕
ចែករំលែកព័តមាននេះ