ខេត្តកំពត ៖ កំពតនឹងក្លាយជាខេត្តគោលដៅទេសចរណ៍ដ៏ទាក់ទាញបំផុតមួយនៅកម្ពុជានាពេលឆាប់ៗខាងមុខនេះ ដោយស្វាគមន៍ភ្ញៀវទេសចរជាតិ និងអន្តរជាតិជារៀងរាល់ឆ្នាំ ព្រោះខេត្តមួយនេះមានទេសភាពស្រស់ស្អាត ។ នៅតាមបណ្ដោយមាត់សមុទ្រ និងព្រែក អាចសាងសង់សណ្ឋាគារ ឧទ្យានទឹក រីសត ផ្ទះសំណាក់ ដែលអំណោយផលដល់វិស័យទេសចរណ៍ និងកសិកម្ម ជាពិសេស អំណោយផលដល់ដំណាំម្រេច និងប្រភេទដីសម្រាប់លំនៅឋាន ដែលធ្វើឲ្យវិនិយោគិនជាតិ និងអន្តរជាតិ កំពុងចាប់អារម្មណ៍ទៅបណ្ដាក់ទុនវិនិយោគយ៉ាងខ្លាំង ពិសេសក្រោយពីមានគម្រោងធំៗគ្រោងបោះទីតាំងនោះខេត្តជាប់មាត់សមុទ្រមួយនេះ ។
កត្ដាអំណោយផលទាំងនេះ បានធ្វើឲ្យវិស័យដីធ្លីនៅខេត្តកំពតកំពុងតែមានសកម្មភាពខ្លាំង ហើយតម្លៃក៏មានកើនឡើងនៅតាមតំបន់មួយចំនួនផងដែរ ។ តើតំបន់ណាដែលមានសកម្មភាព និងលក់ដាច់ជាងគេ ?
បើតាមប្រធានក្រុមហ៊ុនអចលនទ្រព្យ Kampot Property បានឲ្យដឹងថា នៅចុងឆ្នាំនេះ តំបន់មាត់សមុទ្រ ត្រូវបានអ្នកវិនិយោគមើលឃើញច្រើនជាងតំបន់ផ្សេងៗទៅទៀត ។
លោក សុខ គែន បានប្រាប់តាមទូរស័ព្ទនៅថ្ងៃទី២០ តុលា ថា ៖« ដីនៅខេត្តកំពតមានច្រើនតំបន់ដូចជា តំបន់មាត់សមុទ្រ ដងព្រែក ជើងភ្នំ លំនៅឋាន និងតំបន់ដីកសិកម្ម ហើយតំបន់មាត់សមុទ្រឃើញថា មានអ្នកមកវិនិយោគច្រើនជាងគេ តាំងពី២ឆ្នាំមុនមកម្ល៉េះ គឺភាគច្រើនអ្នកមកវិនិយោគសុទ្ធតែជាជនជាតិចិន ដោយផ្ដោតទៅលើរីសត បឹងកាឡូ ផ្ទះសំណាក់ និងធ្វើកន្លែងផ្សេងទៀត ជាពិសេស ពួកគាត់សុទ្ធតែអភិវឌ្ឍន៍គម្រោងធំៗជាច្រើន »។
យ៉ាងណាក៏ដោយ គិតរហូតមកដល់ពេលនេះ មានតែគម្រោងប៉ុណ្ណោះ មិនទាន់ឃើញមាន គម្រោងណាមួយចេញរូបរាងនៅឡើយទេ ។ នេះបើតាមលោកសុខ គែន បានបញ្ជាក់ ។
ប្រធានក្រុមហ៊ុនអចលនទ្រព្យរូបនេះបានបន្ថែមថា មូលហេតុដែលតំបន់មាត់សមុទ្រលេចធ្លោជាងគេ ដោយសារតែវាជាតំបន់អភិវឌ្ឍន៍ អំណោយផលដល់វិនិយោគិន និងនៅជិតទីតាំងកំពង់ផែទេសចរណ៍ខេត្ត ។
លោក សុខ គែន ក៏បានបង្ហើបថា នៅថ្ងៃខាងមុខ ខេត្តកំពតនឹងឈានដល់ការអភិវឌ្ឍស្រដៀងនឹងក្រុងព្រះសីហនុដែរ ព្រោះវិនិយោគិនបច្ចុប្បន្ន កំពុងតែងាកមករកខេត្តកំពតច្រើន ដោយសារវាជាកន្លែងអំណោយផលដល់វិស័យទេសចរណ៍ ។
ម្យ៉ាងវិញទៀត ដីនៅតំបន់នេះនៅមានតម្លៃថោកសមរម្យជាងនៅក្រុងព្រះសីហនុ ដោយសព្វថ្ងៃនេះ ដីនៅតំបន់មាត់សមុទ្រ គឺមានតម្លៃពី៥០ទៅ១០០ដុល្លារក្នុង១ម៉ែត្រការ៉េតែប៉ុណ្ណោះ ។
បើតាមការឲ្យដឹងពីជំនួយការអភិបាលខេត្ត លោក នូរ ច័ន្ទដា បានថ្លែងថា ៖« បើប្រៀបធៀបនឹងការរីកចម្រើនលើវិស័យទេសចរណ៍ និងការវិនិយោគ ខេត្តកំពតមិនត្រឹមតែអាចប្រហាក់ប្រហែលនឹងក្រុងព្រះសីហនុទេ តែវានឹងអាចលើសហ្នឹងទៅទៀត»។
លោកបញ្ជាក់បែបនេះ ដោយសារខេត្តកំពតជាតំបន់ខ្ពង់រាបអនុគ្រោះដល់ការសាងសង់ពីបណ្ដាវិនិយោគិនធំៗទាំងក្នុង និងក្រៅស្រុក ហើយក៏ជាតំបន់ទេសចរណ៍យ៉ាងធំទូលាយទាំងធម្មជាតិ និងវប្បធម៌ផងដែរ ។ វិនិយោគិនមកវិនិយោគនៅខេត្តកំពតភាគច្រើន គឺជាជនជាតិចិន ដែលពួកគេបានសាងសង់រោងចក្រជាច្រើនដូចជា រោងចក្រស្បែកជើង និងសម្លៀកបំពាក់ជាដើម ។
ក្រៅពីវិនិយោគិនចិន ក៏មានវិនិយោគិនមកពីអឺរ៉ុប និងបារាំង បានមកវិនិយោគកន្លែងកម្សាន្តផងដែរ ដូចជា បឹងកាឡូ ផ្ទះសំណាក់ សណ្ឋាគារ រីសត និងផ្សារទំនើប ៕
ចែករំលែកព័តមាននេះ