ប្រទេសអូម៉ង់កាលពីថ្ងៃទី៥ មីនា បានផ្លាស់ប្តូររដ្ឋមន្ត្រី២រូបក្រោយចលាចលនាពេលថ្មីៗនេះក្នុងប្រទេសនោះមក។ ប្រទេសអូម៉ង់ដែលតាមធម្មតាតែងមានភាពស្ងប់ស្ងាត់នោះទើបរងការបោកបក់នៃខ្យល់បដិវត្តន៍អារ៉ាប់។ ឧត្តមសេនីយ៍ស៊ុលតង់ អ៊ីបន៍ម៉ូហាម៉េដ អាល់ណាអាម៉ានី ត្រូវបានតែងតាំងជារដ្ឋមន្ត្រីព្រះបរមរាជវាំងជាតំណែងមួយទទួលបន្ទុកខាងសន្តិសុខដោយជំនួសឧត្តមសេនីយ៍អាលី អ៊ីបន៍ម៉ាដជីដ ហើយលោកហ៊ីឡាល់ អាល់ប៊ុសសៃអ៊ីឌី ក្លាយជារដ្ឋមន្ត្រីខុទ្ទកាល័យព្រះមហាក្សត្រជំនួសលោកអាលីអ៊ីបន៍ហាមូដ។
មនុស្សប្រមាណជា២០០នាក់បានបន្តធ្វើបាតុកម្មកាលពីថ្ងៃទី៥ មីនា រយៈពេល៧ថ្ងៃ
ជាប់ៗគ្នា ហើយនៅមុខទីស្នាក់ការរបស់ CHOURA ជាក្រុមប្រឹក្សាពិគ្រោះយោបល់របស់អូម៉ង់។ បាតុកម្មទ្រង់ទ្រាយតូចនានាក៏កើតមានដែរនៅទីក្រុងសាឡាហ៍ជាទីក្រុងសំខាន់នៅភាគខាងត្បូងប្រទេសនៅទីក្រុង SOUR និងនៅទីក្រុង SOHRAR ជាទីក្រុងកំពង់ផែមួយនៅភាគខាងជើងប្រទេស ដែលនៅទីនោះមនុស្ស៦នាក់បានត្រូវស្លាប់កាលពីថ្ងៃទី២៧ កុម្ភៈកន្លងមកនេះក្នុងឱកាសនៃការប៉ះទង្គិចគ្នាជាមួយកងកម្លាំងសន្តិសុខ។ ដើម្បីធ្វើឱ្យមានភាពស្ងប់ស្ងាត់វិញក្នុងប្រទេសព្រះចៅកាប៊ូសសន្យាបង្កើតការងារចំនួន៥០.០០០ ផ្តល់ប្រាក់ប្រចាំខែ៣៩០ដុល្លារក្នុងម្នាក់ដល់ពួកអ្នកអត់ការងារធ្វើ ហើយពង្រីកអំណាចរបស់CHOURA ។
ប្រទេសអូម៉ង់ដែលគណបក្សនយោបាយទាំងឡាយត្រូវហាមឃាត់គឺជាសម្ព័ន្ធមិត្តយោធា និងនយោបាយគន្លឹះមួយរបស់ក្រុងវ៉ាសីុនតោនក្នុងតំបន់ ៕
ចែករំលែកព័តមាននេះ