ខេត្តសៀមរាប ៖ កម្លាំងការិយាល័យប្រឆាំងគ្រឿងញៀនខេត្ត នាថ្ងៃទី១៣ ខែកញ្ញា ឆ្នាំ២០១៧ បានបញ្ជូនស្ត្រីបរទេសម្នាក់ ទៅសាលាដំបូងខេត្ត ដើម្បីចំណាត់ការទៅតាមនីតិវិធី ពាក់ព័ន្ធនឹងករណីរក្សាទុក និងដឹកជញ្ជូនដោយខុសច្បាប់នូវសារធាតុញៀន បន្ទាប់ពីឃាត់ខ្លួនបាននៅចំណុចអាកាសយានដ្ឋានអន្តរជាតិសៀមរាប កាលពីថ្ងៃទី0៩ ខែកញ្ញា ឆ្នាំ២០១៧ ដឹកនាំដោយលោកឧត្តមសេនីយ៍ត្រី អ៊ុំ អមរា ស្នងការរងនគរបាលខេត្តទទួលផែនប្រឆាំងបទល្មើស បានដឹកនាំកម្លាំងការិយាល័យប្រឆាំងគ្រឿងញៀន សហការជាមួយកម្លាំងការិយាល័យ (ក១) របស់មន្ទីប្រឆាំងគ្រឿងញៀន កម្លាំងគយ និងរដ្ឋាករ និងកម្លាំងអន្តោប្រវេសន៍ប្រចាំច្រកទ្វារព្រលានយន្តហោះអន្តរជាតិសៀមរាប ចុះបង្ក្រាបករណីរក្សាទុក និងដឹកជញ្ជូនដោយខុសច្បាប់នូវសារធាតុញៀន ។
តាមប្រភពពីមន្ត្រីគ្រឿងញៀនខេត្ត បានប្រាប់ថា ជនសង្ស័យមានឈ្មោះ FLORES GONZAILZ YOSREILYS KATERINE ភេទស្រី អាយុ២៧ឆ្នាំ ជនជាតិវេណេហ្សូអេឡា មុខរបរគណនេយ្យ មានទីលំនៅទីក្រុងការាកាស ប្រទេសវេណេហ្សូអេឡា ពាក់ព័ន្ធនឹងករណីរក្សាទុក និងដឹកជញ្ជូន ប៉ុន្តែគ្មានសារធាតុញៀនក្នុងខ្លួន ដោយកម្លាំងដកហូតវត្ថុតាងបានម្សៅកូកាអ៊ីន ចំនួន១០៤ដុំ ស្មើទំងន់១០៤៧,២២ក្រាម ទូរស័ព្ទដៃចំនួន១គ្រឿង លិខិតឆ្លងដែនចំនួន១ក្បាល ។
បច្ចុប្បន្ន ស្ត្រីបរទេសជាជនសង្ស័យ ត្រូវបានកម្លាំងជំនាញរៀបចំសំណុំរឿងបញ្ជូនទៅតុលាការខេត្តសៀមរាប នៅថ្ងៃទី១៣ ខែកញ្ញា ឆ្នាំ២០១៧ ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ