រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់សាលាក្តីខ្មែរក្រហមចេញផ្សាយកាលពីថ្ងៃទី២២ មីនា ២០១១ ដែលកោះសន្តិភាពបានទទួលឱ្យដឹងថា មន្ត្រីផ្នែកកិច្ចការសាធារណៈរបស់សាលាក្តីនឹងរៀបចំធ្វើសន្និសីទកាសែតមួយនៅថ្ងៃទី២៥ មីនា ២០១១ វេលាម៉ោង១០និង៣០នាទីព្រឹកពាក់ព័ន្ធនឹងសវនាការជាសាធារណៈលើបណ្តឹងសាទុក្ខសំណុំរឿង០០១ ប្រឆាំងនឹងឌុច អតីតប្រធានគុកទួលស្លែង ។
សាលាក្តីបន្តថា សន្និសីទនេះនឹងប្រព្រឹត្តទៅនៅឯសាលាក្តីខ្មែរក្រហមបន្ទប់លេខ១០៧ នៃអគាររដ្ឋបាលសាលាក្តីស្ថិតនៅតាមបណ្តោយផ្លូវជាតិលេខ៤ ក្នុងសង្កាត់ចោមចៅ ខណ្ឌដង្កោ រាជធានីភ្នំពេញ ។ តំណាងសារព័ត៌មានគួរទៅដល់សាលាក្តីមុនម៉ោង១០ព្រឹក ភ្ជាប់មកជាមួយនូវប័ណ្ណគាល់ខ្លួន ។
សាលាក្តីបន្តថា ការផ្តល់សិទ្ធិដល់អ្នកសារព័ត៌មានក្នុងការចូលរួមសវនាការបណ្តឹងឧទ្ធរណ៍របស់ឌុច ជាសាធារណៈដែលគ្រោងធ្វើពីថ្ងៃទី២៨ ដល់ថ្ងៃទី៣០ មីនា ២០១១ ត្រូវតែចុះឈ្មោះនឹងសុំប័ណ្ណព័ត៌មានជាមុន ។ មានកៅអីចំនួន៣០ត្រៀមសម្រាប់អ្នកសារព័ត៌មាននៅក្នុងសាលសវនាការនៃសាលាក្តី ហើយអាទិភាពត្រូវបានផ្តល់ជូនទៅសារព័ត៌មានផ្នែកបោះពុម្ព ៕
ចែករំលែកព័តមាននេះ