រាជធានីភ្នំពេញ ៖ ទន្ទឹមនឹងពិធីបុណ្យអុំទូក អកអំបុក និងបណ្តែតប្រទីប ដែលឈានមកដល់ឆាប់ៗខាងមុខនេះអភិបាលខណ្ឌដូនពេញ បានសម្រុកដឹកនាំកម្លាំងចុះបាញ់ទឹកលាងសម្អាតតាមមាត់ច្រាំង-ទន្លេឲ្យមានសោភ័ណភាពអនាម័យ និងបរិស្ថានល្អ ។
លោក សុខ ពេញវុធ អភិបាលខណ្ឌដូនពេញបានឲ្យដឹងនៅព្រឹកថ្ងៃទី២១ ខែតុលា ឆ្នាំ២០១៧ ថា លោកបានបញ្ជារឲ្យកម្លាំងប្រជាការពារខណ្ឌ សម្រុកបន្តយុទ្ធនាការចុះបាញ់ទឹកលាងសម្អាតតាមមាត់ច្រាំង-ទន្លេ ចាប់ពីខាងមុខផ្សាររាត្រីរហូតដល់ខាងមុខព្រះបរមរាជវាំង ព្រមទាំងការរៀបចាំសណ្តាប់ធ្នាប់ ឲ្យមានរបៀបរៀបរយនៅជុំវិញព្រះបរមរាជវាំង ដើម្បីត្រៀមប្រារព្ធព្រះរាជពិធីបុណ្យអុំទូក អកអំបុក បណ្តែតប្រទីប និងសំពះព្រះខែ ដែលនឹងប្រព្រឹត្តទៅ នៅថ្ងៃទី២-៣-៤ ខែវិច្ឆិកា ឆ្នាំ២០១៧ ខាងមុខនេះ ។ លោកបញ្ជាក់ទៀតថា ក្រោយពីរដ្ឋបាលខណ្ឌ ធ្វើការបាញ់លាងសម្អាតអនាម័យ ដែលបន្សល់ពីក្លិនឆ្អេះឆ្អាបរួចមក ឃើញថានៅច្រាំងទន្លេ លាងហើយនោះពុំមានសំរាមនោះទេ ។
ដូច្នេះលោកអភិបាលក៏សូមសំណូមពរឲ្យបងប្អូនប្រជាពលរដ្ឋ ដែលមកលេងកម្សាន្តតាមមាត់ទន្លេពេលហូបចុក ត្រូវចេះវេចខ្ចប់ទុកដាក់សំរាមតាមធុងដែលមានស្រាប់ឲ្យបានត្រឹមត្រូវ ដើម្បីចូលរួមថែរក្សាបរិស្ថានអនាម័យទីក្រុងយើងឲ្យមានសោភ័ណ្ឌភាពល្អទាំងអស់គ្នា ៕
ចែករំលែកព័តមាននេះ