ខេត្តក្រចេះ ៖ ដើម្បីលើកកម្ពស់សណ្តាប់ធ្នាប់ និងសុវត្ថិភាពចរាចរណ៍លើគ្រប់មធ្យោបាយ ទាំងផ្លូវគោក និងផ្លូវទឹក ក្នុងឱកាសនៃពិធីកាន់បិណ្ឌ និងភ្ជុំបិណ្ឌ នគរបាលចរាចរណ៍ និងសណ្តាប់ធ្នាប់ បានអនុវត្តលើទិសដៅផែនការជាច្រើនចំណុច ហើយផែនការសកម្មភាពទាំងនោះ ក៏កំពុងតែត្រូវអនុវត្តជាប្រចាំផងដែរ ។
ស្នងការរងទទួលបន្ទុកសណ្តាប់ធ្នាប់ លោកឧត្តមសេនីយ៍ត្រី ហន ប៉ូច បានឲ្យដឹងថា នគរបាលជំនាញចរាចរណ៍ផ្លូវគោក បាននឹងកំពុងតែរឹតបន្តឹងសុវត្ថិភាពចរាចរណ៍ ដោយក្នុងបានសហការជាមួយមន្ទីរជំនាញពាក់ព័ន្ថ ចុះពិនិត្យរថយន្តឈ្នួលគ្រប់ប្រភេទ ដែលជាមធ្យបាយចាំបាច់សម្រាប់ដឹកជញ្ជូនអ្នកដំណើរនៅតាមគោលដៅដើមទី នៅគ្រប់ចំណតរថយន្តតាមស្រុក និងខេត្ត លើលក្ខណៈបច្ចេកទេសឲ្យបានត្រឹមត្រូវ មុននឹងអនុញ្ញាតឲ្យធ្វើដំណើរ ។
ក្រៅពីនោះ នគរបាលជំនាញចរាចរណ៍ បានរឹតបន្តឹងលើការប្រើប្រាស់ល្បឿន ក៏ដូចជាការបើកបរក្រោមឥទ្ធិពលជាតិស្រវឹងនៅពេលយប់ ។ ដែលសកម្មភាពនេះ បានអនុវត្តនៅតាមគោលដៅយុទ្ធសាស្ត្រមួយចំនួន ដែលកំណត់ដោយគណៈបញ្ជាការឯកភាពខេត្ត ។ លើសពីនោះ ក៏មានការចុះរៀបចំសណ្តាប់ធ្នាប់នៅតាមទីសាធារណៈ វត្តអារាម ក៏ដូចជាការចុះសម្រួលចរាចរណ៍ នៅតាមស្ពាន ថ្នល់ ដែលមានលក្ខណ៍តូចចង្អៀតផងដែរ ។
ដោយឡែកចំពោះស្ថានភាពចរាចរណ៍ផ្លូវទឹក ក៏ត្រូវបានលោកឧត្តមសេនីយ៍ត្រី ហន ប៉ូច បញ្ជាក់ថា ជាច្រើនលើកច្រើនសារ កម្លាំងនគរបាលចរាចរណ៍ផ្លូវទឹក សហការជាមួយ និងមន្ត្រីនៃមន្ទីសារធារណៈការ បានចុះពិនិត្យមើលជលចក្រយានយន្ត នៅតាមកំពងដចម្លងទាំង១១កន្លែង ទៅទូទាំងខេត្ត មិនថាតែនៅថ្ងៃធម្មតា ឬថ្ងៃមានបុណ្យទាននោះទេ ។
លោកឧត្តមសេនីយ៍ត្រីបញ្ជាក់ថា ក្នុងសកម្មភាពរបស់កម្លាំងនគរបាលជំនាញចរាចរណ៍ផ្លូវទឹក បានចុះទៅអប់រំណែនាំឲ្យម្ចាស់ជលចក្រយានយន្ត ឬក៏ម្ចាស់អាជីវកម្ម កំពង់ដចម្លង ពីវិធានការការពារសុវត្ថិភាពដល់អ្នកធ្វើដំណើរចៀសវាងកុំឲ្យមានបញ្ហាគ្រោះថ្នាក់ លើលក្ខណ៍បច្ចេកទេសជលចក្រយាន ដោយមានបំពាក់នូវសម្ភារសុវត្ថិភាពសង្គ្រោះដូចជា ពោង អាវពោង ព្រមទាំងបំពង់ពន្លត់អគ្គិភ័យ ពិសេសនោះគឺការផ្ទុកមិនឲ្យលើសចំណុះកំណត់ ។
លោកស្នងការរងបានលើកឡើងថា កន្លងមក បើទោះបីជាស្ថានភាព ការជិះឆ្លងរបស់ពលរដ្ឋធ្វើដំណើរតាមទូក សាឡាង នៅតាមកំពង់ដចម្លង នៅមិនធ្លាប់កើតមានគ្រោះថ្នាក់ណាមួយបែបណាក្តី តែអាជ្ញាធរនៅតែមានវិធានការចុះរឹតបន្តឹងលើសុវត្ថិភាពធ្វើដំណើរទៅមកជាបន្តបន្ទាប់ នៅគ្រប់អាជីវកម្មកំពង់ចម្លង ដើម្បីបង្ការនៅរាល់គ្រោះថ្នាក់ដែលកើតឡើងជាយថាហេតុណាមួយ ៕
ចែករំលែកព័តមាននេះ