រាជធានីភ្នំពេញ ៖ បុរសវ័យកណ្តាលម្នាក់ មិនដឹងថាចេញពីផឹកស៊ីនៅកន្លែងណាទេ គឺបានបើករថយន្តមួយគ្រឿងរេចង្កូតជ្រុលទៅបុក នឹងក្បាលនាគពុះចែកផ្លូវ បណ្តាលឲ្យរថយន្តក្រឡាប់ផ្ងារជើងមួយចំហៀង ហេតុការណ៍កើតឡើងនៅវេលាម៉ោង១២និង២០នាទីរំលងអធ្រាត្រឈានចូលថ្ងៃទី២១ ខែតុលា ឆ្នាំ២០១៧ ចំនុចគល់ស្ពានស្ទឹងមានជ័យចាស់ ផ្លូវ២១៧ សង្កាត់ស្ទឹងមានជ័យ ខណ្ឌមានជ័យ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញ បុរសវ័យជាង៥០ឆ្នាំម្នាក់មិនដឹងថា ចេញពីផឹកវិញនៅកន្លែងណានោះទេ បើករថយន្ត ពណ៌ខ្មៅ ស្លាកលេខ ភ្នំពេញ ២AG-៤៩៨១ បានធ្វើដំណើរតាមផ្លូវ២១៧ ក្នុងទិសដៅពីលិចទៅកើតយ៉ាងលឿន ព្រមទាំងស្រវឹងទៀតផង ។ ខណៈដល់ចំនុចកើតហេតុ ក៏រេចង្កូតទៅខាងឆ្វេងដៃជ្រុលទៅបុក នឹងក្បាលនាគពុះចែកផ្លូវ ពេញទំហឹងបណ្តាលឲ្យរថយន្តក្រឡាប់ផ្ងារជើងមួយចំហៀង ហើយរថយន្តខូចខាតខ្ទេចផ្នែកខាងមុខចំហៀងខាងឆ្វេង និងបែកកញ្ចក់ខាងមុខ ព្រមទាំងហូរប្រេងម៉ាស៊ីនពាសពេញផ្លូវ តែសំណាងល្អមិនមានគ្រោះថ្នាក់ដល់អ្នកបើក ។ ចំណែកទ្រូងផ្លូវវិញរងការខូចខាត និងខូចទ្រង់ទ្រាយដើមបន្តិច ។
អ្នកបើកបររថយន្តបានឲ្យដឹងថា រូបគាត់បានបើករថយន្តខាងលើធ្វើដំណើរតាមផ្លូវ២៧១ ខណៈមកដល់ចំនុចខាងលើក៏បានគេចនឹងរថយន្តមួយគ្រឿងទៀត ដែលបើកបញ្ច្រាស់ទិសដៅចរាចរណ៍ទើបរថយន្តរបស់គាត់ជ្រុលទៅបុកនឹងទ្រូងផ្លូវតែម្តងទៅ ។
ក្រោយពេលកើតហេតុ រថយន្តត្រូវបានសមត្ថកិច្ចជំនាញ បានមកស្ទូចយករថយន្តទៅរក្សាទុកនៅការរិយាល័យចរាចរណ៍ជើងគោករាជធានីភ្នំពេញដើម្បីរង់ចាំធ្វើការដោះស្រាយ ៕
ចែករំលែកព័តមាននេះ