រាជធានីភ្នំពេញ ៖ បុរសម្នាក់ដោយសារតែចង់បានល្បីឈ្មោះខ្លាំងពេកពេក បានស្ពាយបដារមួយផ្ទាំងធំដែលមានសរសេរពាក្យថា «ជូនពរសម្តេច ហ៊ុន សែន អាយុ៥០០ឆ្នាំ» ដើរតាមផ្លូវសារធារណៈនៅគ្រប់ទិសទីនៅក្នុងរាជធានីភ្នំពេញនាពេលកន្លងមកនោះនៅពេលនេះដែររុបគាត់ត្រូវបានកម្លាំងមានសម្ថកិច្ចចាប់ឃាត់ខ្លួនហើយ ។ ការចាប់ឃាត់ខ្លួននេះដែរបានធ្វើឡើងកាលពីវេលាម៉ោង១២និង៤៥នាទីថ្ងៃត្រង់ ថ្ងៃទី១៤ ខែកញ្ញា ឆ្នាំ២០១៧ នៅចំណុចខាងមុខអង្គភាពប្រឆាំងអំពើរពុករលួយ ផ្លូវព្រះនរោត្តម ក្នុងសង្កាត់ជ័យជំនះ ខណ្ឌដូនពេញ ។
តាមប្រភពព័ត៌មានពីនគរបាលបានប្រាប់ឱ្យដឹងថា បុរសម្នាក់ដែលឃាត់ខ្លួនមានឈ្មោះ ងួន រ៉ាដា អាយុ៣៤ឆ្នាំ មុខរបរម្ចាស់យានដ្ឋានជួសជុលរថយន្តយីហោ «ប្រាយឌែន ការ៉ាស់» មានទីលំនៅផ្ទះលេខ៨៨៦ ផ្លូវលេខ៣៦៩ ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ ។ មុនពេលកើតហេតុកម្លាំងសមត្ថកិច្ចបានឃើញបុរសម្នាក់ខាងលើដើរស្ពាយបដារដ៏ធំមួយដែលសរសេរពាក្សថា «ជូនពរសម្តេច ហ៊ុន សែន អាយុ៥០០ឆ្នាំ» ដើរតាមផ្លូវដោយមានការងឿងឆ្ងល់ក៏ឃាត់ខ្លួនធ្វើការសួរនាំតែម្តង ។
តាមប្រភពដែលបានប្រាប់បន្តទៀតថា ការស្ពាយបដារដែលមានសរសេរពាក្យថា «ជូនពរសម្តេច ហ៊ុន សែន អាយុ៥០០ឆ្នាំ» គឺធ្វើឡើងដោយសារតែរូបគាត់ចង់ល្បីឈ្មោះខ្លាំងប៉ុណ្ណោះ ដោយក្នុងរយៈពេលជិតមួយខែនេះរូបគាត់តែងតែស្ពាយបដារខាងលើតាមមធ្យោបាយដោយជិះម៉ូតូ ជិះកង់ និងដើរដោយថ្មើរជើងក៏មានទៅតាមផ្លូវសារធារណៈគ្រប់ទិសទីនៅក្នុងរាជធានីភ្នំពេញ មិនតែប៉ុណ្ណោះក៏ធ្វើឱ្យមានការភ្ញាក់ផ្អើលទៅដល់ប្រជាពលរដ្ឋជាច្រើននៅតាមដងផ្លូវមានការចាប់អារម្មណ៍ និងនាំគ្នាថតបង្ហោះលើបណ្តាញសង្គមហ្វេសប៊ុកផ្ទាល់ខ្លួនផងដែរ ។
ប្រភពដដែលក៏បានប្រាប់បន្តទៀតថា ហេតុតែចង់ល្បីឈ្មោះខ្លាំងនោះបុរសម្នាក់នេះក៏ធ្លាប់បានធ្វើរឿងប្លែកៗមួយចំនួនផងដែរនៅឯស្រុករបស់គាត់ ដោយធ្លាប់ធ្វើទូក និងជីកស្រះទឹកក្បាលប្រវែង១២ម៉ែត្រ និងបណ្តោយប្រវែង២៥ម៉ែត្រតែម្នាក់ឯងក្នុងរយៈពេល២ឆ្នាំម្តងរួចមកហើយ ដោយធ្វើឱ្យអ្នកស្រុកមានការកោតសសើរយ៉ាងខ្លាំងផងដែរ និងលើកនេះដែរក៏រូបគាត់នៅចង់ល្បីបន្ថែមទៀតក៏ធ្វើបដារដោយមានសរសេរពាក្យថា «ជូនពរសម្តេច ហ៊ុន សែន អាយុ៥០០ឆ្នាំ» ដើរតាមផ្លូវក៏ត្រូវបានកម្លាំងសមត្ថកិច្ចធ្វើការឃាត់ខ្លួនតែម្តង ។ ក្រោយពេលឃាត់ខ្លួន និងសាកសួរដឹងមូលហេតុរួចហើយសមត្ថកិច្ចក៏បានធ្វើការដកហូតបរដាមួយផ្ទាំងនោះទុក និងធ្វើការណែនាំធ្វើកិច្ចសន្យា រួចឱ្យក្រុមគ្រួសារមកធ្វើការធានាយកត្រឡប់ទៅផ្ទះវិញផងដែរ ៕
ចែករំលែកព័តមាននេះ