ខេត្តព្រះវិហារ ៖ នៅថ្ងៃទី១២ ខែកញ្ញា ឆ្នាំ២០១៧ សាខាកាំកុងត្រូលខេត្តព្រះវិហារ សហការណ៍ជាមួយមន្ទីរពិសោធន៍ចល័ត និងអាជ្ញាធរមានសមត្ថកិច្ចក្រុងព្រះវិហារ បានចុះត្រួតពិនិត្យ និងស្វែងរកបន្លែផ្លែឈើ…
ខេត្តព្រះវិហារ ៖ នៅថ្ងៃទី១២ ខែកញ្ញា ឆ្នាំ២០១៧ សាខាកាំកុងត្រូលខេត្តព្រះវិហារ សហការណ៍ជាមួយមន្ទីរពិសោធន៍ចល័ត និងអាជ្ញាធរមានសមត្ថកិច្ចក្រុងព្រះវិហារ បានចុះត្រួតពិនិត្យ និងស្វែងរកបន្លែផ្លែឈើ និងទំនិញខូចគុណភាពដែលដាក់លក់នៅក្នុងផ្សារកំពង់ប្រណាក ក្រុងព្រះវិហារ ដើម្បីធានា និងការពារដល់សុវត្ថិភាពអ្នកប្រើប្រាស់។ ក្នុងពេលចុះត្រួតពិនិត្យនេះដែរ លោក ដួង មុន្នី ប្រធានសាខាកាំកុងត្រូល ខេត្តព្រះវិហារ មានប្រសាសន៍ថា ដើម្បីថែរក្សា និងការពារ ទៅដល់សុវត្ថិភាពអ្នកបរិភោគចំណីអាហារ មន្ត្រីជំនាញ សាខាកាំកុងត្រូលខេត្តព្រះវិហារ បានសហការណ៍គ្នាជាមួយមន្ទីរពិសោធន៍ចល័ត និងអាជ្ញាធរ មានសមត្ថកិច្ចក្រុងព្រះវិហារ បានចុះទៅដល់ទីតាំងលក់ដូរ របស់អាជីវករផ្សារកំពង់ប្រណាក ក្រុងព្រះវិហារ ដើម្បីត្រួតពិនិត្យមើលបន្លែផ្លែឈើ ត្រី សាច់ គុយទាវ ក្រែងមានផ្ទុកនូវសារធាតុគីមី និងទំនិញហួសកាលបរិច្ឆេទប្រើប្រាស់ជាដើម ដែលធ្វើឲ្យប៉ះពាល់ដល់សុខភាពអ្នកបរិភោគ ជាពិសេសនោះ រដូវនេះជារដូវបុណ្យភ្ជុំបិណ្ឌ ដែលប្រជាពលរដ្ឋទូទៅ មានតម្រូវការច្រើនក្នុងការទិញទំនិញពីផ្សារយកទៅប្រើប្រាស់។
លោកបន្តទៀតថា ប្រសិនណាបើមន្ត្រីជំនាញពិនិត្យរកឃើញ នូវទំនិញណាមានផ្ទុកនូវសារធាតុគីមី និងហួសកាលបរិច្ឆេទ មន្ត្រីនឹងដកហូតកម្ទេចចោលតែម្តង និងណែនាំឲ្យអាជីវករបញ្ឈប់លក់នូវទំនិញ មានផ្ទុកសារធាតុគីមី ឬខូចគុណភាពហួសកាលបរិច្ឆេទបន្តទៀត។ តែបើក្នុងករណីមន្ត្រីជំនាញ ចុះពិនិត្យ ឃើញអាជីវករដដែល លក់ដូរទំនិញបែបនេះទៀត នឹងមានវិធានការចាត់ការទៅតាមផ្លូវច្បាប់។ លោក ដួង មុន្នី បញ្ជាក់ថា សាខាកាំកុងត្រូលខេត្តព្រះវិហារ តែងតែបានចុះត្រួតពិនិត្យយ៉ាងតិចណាស់ ២ដងក្នុងមួយខែ ក្រៅពីផ្សារកំពង់ប្រណាក ក្រុងព្រះវិហារ ក៏នៅមានការត្រួតពិនិត្យជាហូរហែរ នៅតាមបណ្តាហាងលក់ទំនិញ ផ្សារនៅតាមបណ្តាស្រុកជាប្រចាំ និងបានអប់រំណែនាំដល់អាជីវករទាំងអស់ ត្រូវធ្វើយ៉ាងណាលក់ដូរទំនិញនីមួយៗត្រូវគិតគូរឲ្យបានត្រឹមត្រូវចំពោះសុវត្ថិភាពអ្នកប្រើប្រាស់ជាចម្បង។ អាជីវករលក់ដូរ នៅក្នុងផ្សារកំពង់ប្រណាកទាំងអស់ក៏បានសាទរទៅនឹងយុទ្ធនាការរបស់អាជ្ញាធរ ក៏ដូចជាមន្ត្រីជំនាញកាំកុងត្រូល ដែលបានចុះពិនិត្យស្វែងរកសារធាតុគីមីលើបន្លែផ្លែឈើ និងទំនិញខូចគុណភាពនៅក្នុងផ្សារកំពង់ប្រណាកនេះ ព្រោះថាបច្ចុប្បន្ននេះ ទំនិញដែលនាំចូលពីក្រៅខេត្ត ពួកគាត់មានការព្រួយបារម្ភខ្លាចមានផ្ទុកនូវសារធាតុគីមីដែលធ្វើឲ្យប៉ះពាល់ដល់សុខភាពប្រជាពលរដ្ឋ។
អាជីវករដទៃទៀតសង្ឃឹមថា មន្ត្រីជំនាញ នឹងបន្តចុះត្រួតពិនិត្យញឹកញាប់ ដើម្បីឲ្យអ្នកប្រើប្រាស់មានទំនុកចិត្ត និងការពារបាននូវសុវត្ថិភាពអ្នកបរិភោគចំណីអាហារ ដែលទិញមកពីផ្សារយកទៅចម្អិននៅតាមផ្ទះ។ សូមបញ្ជាក់ថា ការចុះត្រួតពិនិត្យបន្លែផ្លែឈើ ទំនិញហួសកាលបរិច្ឆេទ នៅថ្ងៃទី១២ ខែកញ្ញា ឆ្នាំ២០១៧ មានចំនួន៥៨គំរូ មានដូចជាត្រីងៀត សាច់ក្រក គុយទាវ បន្លែ ផ្លែឈើ បានរកឃើញ បន្លែប្រភេទផ្កាកាឆាយ មានផ្ទុកជីគីមី ឬកាកសំណល់កសិកម្ម បន្តិចបន្តួចប៉ុណ្ណោះ។ ហើយត្រូវបានមន្ត្រីជំនាញ ណែនាំឲ្យអាជីវករ បឈ្ឈប់នាំចូលបន្លែដែលប្រើប្រាស់ជីគីមីបែបនេះទៀត ដោយឡែកក្រៅពីប្រភេទបន្លែនេះ ពុំមានរកឃើញទំនិញណាមួយមានផ្ទុកគីមី ឬហួសកាលបរិច្ឆេទប្រើប្រាស់នោះទេ៕
ចែករំលែកព័តមាននេះ