ខេត្តកណ្តាល ៖ រថយន្តធុនយក្សភ្លៅប្រាំមានបិទអក្សរកងដឹកជញ្ជូន និងមានបិទឡូហ្គោ “M70” ដែលដឹកទំនិញលើសចំណុះ ហើយបើកបរបញ្ច្រាសទិសផ្លូវចម្ងាយរាប់រយម៉ែត្រថែមទៀត ត្រូវបានសមត្ថកិច្ចប៉ូលិសក្រុងតាខ្មៅ និងមន្ត្រីសាធារណការចាប់ឃាត់កាលពីវេលាម៉ោង៩និង១៥នាទីព្រឹក ថ្ងៃទី២៤ មីនា ខណៈរថយន្តនោះបើកឆ្លងស្ពានថ្មព្រែកត្នោតបញ្ច្រាស ។ រថយន្តខាងលើម៉ាកនីស្សាន់ក្បាលពណ៌ប្រផេះ ទ្រុងពណ៌ខៀវ ជាប្រភេទរថយន្តយីឌុបភ្លៅប្រាំផ្ទុកស្ករសពេញនៅលើរថយន្ត មានបិទ ឡូហ្គោ “M70” សរសេរអក្សរ «រថយន្តកងដឹកជញ្ជូន» ពាក់ស្លាកលេខ ក្រ-ប៉ៃលិន 3A-0116 បើកបរដោយជនម្នាក់មិនស្គាល់ឈ្មោះ ព្រោះក្រោយពីសមត្ថកិច្ចឃាត់អ្នកបើកបរបានគេចខ្លួនបាត់ ។
មន្ត្រីប៉ូលិសចរាចរក្រុងតាខ្មៅ បានឱ្យដឹងថា ក្រោយពីឃាត់រថយន្តខាងលើនាំយកមកកាន់អធិការដ្ឋាន ប៉ូលិសក្រុងបានសហការជាមួយអាជ្ញាធរក្រុង និងមានការចូលរួមពីមន្ត្រីសាធារណការនិងដឹកជញ្ជូនខេត្ត ធ្វើការវាស់វែង និងថ្លឹងរថយន្តឃើញថា រថយន្តនោះមានប្រវែងបណ្តោយ១២ម៉ែត្រ ជាប្រភេទរថយន្តយីឌុបភ្លៅប្រាំមានទម្ងន់សរុប៤៤តោន គឺលើសពីការកំណត់៩តោន ដែលការកំណត់ឱ្យត្រឹមតែទម្ងន់៣៥តោនប៉ុណ្ណោះ ។ រថយន្តខាងលើត្រូវបានសមត្ថកិច្ចធ្វើការវាយតម្លៃ និងផាកពិន័យតាមច្បាប់ គឺចំនួន២លាន៩សែនរៀល ប៉ុន្តែនៅ ព្រឹកដដែលនោះខាងតំណាងរបស់ម្ចាស់រថយន្តមិនទាន់ចូលខ្លួនមកធ្វើការដោះស្រាយជាមួយសមត្ថកិច្ចជំនាញនៅឡើយទេ ។
មន្ត្រីប៉ូលិសបានឱ្យដឹងទៀតថា នៅវេលាម៉ោងប្រហែល៩ព្រឹក ថ្ងៃទី២៤ មីនា រថយន្តខាងលើ បើកបរលើផ្លូវជាតិលេខ២ពីត្បូងមកជើង លុះមកដល់រង្វង់មូលតាខ្មៅ ក៏បើកតាមផ្លូវបញ្ច្រាសទិស ពេលនោះប៉ូលិសចរាចរនៅតាមគោលដៅបានហៅឱ្យឈប់ប៉ុន្តែមិនព្រមឈប់ ហើយបើកបន្តឆ្លងស្ពានព្រែកត្នោតផុត ទើបប៉ូលិសប្រចាំគោលដៅស្ទាក់ចាប់បាន ។ មុនពេលស្ទាក់ចាប់បាន អ្នកបើកបររថយន្តបានព្យាយាមបើករត់ ប៉ុន្តែរថយន្តធំពេកមិនអាចរត់រួច។ មន្ត្រីប៉ូលិសបានឱ្យដឹងទៀតថា ពេលបើកបររថយន្តនោះមិនមានពាក់ស្លាកលេខទេ លុះពេលប៉ូលិសចាប់បានទើបយកស្លាកលេខទៅបំពាក់ ។
គេមានការកត់សំគាល់ថា កាលពីមុនគេធ្លាប់ឃើញរថយន្តដែលមានបិទតែមឡូហ្គោ “M70” ជារថយន្តមានបាញ់ថ្នាំពណ៌ត្រេអ៊ី និងបិទអក្សរថា រថយន្តកងដឹកជញ្ជូន ប៉ុន្តែពេលនេះរថយន្តបិទឡូហ្គោដដែល ទើបតែបាញ់ថ្នាំថ្មីសន្លាងក្បាលពណ៌ប្រផេះ និងទ្រុងពណ៌ខៀវ ទៅវិញ ទំនងជាទើបតែបាញ់ថ្នាំថ្មី បន្ទាប់ពីសម្តេចតេជោ ហ៊ុន សែន បានព្រមានខ្លាំងៗមិនអនុញ្ញាតឱ្យមានរថយន្តពណ៌ត្រេអ៊ី ដឹកទំនិញ កាលពីពេលថ្មីៗនេះ៕
ចែករំលែកព័តមាននេះ