ខេត្តកំពង់ឆ្នាំង ៖ ជនសង្ស័យជាឃាតករសម្លាប់ស្ត្រីម្នាក់ច្រកក្នុងការ៉ុង រួចយកមកទម្លាក់ចោលនៅស្រុកកំពង់ត្រឡាច ពេលនេះចាប់បានហើយនៅខេត្តកំពតកាលពីរសៀលថ្ងៃទី១៣ ខែកញ្ញា ឆ្នាំ២០១៧ និងត្រូវនាំមកខ្លួនដល់ស្នងការដ្ឋានខេត្តកំពង់ឆ្នាំងនៅវេលាម៉ោង១២និង២០នាទីរំលងអធ្រាត្រឈានចូលថ្ងៃទី១៤ ខែកញ្ញានេះ។
មន្ត្រីនគរបាលឱ្យដឹងថា ជនសង្ស័យឈ្មោះ ប៉ាត ចន្ទវត្ថា អាយុ៣០ឆ្នាំ មានទីលំនៅភូមិពោធិ៍ ឃុំពោធិ៍ ស្រុកកំពង់លែង ខេត្តកំពង់ឆ្នាំង មុខរបរជាអ្នករត់តាក់ស៊ី និងកាន់កាតកាសែតមជ្ឈមណ្ឌល ឆាយាអង្គរ ។ ហើយរវាងជនសង្ស័យ និងស្ត្រីរងគ្រោះមានទំនាក់ទំនងគ្នារឿងរត់ការដោះលែងប្តីទី២របស់នាងចេញពីពន្ធនាគារ ដោយនាងបានប្រគល់ប្រាក់ចំនួន៣លើកអស់៣.៦០០ដុល្លារដើម្បីធានារត់ការដោះលែងប្តីនាងតែមិនបានសម្រេច ទើបនាងទារប្រាក់វិញ ព្រោះជាករណីឆបោក បើទារមិនបាននាងនឹងប្តឹង ទើបជនសង្ស័យណាត់ជួបរួចសម្លាប់បំបិទមាត់តែម្តង។
សូមរំលឹកថា ស្ត្រីរងគ្រោះឈ្មោះ ទិត លីនដា អាយុ៤២ឆ្នាំ មានទីលំនៅភូមិទី៨ សង្កាត់ទន្លេបាសាក់ ខណ្ឌចំការមន មានប្តីដើមជាមន្ត្រីនគរបាលអង្គរក្ស និងមានកូន៣នាក់ កូនបងអាយុ១៧ឆ្នាំ កូនពៅអាយុ៧ឆ្នាំ ។ ក្រោយមកនាងលែងលះគ្នាជាមួយប្តីដើមរួចមកស្នាក់នៅធ្វើកម្មករក្នុងស្រុកពញ្ញាឮ ខេត្តកណ្តាល ហើយបានប្តីម្នាក់ទៀតមានសញ្ជាតិខ្មែរឥស្លាម ប៉ុន្តែប្តីទី២នោះបានជាប់ពន្ធនាគាររឿងគ្រឿងញៀន ។ ពេលនោះនាងបានស្គាល់ជនសង្ស័យតាមរយៈជិះតាក់ស៊ី ហើយជនសង្ស័យធានារត់ការដោះលែងប្តីនាងតែមិនសម្រេច ពេលនាងទារប្រាក់វិញ ទើបសម្លាប់បំបិទមាត់ ។ សពស្ត្រីរងគ្រោះត្រូវគេឃើញច្រកក្នុងការ៉ុង រួចយកមកចោលនៅជាប់ផ្លូវជាតិលេខ៥ ត្រង់ចំណុច នៅភូមិព្រៃពីស ឃុំច្រេស ស្រុកកំពង់ត្រឡាច បណ្តាលឱ្យមានការភ្ញាក់ផ្អើលនៅវេលាម៉ោង៣និង១០នាទីរសៀល ថ្ងៃទី៣ កញ្ញា ៕
ចែករំលែកព័តមាននេះ