ខេត្តកំពង់ធំ ៖ ករណីឃាតកម្មនេះបានកើតឡើងកាលពីវេលាម៉ោង០៩នឹង២៣នាទីយប់ ថ្ងៃទី២០ ខែតុលា ឆ្នាំ២០១៧ ស្ថិតនៅចំណុចអូរសាជូ ក្នុងភូមិសាស្ត្រភូមិដងក្តា ឃុំក្រយា ស្រុកសន្ទុក ខេត្តកំពង់ធំ ។
លោកឧត្តមសេនីយ៍ត្រី កែ ខានណារ៉ា ស្នងការរងនគរបាលខេត្តទទួលខាងព្រហ្មទណ្ឌបានប្រាប់ កោះសន្តិភាព ឲ្យដឹងនៅព្រឹកថ្ងៃទី២១ ខែតុលា ថាបើយោងតាមការចុះស្រាវជ្រាវរបស់លោកអាចធ្វើការសន្និដ្ឋានជាជំហានដំបូងថា ក្រុមជនសង្ស័យមានគ្នាប្រហែលជាពីរ ឬបីនាក់បានពួនស្ទាក់ផ្លូវបាញ់សម្លាប់ជនរងគ្រោះពីរនាក់ប្តីប្រពន្ធនៅចំណុចកើតហេតុខាងលើសង្ស័យរឿងគំនុំ ។
ជនរងគ្រោះជាប្រពន្ធឈ្មោះ លី ចាន់ធឿន អាយុ៣៨ឆ្នាំ ត្រូវបានឃាតករបាញ់សម្លាប់នៅក្នុងរថយន្តរបស់ខ្លួនម៉ាកហាយឡែនឌ័រ ពណ៍ទឹកប្រាក់ ពាក់ស្លាកលេខ ភ្នំពេញ ២B-៥៤៤៤ ចំណែកបុរសជាប្តីឈ្មោះ សឿន ប្រុញ អាយុ៤១ឆ្នាំ អ្នកទាំងពីរនាក់ប្តីប្រពន្ធមានស្រុកកំណើតរស់នៅភូមិក្រែក ឃុំក្រែក ស្រុកពញាក្រែក ខេត្តត្បូងឃ្មុំ បច្ចុប្បន្នមកស្នាក់នៅបណ្តោះអាសន្ននៅក្នុងភូមិ-ឃុំកើតហេតុខាងលើ ដោយសារតែជនរងគ្រោះមានចំការកៅស៊ូជាច្រើនហិកតានៅទីនោះ ។ ត្រូវបានឃាតករបាញ់សម្លាប់នៅខាងក្រៅរថយន្តមិនដឹងថាជនរងគ្រោះបំរុងចុះរត់ ឬមួយក៏ក្រុមឃាតករអូសដៃយកមកបាញ់សម្លាប់នៅខាងក្រៅរថយន្តនោះទេ បន្ទាប់ពីធ្វើសកម្មភាពបាញ់សម្លាប់រួចក្រុមឃាតករបានរត់គេចខ្លួនបាត់អស់សង្ស័យថា ជារឿងគំនុំ សមត្ថកិច្ចកំពុងតែដុតដៃដុតជើងស្រាវជ្រាវរកក្រុមឃាតករដើម្បីយកមកផ្តន្ទាទោសចំពោះមុខច្បាប់ ៕
ចែករំលែកព័តមាននេះ