ក្រុងប៉ោយប៉ែត ៖ រថយន្តដឹកទំនិញហួសចំណុះនិងខ្ពស់ខុសប្រក្រតីមួយគ្រឿង បានក្រឡាប់ចាក់ទំនិញចោលកណ្តាលផ្លូវនៅចំណុចផ្លូវបំបែកជាបីនៃព្រំប្រទល់ភូមិពីរ គឺភូមិបាលិលេយ្យនិងភូមិក្បាលស្ពាន សង្កាត់ប៉ោយប៉ែត កាលពីវេលាម៉ោង២រសៀល ថ្ងៃទី១៣ ធ្នូ ។ រថយន្តដែលក្រឡាប់ចាក់ទំនិញចោលនេះ ជាប្រភេទរថយន្តកូរ៉េ ពណ៌ខៀវ ចង្កូតស្តាំ ពាក់ស្លាកលេខបន្ទាយមានជ័យ 3A-0329 ហើយការក្រឡាប់នេះដែរ ក៏ពុំមានពាក់ព័ន្ធទៅនឹងការបុក ឬប៉ះទង្គិចជាមួយអ្វីឡើយ តែអ្នកស្រុកនិយាយថា ដោយសារដឹកខ្ពស់ហួសហេតុពេក ។
ទោះបីពុំបង្កឱ្យមានគ្រោះថ្នាក់ទៅលើអ្នកដទៃណាម្នាក់ក៏ពិតមែន ប៉ុន្តែកម្មករម្នាក់បានសន្លប់ ខណៈពេលរថយន្តផ្អៀងប្រុងក្រឡាប់ក៏លោតមកមុន ហើយត្រូវបានក្រុមកម្មកររួមការងារនាំទៅកាន់គ្លីនិកដែលនៅក្បែរនោះ ។ ក្រោយហេតុការណ៍កើតឡើង ម្ចាស់ទំនិញបានយករថយន្តមួយគ្រឿងផ្សេងទៀត មកអូសទាញឱ្យរថយន្តក្រឡាប់នេះងើបឈរវិញ ។ នេះជាសំណាងល្អមួយដែរ ព្រោះប្រសិនបើក្រឡាប់កណ្តាលផ្លូវជាតិវិញ ប្រាកដជាវីវរធំហើយស្រួលមិនស្រួលអាចប៉ះពាល់ដល់អ្នកទេសចរបរទេសផងក៏ថាបាន ។
បច្ចុប្បន្ន គេសង្កេតរថយន្តដែលដឹកទំនិញចេញពីកន្លែងស្តុកយកទៅដាក់បំបែកដឹកតាមរទេះចូលទៅក្នុងទឹកដីថៃ គឺជាទំនិញចំរុះសព្វសាររពើ ហើយការដឹកជញ្ជូនទំនិញនានា មើលទៅគួរឱ្យខ្លាច ព្រោះដឹកខ្ពស់ជាងរថយន្តទៅទៀត ។ មានការលើកឡើងថា ចំពោះការដឹកបែបនេះ បើសមត្ថកិច្ចមិនមានវិធានការទេ ប្រាកដជាថ្ងៃណាមួយអាចមានគ្រោះថ្នាក់ដល់ភ្ញៀវទេសចរជាមិនខាន ៕
ចែករំលែកព័តមាននេះ