រាជធានីភ្នំពេញ ៖ រថយន្តធុនធ្ងន់ដឹកសំពីងសំពោងលើសចំណុះ និងពុំមានឯកសារគ្រប់គ្រាន់ចំនួន១២គ្រឿង ត្រូវបានគណៈបញ្ជាការឯកភាពខណ្ឌប្ញស្សីកែវ ចុះត្រួតពិនិត្យអនុវត្តន៍ច្បាប់ចរាចរណ៍ និងត្រួតពិនិត្យអាវុធជាតិ
ផ្ទុះ ឃាត់បញ្ជូនទៅកាន់សាលាខណ្ឌ កាលពីយប់ថ្ងៃទី១៦ មីនា ២០១១ ។ ការត្រួតពិនិត្យនេះធ្វើឡើងនៅលើកំណាត់ផ្លូវជាតិលេខ៥ គល់ស្ពានព្រែកព្នៅ ក្នុងសង្កាត់ ស្វាយប៉ាក វេលាម៉ោង៧ និង៣០នាទី រហូតដល់ម៉ោង១០យប់ ថ្ងៃទី១៦មីនា ក្រោមការដឹកនាំផ្ទាល់ពីលោកឃ្លាំង ហួត ជំនួយការសម្តេចអគ្គមហាសេនាបតីតេជោ ហ៊ុន សែន និងជាអភិបាលខណ្ឌប្ញស្សីកែវ ព្រមទាំងមានការចូលរួមពីលោកកូប ស្លេះ និងលោកនុត ពុធដារ៉ា អភិបាលរងខណ្ឌប្ញស្សីកែវផងដែរ ។
អ្វីដែលធ្វើឱ្យមានការចាប់អារម្មណ៍នៅក្នុងចំណោមរថយន្តទាំង១២គ្រឿងដែលចាប់ឃាត់នោះ គឺមានរថយន្តម៉ាក FUSO ពណ៌ស្លឹកឈើ មួយគ្រឿង ជារថយន្តកងដឹកជញ្ជូន H.C ពាក់ស្លាកលេខ តាកែវ 3A-0630 តែស្លាកលេខនោះត្រូវគេដោះទុក ដល់ពេលសមត្ថកិច្ចចំរុះចាប់ឃាត់ទើបអ្នកបើកបរម្នីម្នាយកស្លាកលេខនោះមកពាក់វិញ ។ តាមលោកកូប ស្លេះ អភិបាលរងខណ្ឌប្ញស្សីកែវ បានឱ្យដឹងថា រថយន្តដឹកសំពីងសំពោង និងគ្មានឯកសារគ្រប់គ្រាន់ចំនួន១២គ្រឿងនេះត្រូវបានគណៈបញ្ជាការឯកភាពខណ្ឌប្ញស្សីកែវចាប់ឃាត់បញ្ជូនទៅកាន់សាលាខណ្ឌដើម្បីធ្វើការផាកពិន័យ និងចាត់ការតាមច្បាប់។
តាមការពិនិត្យរថយន្តទាំង១២គ្រឿងគឺសុទ្ធសឹងតែដឹកធ្ងន់សំពីងសំពោង ហើយពុំមានឯកសារគ្រប់គ្រាន់ឡើយ ។ ទោះបីជាយ៉ាងណា លោកកូប ស្លេះ អភិបាលរងខណ្ឌឱ្យដឹងថា លោកនឹងបង្កើតគណៈកម្មការពិសេសមួយចុះត្រួតពិនិត្យនិងវាស់វែងពីលក្ខណៈបច្ចេកទេស របស់រថយន្តនីមួយៗឈានទៅចាត់ការតាមច្បាប់ ។ លោកឃ្លាំង ហួត បានឱ្យដឹងថា ការចុះត្រួតពិនិត្យការអនុវត្តន៍ច្បាប់ចរាចរណ៍នេះធ្វើឡើងតាមការណែនាំពីសម្តេចអគ្គមហាសេនាបតីតេជោ ហ៊ុន សែន ដើម្បីលុបបំបាត់រថយន្តដឹកធ្ងន់លើសចំណុះ បំផ្លាញផ្លូវសាធារណៈ និងតែងតែបង្កគ្រោះថ្នាក់ចរាចរណ៍ ខូចខាតទ្រព្យសម្បត្តិរដ្ឋ រងរបួស និងស្លាប់ដល់ប្រជាពលរដ្ឋ៕
ចែករំលែកព័តមាននេះ