ខេត្តព្រៃវែង ៖ ទំនិញខូចគុណភាពជាច្រើនមុខ ត្រូវបានមន្ត្រីជំនាញកាំកុងត្រូលសាខាខេត្តព្រៃវែង រកឃើញ និងដកហូតទុកយកទៅបំផ្លាញចោល នៅក្នុងពេលចុះទៅត្រួតពិនិត្យតាមស្តង់លក់ដូរជាច្រើន ទាំងនៅតាមផ្ទះ និងនៅក្នុងផ្សារកំពង់ត្របែក ក្នុងស្រុកកំពង់ត្របែក ខេត្តព្រៃវែង កាលពីព្រឹកថ្ងៃទី១៣ កញ្ញានេះ។
សកម្មភាពចុះពិនិត្យគុណភាពទំនិញនេះ ធ្វើឡើងក្នុងគោលបំណងដើម្បីការពារសុខមាលភាពជូនប្រជាពលរដ្ឋ និងរួមចំណែកលើកស្ទួយសេដ្ឋកិច្ចជាតិផងដែរ ជាមួយគ្នានេះមន្ត្រីកាំកុងត្រូលបានធ្វើការពន្យល់ណែនាំ និងបង្ហាញដល់ក្រុមអាជីវករអំពីវិធីសាស្ត្រថែទាំ ការដាក់តាំងលក់ និងការរក្សាទុកមុខទំនិញឲ្យស្របទៅតាមលក្ខខណ្ឌ និងផ្តោតទៅលើអនាម័យផងដែរ ព្រមទាំងបានបង្រៀនក្រុមអាជីវករ និងប្រជាពលរដ្ឋ អំពីរបៀបមើលកាលបរិច្ឆេទនៃទំនិញ សម្រាប់ជាគុណប្រយោជន៍ដល់សុខភាពរបស់អ្នកប្រើប្រាស់ទៀតផង។
ដោយឡែកសម្រាប់ទំនិញខូចគុណភាព ដែលត្រូវបានមន្ត្រីជំនាញកាំកុងត្រូវរកឃើញ និងដករហូតបាននោះមានចំនួន៤មុខ ស្មើនឹងទម្ងន់៣៧,៦៥គីឡូក្រាម ដែលក្នុងនោះរួមមានទឹកក្រូចហ្វាន់តា ចំនួន២៩ដប ទឹកស្ទីង៥ដប ស្ករគ្រាប់ម៉ាកមីន ចំនួន២កញ្ចប់ និងមីម៉ាម៉ាកំប៉ុងចំនួន៥កំប៉ុងផងដែរ។ ប៉ុន្តែអ្វីដែលគួរឲ្យចាប់អារម្មណ៍នោះ នៅក្នុងពេលចុះត្រួតពិនិត្យនោះ គឺក្រុមអាជីវករ និងប្រជាពលរដ្ឋបានសម្ដែងនូវការគាំទ្រយ៉ាងខ្លាំង ហើយបានស្នើសុំឲ្យមន្ត្រីជំនាញកាំកុងត្រូលបន្តចុះត្រួតពិនិត្យគុណភាពទំនិញបែបនេះឲ្យបានច្រើនដង និងរៀងរាល់ខែ ព្រោះវាធ្វើឲ្យពួកគាត់មានទំនុកចិត្តថាអាហារដែលពួកគាត់ទទួលទាន មានសុវត្ថិភាពសម្រាប់សុខភាពរបស់ពួកគាត់គ្រប់ៗគ្នា៕
ចែករំលែកព័តមាននេះ