រាជធានីភ្នំពេញ ៖ យុគសម័យបច្ចេកវិទ្យាទំនើបបច្ចុប្បន្ន មិនថាយុវវ័យ វ័យកណ្ដាល ឬវ័យចំណាស់នោះទេ តែងមានស្មាតហ្វូនកាន់ស្ទើរគ្រប់ដៃ ។ ទូរស័ព្ទទំនើបនេះពិតជាមានលក្ខណៈពិសេស ផ្ដល់អត្ថប្រយោជន៍ច្រើន…
រាជធានីភ្នំពេញ ៖ យុគសម័យបច្ចេកវិទ្យាទំនើបបច្ចុប្បន្ន មិនថាយុវវ័យ វ័យកណ្ដាល ឬវ័យចំណាស់នោះទេ តែងមានស្មាតហ្វូនកាន់ស្ទើរគ្រប់ដៃ ។ ទូរស័ព្ទទំនើបនេះពិតជាមានលក្ខណៈពិសេស ផ្ដល់អត្ថប្រយោជន៍ច្រើន និងជាជំនួយការដ៏ប៉ិនប្រសប់មួយ ប្រសិនបើអ្នកប្រើប្រាស់មានសមត្ថភាពគ្រប់គ្រាន់ ក៏ប៉ុន្ដែអ្នកខ្លះទិញយកមកប្រើក្នុងគោលដៅតិចតួចបំផុតដូចជា កម្សាន្ដ លេងហ្វេសប៊ុក ថតរូប និងទូរស័ព្ទរកគ្នាប៉ុណ្ណោះ ។ ចុះអ្នកវិញ ទិញ Smart Phone ប្រើក្នុងគោលដៅអ្វីខ្លះ ហើយពិតជាឆ្លាតដូច Smart Phone ដែរឬយ៉ាងណា ?
បើតាមអតីតនិស្សិតសាកលវិទ្យាល័យ AEU បានលើកឡើងថា ការសម្រេចទិញស្មាតហ្វូនមកប្រើនេះ ព្រោះវាផ្តល់អត្ថប្រយោជន៍ច្រើនសម្រាប់ការសិក្សា និងស្រាវជ្រាវផ្សេងៗ ដោយអាចឆែករកមើលឯកសារ អុីម៉ែល និងផ្ញើមេរៀនទៅមិត្តភក្តិទៅវិញទៅមកបានយ៉ាងងាយស្រួល ។ លើសពីនេះ នៅពេលចូលបម្រើការងារឃើញថា វាកាន់តែជួយសម្រួលការងារបានច្រើនបន្ថែមទៀត ក្រៅពីការទុកតែទូរស័ព្ទទាក់ទងគ្នា និងកម្សាន្ដអារម្មណ៍ផ្សេងៗ ។
កញ្ញា ចាន់ គិមស៊ីន បានឲ្យដឹងកាលពីថ្ងៃទី១៣ កញ្ញា ថា ៖« សម្រាប់ខ្ញុំ ការប្រើប្រាស់ Smart Phone ក្រៅពីជួយសម្រួលដល់ការងារសព្វថ្ងៃនេះ គឺប្រើសម្រាប់ស្រាវជ្រាវអ្វីដែលខ្ញុំចង់ដឹង ។ តួយ៉ាង ដូចរឿងប្រវត្តិសាស្ត្រ ខ្មែរ និងឱកាសការងារ ហើយក្រៅពីនេះ អាចទំនាក់ទំនងជាមួយបងប្អូននៅក្រៅប្រទេសផងដែរ » ។
កញ្ញាបន្តថា ៖« បន្ទាប់ពីប្រើទូរស័ព្ទ Smart Phone មួយរយៈចុងក្រោយនេះ វាបានផ្តល់ផលប្រយោជន៍ច្រើនគួរសម ធ្វើឱ្យយើងដឹងព័ត៌មាននៅក្នុងសង្គម និងក្រៅស្រុកបាន ។ យើងអាចមើលចម្រៀង រឿងថៃ ដែលអាចជួយឱ្យអារម្មណ៍ស្រស់ស្រាយឡើងវិញនៅពេលធុញធប់ម្តងម្កាល ។ ខុសប្លែកកាលពីមុន ខ្ញុំប្រើទូរស័ព្ទធម្មតាៗអត់ដឹងថា មានរឿងអ្វីកើតឡើងនៅក្នុងស្រុកទេ » ។
កញ្ញាបញ្ជាក់ថា ៖« ទូរស័ព្ទ Smart Phone គឺសំខាន់ ក្រោយពីបានប្រើតាំងពីដំបូងរហូតមកដល់ពេលនេះ ធ្វើឱ្យយើងយល់ដឹង ឬមានភាពឆ្លាតវៃប្រហែល៥០% បើធៀបនឹងមុនពេលមិនទាន់ប្រើ » ។
លោក បូ សល់ បុគ្គលិកក្រុមហ៊ុនឯកជនមួយផ្សេងទៀតបានឱ្យដឹងថា ការដែលលោកសម្រេចចិត្តទិញ Smart Phone យកមកប្រើ ដោយសារវាមានចំណុចល្អច្រើនយ៉ាងដូចជា មានកាមេរ៉ា ងាយស្រួលទាក់ទងជាមួយក្រុមការងារបានរហ័ស តាមរយៈ WhatsApp, Sky, Telegram, Line, Email, FaceBook និងបណ្ដាញសង្គមផ្សេងៗទៀតនៅពេលធ្វើការងារខាងក្រៅការិយាល័យ ។ លោកអាចស្តាប់បទចម្រៀង មើលវីដេអូ និងលេងហ្គេមនៅពេលមានអារម្មណ៍មិនសូវស្រស់ស្រាយម្តងម្កាល ។ លើសពីនេះ លោកក៏អាចរកផ្លូវ ឬទីតាំងតាមហ្គូហ្គលផងដែរ ។
លោកបន្តថា ៖« សម្រាប់អ្នកប្រើប្រាស់ Smart Phone ថ្មីដូចខ្ញុំអីចឹង វាជួយដល់ការងារបានប្រហែល៧០% បើធៀបទៅនឹងការប្រើទូរស័ព្ទណូគាអិនចុចពិលពីមុន គឺហត់ និងខ្ចីទូរស័ព្ទមិត្តភក្តិយកមកដោះស្រាយក្នុងការងារនៅពេលជួបបញ្ហាម្តងៗ » ។
អ្នកស្រី ហ៊ាន សូរ៉ាន់ដា បុគ្គលិកគ្រឹះស្ថានមីក្រូហិរញ្ញវត្ថុមួយមានប្រសាសន៍ថា ៖«មូលហេតុដែលខ្ញុំប្រើប្រាស់ស្មាតហ្វូន ព្រោះការទំនាក់ទំនងមានប្រសិទ្ធភាពជាងមុន, ផ្តល់ប្រសិទ្ធភាពការងារ, ចំណេះទូលំទូលាយ, ព័ត៌មានទាន់ហេតុការណ៍ និងទទួលការកម្សាន្ត » ។
អ្នកស្រីបន្តថា បន្ទាប់ពីប្រើប្រាស់ស្មាតហ្វូនមួយរយៈកាលកន្លងមកនេះ ធ្វើឱ្យអ្នកស្រីទទួលបាននូវព័ត៌មានទាន់ហេតុការណ៍ក្នុងប្រទេស គន្លឹះនៃការអភិវឌ្ឍខ្លួន លទ្ធផលប្រឡងបាក់ឌុប រឿងនយោបាយ ថ្លៃទំនិញ ហើយពិសេសជាងនេះ វាប្រៀបដូចជាជំនួយការ មិត្តភក្តិ គ្រូ និងកុំព្យូទ័រ ។ ទោះជាយ៉ាងណា អ្នកស្រីថា អ្នកប្រើប្រាស់ទូរស័ព្ទ Smart Phone មិនប្រាកដថាឆ្លាតទាំងអស់ទេ គឺទាមទារចំណាយពេលសាកល្បងវាឲ្យបានច្រើន ឬត្រូវការអ្នកដែលដឹងពីបច្ចេកទេសប្រើប្រាស់ ៕
ចែករំលែកព័តមាននេះ