រាជធានីភ្នំពេញ ៖ រថយន្តបែនដឹកដីមួយគ្រឿង បានបើកបរក្នុងល្បឿនលឿន ជ្រុលទៅបុកពីក្រោយម៉ូតូម៉ាក SUZUKI NEX មួយគ្រឿងពីក្រោយ ក្នុងខណៈពេលកំពុងបើកបរធ្វើដំណើរក្នុងទិសគ្នា បណ្តាលឲ្យស្ត្រីម្នាក់ដែលជាអ្នកជិះម៉ូតូនោះរងរបួសធ្ងន់ បន្ទាប់មកត្រូវបានរថយន្តសង្គ្រោះដឹកទៅកាន់មន្ទីរពេទ្យភ្លាមៗដែរ និងយុវជនម្នាក់ទៀតដែលជាអ្នករួមដំណើរ បានរងរបួសស្រាល ។ ក្រោយពេលកើតហេតុ រថយន្តបង្កមិនបានបើករត់នោះទេ គឺស្ថិតនៅកន្លែងកើតហេតុនោះ ប៉ុន្តែអ្នកបើកបរបានចុះរត់គេចខ្លួនទៅបាត់ដោយសុវត្ថិភាព ចោលរថយន្តនៅនឹងកន្លែង ត្រូវនគរបាលចុះទៅវាស់វែង នាំយករថយន្ត និងម៉ូតូទៅរក្សាទុករង់ចាំការដោះស្រាយគ្នានៅផ្នែកសណ្ដាប់ធ្នាប់ចរាចរណ៍ខណ្ឌពោធិ៍សែនជ័យ ។
ឧប្បត្តិហេតុគ្រោះថ្នាក់ចរាចរខាងលើនោះ បានកើតឡើងកាលពីវេលាម៉ោង១០និង៤០នាទីព្រឹក ថ្ងៃទី២១ ខែតុលា ឆ្នាំ២០១៧ នៅលើកំណាត់ផ្លូវបេតុង ស្ថិតនៅក្នុងភូមិគោកចំបក់ សង្កាត់ចោមចៅ១ ខណ្ឌពោធិ៍សែនជ័យ ។ ស្ត្រីដែលជាជនរងគ្រោះខាងលើឈ្មោះ ហេង រចនា អាយុជាង២០ឆ្នាំ ស្នាក់នៅក្នុងទួលពង្រ សង្កាត់ចោមចៅ១ ខណ្ឌពោធិ៍សែនជ័យ ។ ឬឯយុវជនដែលជាអ្នករួមដំណើររងរបួសស្រាល មិនត្រូវបានគេស្គាល់ឈ្មោះនោះទេ អ្នកទាំងពីរនាក់នោះជិះម៉ូតូមួយគ្រឿងម៉ាក SUZUKI NEX ពណ៌ក្រហម ពាក់ស្លាកលេខ ភ្នំពេញ ១CF-៦៨៥២ ចំណែករថយន្តបង្កចង្កូតស្ដាំ ពណ៌ស ពាក់ស្លាកលេខ ចង្កូតស្ដាំ PP-២៥២២ បើកបរដោយជនស្ទាវមិនស្គាល់ឈ្មោះម្នាក់ បានរត់គេចខ្លួនបាត់ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ ជនរងគ្រោះទាំង២នាក់ បានជិះម៉ូតូឌុបគ្នាធ្វើដំណើរក្នុងទិសដៅពីជើងទៅត្បូង លុះពេលទៅដល់ត្រង់ចំណុចកើតហេតុ ស្រាប់តែមានរថយន្តបែនដឹកដីបង្កហេតុខាងលើ បើកបរក្នុងល្បឿនលឿន ក្នុងទិសដៅស្របគ្នាបុកពីក្រោយពេញទំហឹង និងកិនបណ្តាលឲ្យស្ត្រីរងគ្រោះដែលជាអ្នកជិះម៉ូតូរងរបួសត្រង់ជើងខាងឆ្វេង ចំណែកយុវជនដែលជាអ្នករួមដំណើររបួសស្រាល ។ ក្រោយកើតហេតុ ជនរងគ្រោះដែលរងរបួសធ្ងន់ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ ឬឯអ្នកបើកបររថយន្តបង្កបានគេចខ្លួនបាត់ បន្ទាប់មកនគរបាលចរាចរណ៍ខណ្ឌពោធិ៍សែនជ័យ បានចុះទៅធ្វើការវាស់វែង និងនាំយករថយន្ត និងម៉ូតូ ទៅរក្សាទុករង់ចាំដោះស្រាយ ៕
ចែករំលែកព័តមាននេះ