រាជធានីភ្នំពេញ ៖ ជនសង្ស័យម្នាក់អត់លុយទិញបាយហូប បែកគំនិតលួចមួកសុវត្ថិភាព ត្រូវម្ចាស់តាមទាន់វាយបែកក្បាល បង្កឲ្យមានការភ្ញាក់ផ្អើលកាលពីវេលាម៉ោង១១និង៣០នាទីយប់ ថ្ងៃទី១៣ ខែកញ្ញា ឆ្នាំ២០១៧ តាមបណ្តោយផ្លូវ៩៣ នៅចំណុចមុខផ្ទះ៤៣៣ ស្ថិតនៅក្នុងសង្កាត់បឹងព្រលឹត ខណ្ឌ៧មករា ។
ជនសង្ស័យដែលឃាត់ខ្លួនបានមានឈ្មោះ ធី ប៉ិច ភេទប្រុស អាយុ២០ឆ្នាំ មុខរបរមិនពិតប្រាកដ ស្នាក់នៅម្តុំវត្តកោះ ។
តាមប្រភពពត៌មានពីសមត្ថកិច្ចបានឲ្យដឹងថា មុនពេលកើតហេតុ ម្ចាស់ផ្ទះលេខ៤៣៣ បានទុកម៉ូតូមួយគ្រឿងម៉ាក Zoomer-X ពណ៌ស ហើយបានទុកមួកសុវត្ដិភាពនៅជាប់ជាមួយនឹងម៉ូតូ រួចក៏ដើរចូលផ្ទះបានមួយសន្ទុះ ក្រោយមកក៏ស្រាប់តែមានជនសង្ស័យម្នាក់មានឈ្មោះដូចខាងលើ បានដើរមកពីវត្តកោះ រួចឆ្លៀតឱកាសម្ចាស់គេអត់នៅ ក៏ធ្វើសកម្មភាពលួចមួកសុវត្ថិភាព សំណាងអាក្រក់ត្រូវម្ចាស់ម៉ូតូមើលតាមកាម៉ារ៉ាសុវត្ថិភាពឃើញ ក៏ស្ទុះរត់ចេញមក ហើយស្រែកថាចោរៗ ទើបជនសង្ស័យដឹងខ្លួន ហើយរត់ចេញពីកន្លែងកើតហេតុឡើងទៅផ្លូវ២១៤កែងផ្លូវ១០៥ ក៏ត្រូវម្ចាស់គេចាប់បានរួមនិងប្រជាពលរដ្ឋនាំគ្នាខឹងខ្លាំងពេក ក៏វាយមួយដៃមួយជើង បណ្តាលឲ្យរងរបួសបែកក្បាល ទើបប្រគល់ឲ្យសមត្ថកិច្ចប៉ុស្តិ៍បឹងព្រលឹត យកទៅសួរនាំ ។
បើតាមសម្ដីរបស់ជនសង្ស័យឆ្លើយប្រាប់សមត្ថកិច្ចបានឲ្យដឹងថា មូលហេតុដែលខ្លួនបែកគំនិតលួចមួកសុវត្ថិភាព គឺមកពីខ្លួនអត់លុយទិញបាយហូប ទើបសម្រេចចិត្តធ្វើបែបនេះ ។ ក្រោយពេលកើតហេតុ ជនរងគ្រោះគាត់បានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបឹងព្រលឹត ដើម្បីឲ្យសមត្ថកិច្ចចាត់ការទៅតាមនីតិវិធី ៕
ចែករំលែកព័តមាននេះ