រាជធានីភ្នំពេញ ៖ នៅក្នុងសេចក្តីប្រកាសព័ត៌មានរបស់ខ្លួនចុះថ្ងៃទី១៩ ខែតុលា អាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន បានធ្វើការបដិសេធសេចក្តីថ្លែងការណ៍ក្រោមចំណងជើងថា «Tear Gas Removal in Svay Rieng»(ការបោសសម្អាតគ្រាប់បែកបង្ហៀរទឹកភ្នែកនៅខេត្តស្វាយរៀង) ចេញដោយស្ថានទូតសហរដ្ឋអាមេរិកប្រចាំក្រុងភ្នំពេញ ហើយដែលក្នុងនោះបានលើកឡើងក្នុងន័យបំភ្លៃការពិត និងបំភ័ន្តមតិជាតិនិងអន្តរជាតិថា អាជ្ញាធរមីនបានដឹងជាច្រើនឆ្នាំមកហើយនូវគ្រាប់បែកគីមី ដែលទម្លាក់ដោយសហរដ្ឋអាមេរិកនៅខេត្តស្វាយរៀងកន្លងមក ប៉ុន្តែការពិត អាជ្ញាធរមីនទើបតែបានទទួលព័ត៌មាននៅអំឡុងខែមករា ឆ្នាំ២០១៧នេះ ដែលរាយការណ៍ដោយប្រជាពលរដ្ឋនៅទីនោះ ។ សេចក្តីប្រកាសព័ត៌មានបន្តថា យើងក៏បានធ្វើទំនាក់ទំនងតាមគ្រប់មធ្យោបាយទៅស្ថានទូតសហរដ្ឋអាមេរិក ក្នុងន័យរួមសហការគ្នាតាមគោលការណ៍មនុស្សធម៌ ដើម្បីធ្វើការលុបបំបាត់ការភ័យខ្លាចរបស់ប្រជាពលរដ្ឋនៅទីនោះ ប៉ុន្តែជាអកុសល យើងពុំដែលបានទទួលនូវការឆ្លើយតបជាវិជ្ជមានណាមួយពីស្ថានទូតសហរដ្ឋអាមេរិក នៅទីក្រុងភ្នំពេញឡើយ ។ ក្នុងន័យរំដោះទុក្ខវេទនារបស់ប្រជាពលរដ្ឋដែលរងផលប៉ះពាល់ពីសារធាតុគីមីទាំងអស់នោះ រាជរដ្ឋាភិបាលបានសម្រេចដោយមិនអាចនៅរង់ចាំតទៅទៀត ធ្វើការបោសសម្អាតចាប់ពីថ្ងៃទី១ ខែតុលា ២០១៧ ហើយយើងក៏បានរកឃើញនូវទីតាំងផ្សេងៗជាច្រើនកន្លែងទៀតក្នុងភូមិសាស្ត្រដដែលដោយសារប្រជាពលរដ្ឋ១៩នាក់ ដែលរងផលប៉ះពាល់ពីសាធាតុគីមីទាំងនោះ ។
អាជ្ញាធរមីននៅតែអំពាវនាវដ៏ទទូចឱ្យសហរដ្ឋអាមេរិកមានវិចារណញ្ញាណប្រកបដោយមនុស្សធម៌ រួមសហការគ្នាក្នុងការបោសសម្អាតបំផ្លាញនូវគ្រាប់បែកគីមីទាំងនោះចេញ និងបន្តបោសសម្អាតនៅកន្លែងផ្សេងទៀត ។ ជាមួយនេះ ថ្កោលទោសដាច់អហង្ការរាល់ការចោទប្រកាន់នានា នៃសេចក្តីថ្លែងការណ៍របស់ស្ថានទូតសហរដ្ឋអាមេរិក ដែលមានចេតនាគេចវេះពីការទទួលខុសត្រូវ ។ នៅក្នុងសេចក្ដីថ្លែងការណ៍ចុះថ្ងៃទី១៩ ខែតុលា ស្ថានទូតសហរដ្ឋអាមេរិកអះអាងថា
អាជ្ញាធរសកម្មភាពកម្ចាត់មីនកម្ពុជា (CMAC) បានដឹងថា មានគ្រាប់បែកឧស្ម័នបង្ហៀរទឹកភ្នែក នៅទីតាំងក្នុងខេត្តស្វាយរៀង តាំងតែពីយូរយារណាស់មកហើយ ហើយជឿជាក់ថា អាជ្ញាធរកម្ពុជាពិតជាមានសមត្ថភាព និងធនធានក្នុងការដោះនិងបំផ្លាញគ្រាប់បែកទាំងនោះបានដោយសុវត្ថិភាព និងមិនប្រើពេលយូរទេ ព្រោះអ្នកជំនាញផ្នែកយោធាអាមេរិក បានផ្ដល់វគ្គបណ្ដុះបណ្ដាលផ្នែកគ្រាប់បែកឧស្ម័ននេះ ដល់មន្ត្រីខ្មែររហូតដល់ទៅ២លើក គឺលើកទី១នៅឆ្នាំ២០១៥ និងលើកទី២ ក្នុងឆ្នាំ២០១៦ ។ មិនតែប៉ុណ្ណោះ មន្ត្រីយោធាអាមេរិកបានប្រគល់ឧបករណ៍មួយឈុតគ្រប់គ្រាន់ ដើម្បីប្រតិបត្តិការដោះ និងបំផ្លាញគ្រាប់បែកឧស្ម័នប្រភេទនេះ ទៅដល់កងយោធពលខេមរភូមិន្ទរួចហើយដែរ ។ ប្រតិកម្មរបស់ស្ថានទូតអាមេរិកនៅពេលនេះ ធ្វើឡើងទំនងជាការឆ្លើយតបទៅនឹងការថ្លែងរបស់សម្តេចតេជោនាយករដ្ឋមន្ត្រី កាលពីថ្ងៃទី១៧ ខែតុលា ដែលចាត់ទុកគ្រាប់បែកឧស្ម័ន បង្ហៀរទឹកភ្នែកទាំងនោះថា ជាគ្រាប់បែកគីមី ប៉ះពាល់ដល់សុខភាពកុមារក្នុងតំបន់នោះ និងបានបង្ហាញសារឆ្ពោះទៅរដ្ឋាភិបាលអាមេរិកថានេះ«ជាសោកនាដកម្មនៅស្រុកខ្មែរ តើគេមានដែលគិតពីសិទ្ធិមនុស្ស និងប្រជាធិបតេយ្យឬទេ?» ។ កាលពីថ្ងៃទី១៧ ខែតុលា រាជរដ្ឋាភិបាល បានរកឃើញមនុស្សចំនួន១៩នាក់មានរោគសញ្ញារមាស់នៅដងខ្លួន និងមានភាពមិនប្រក្រតីលើរាងកាយ ហើយពួកគេត្រូវបានបញ្ជូនភ្លាមៗទៅមន្ទីរពេទ្យ ខណៈរដ្ឋមន្ត្រីក្រសួងសុខាភិបាល លោក ម៉ម ប៊ុនហេង ថ្លែងថា បានរកឃើញក្មេង៣នាក់កាលពីពេលថ្មីៗនេះ ដែលកើតមកខុសប្រក្រតី ។ លោកអះអាងថា បណ្ដាលមកពីផលប៉ះពាល់ពីការសាយភាយគ្រាប់បែកដែលលោកហៅថាជាគ្រាប់បែកគីមីទាំងនេះ ។ នៅក្នុងសេចក្ដីថ្លែងការណ៍របស់ស្ថានទូតសហរដ្ឋអាមេរិកបានបញ្ជាក់ទៀតថា ខ្លួនទទួលខុសត្រូវខ្ពស់ក្នុងការដោះស្រាយបញ្ហា ដែលជាកេរដំណែលរបស់ខ្លួនបន្សល់ទុកពីសម័យសង្គ្រាម និងបញ្ជាក់អំពីឆន្ទៈឥតប្រែប្រួលរបស់សហរដ្ឋអាមេរិក ក្នុងការទទួលយកមកពិចារណានូវសំណើដែលប្រកបដោយភាពស្មោះសរពីរាជរដ្ឋាភិបាលកម្ពុជា ប្រសិនបើចង់សុំឲ្យសហរដ្ឋអាមេរិកជួយពិតមែននោះ ។ ស្ថានទូតសហរដ្ឋអាមេរិកបញ្ជាក់ថា ក្នុងរយៈពេលជាង២០ឆ្នាំកន្លងមកនេះ រដ្ឋាភិបាលសហរដ្ឋអាមេរិក បានចំណាយថវិកាមិនតិចជាង១៣១លានដុល្លារសហរដ្ឋអាមេរិកនោះទេ ដើម្បីជួយរុករក និងសម្អាតយុទ្ធភណ្ឌមិនទាន់ផ្ទុះ ដែលបន្សល់ទុកពីសម័យសង្គ្រាម ។ ថវិកាមួយភាគធំ បានយកទៅប្រើប្រាស់ សម្រាប់ដោះមីនរបស់ចិន សូវៀត និងវៀតណាម នៅភាគខាងលិចប្រទេស គឺនៅតាមចម្ការមីនដែលមានគ្រោះថ្នាក់១០ដងលើសគ្រាប់បែកដែលទម្លាក់ដោយអាមេរិកទៅទៀត ។
សេចក្តីជូនព័ត៌មានរបស់ក្រសួងសុខាភិបាលទាក់ទងនឹងគ្រាប់បែកគីមី ដែលបង្កឱ្យមានជំងឺមិនប្រក្រតីកើតមាននៅក្នុងតំបន់ដែលមានគ្រាប់បែកគីមីរបស់សហរដ្ឋអាមេរិក បានលើកឡើងថា ក្រសួងបានយកចិត្តទុកដាក់លើសុខទុក្ខប្រជាពលរដ្ឋទូទៅ ជាពិសេសប្រជាពលរដ្ឋរស់នៅក្នុងក្នុងតំបន់ដែលមានគ្រាប់បែកគីមីរបស់សហរដ្ឋអាមេរិក បន្សល់ទុកពីសម័យសង្គ្រាម ។ ក្រុមការងាររបស់ក្រសួងសុខាភិបាល បានចុះពិនិត្យនិងស្រាវជ្រាវរកផលប៉ះពាល់ដល់សុខភាពប្រជាពលរដ្ឋ ហើយនរកឃើញករណីជំងឺមិនប្រក្រតីមួយចំនួននៅឃុំគគីរ ស្រុករមាសហែក ខេត្តស្វាយរៀង ដែលមានដូចជា សភាពជំងឺមិនប្រក្រតីរួមមាន មាត់វៀច ក្បាលធំ និងជំងឺស្បែក ។ ចាប់ពីថ្ងៃទី៥ដល់ថ្ងៃទី១៩ ខែតុលា ឆ្នាំ២០១៧ មន្ទីរពេទ្យគន្ធបុប្ផា បានទទួលយកអ្នកជំងឺជាកុមារចំនួន៣នាក់ និងមន្ទីរពេទ្យបង្អែកខេត្តស្វាយរៀង បានទទួលអ្នកជំងឺចំនួន២៩នាក់ ដែលពាក់ព័ន្ធខ្លាំងទៅនឹងការប៉ះពាល់ពីសារធាតុគីមី ដែលជាសំណល់គ្រប់បែករបស់សហរដ្ឋអាមេរិក ។
លោករដ្ឋមន្ត្រី ម៉ម ប៊ុនហេង ធ្លាប់បានថ្លែងថា គួរឱ្យសង្វេគណាស់ដែលកុមារ៣នាក់ទទួលរងទុក្ខវេទនាដូច្នេះ ដោយពួកគេពុំទាន់បានធ្វើអ្វីខុសសោះ ។ តើអ្នកណាជាអ្នកទទួលខុសត្រូវលើសោកនាកម្មនេះ ? ក្រសួងសុខាភិបាល បានធ្វើការណែនាំដល់ប្រជាពលរដ្ឋដែលរស់នៅក្នុងទីតាំងមានគ្រាប់បែកគីមីរបស់សហរដ្ឋអាមេរិកបន្សល់ទុកយ៉ាងរាយប៉ាយ ដូចខាងក្រោមនេះ ៖
១-ត្រូវនៅឲ្យឆ្ងាយពីគ្រាប់បែកគីមីតាមការណែនាំរបស់មន្ត្រីជំនាញ
២-ត្រូវណែនាំកូនចៅ មិនត្រូវរើសយកគ្រាប់បែកគីមីមកលេងឡើយ
៣-បើមានសញ្ញាខុសប្រក្រតី ឬកុមារកើតមកមានរូបរាងខុសប្រក្រតី ត្រូវទៅមណ្ឌលសុខភាពឬមន្ទីរពេទ្យដែលនៅជិត ដើម្បីត្រួតពិនិត្យសុខភាព និងទទួលការព្យាបាលជាបន្ទាន់ដោយមិនគិតថ្លៃ ៕
ចែករំលែកព័តមាននេះ