ខេត្តឧត្តរមានជ័យ ៖ យ៉ាងហោចណាស់មានមនុស្សម្នាក់បានស្លាប់បាត់បង់ជីវិត និង៨នាក់ទៀតរងរបួសធ្ងន់ស្រាល ខណៈជួបគ្រោះថ្នាក់ចរាចរណ៍កាលពីវេលាម៉ោង១រសៀល ថ្ងៃទី១២ កញ្ញា ២០១៧។ ហេតុការណ៍នេះកើតឡើងនៅតាមបណ្តោយផ្លូវគ្រួសក្រហម ខ្សែក្រវាត់ព្រំដែនកម្ពុជា ថៃ ស្ថិតក្នុងភូមិត្រពាំងទូង សង្កាត់កូនគ្រៀល ក្រុងសំរោង ខេត្តឧត្តរមានជ័យ។ ជនរងគ្រោះឈ្មោះ ព្រីម មករា ភេទប្រុស អាយុ១៥ឆ្នាំ មុខរបរជាសិស្ស ដែលជាអ្នកបើកបររថយន្តម៉ាកកាមរី ពណ៌ខ្មៅ ស៊េរី៩១ ពាក់ស្លាកលេខ ភ្នំពេញ ២F-៩៤៧១ បានស្លាប់នៅនឹងកន្លែងកើតហេតុភ្លាមៗ។
ចំណែកឯអ្នករួមដំណើរ ១-ឈ្មោះ អុល រដ្ឋា ភេទប្រុស អាយុ១៥ឆ្នាំ ២-ទូច វ៉ាន់ទីន ភេទប្រុស អាយុ១៧ឆ្នាំ ៣-ទូ យូឡាយ ភេទប្រុស អាយុ១៥ឆ្នាំ ៤-ប៊ុន លានលី ភេទប្រុស អាយុ១៥ឆ្នាំ ៥-ចាន់ បូឌី ភេទប្រុស អាយុ១៧ឆ្នាំ អ្នកទាំងប្រាំនាក់រស់នៅភូមិអូរស្មាច់ សង្កាត់កូនគ្រៀល ក្រុងសំរោង ខេត្តឧត្តរមានជ័យ រងរបួសស្រាល។ ៦-ឈ្មោះ ពិន យ៉ាមួយ ភេទស្រី អាយុ២២ឆ្នាំ រស់នៅភូមិអូស្មាច់ សង្កាត់អូរស្មាច់ ក្រុងសំរោង មុខរបរកសិករ រងរបួសធ្ងន់ ជាអ្នកបើកបរម៉ូតូម៉ាកឌ្រីមសេ១២៥ ពណ៌ខ្មៅ ពាក់ស្លាកលេខ ឧត្តរមានជ័យ ១B-0៦៥៨ ស៊េរីឆ្នាំ២០១៤ ទី៧-ឈ្មោះ ថៅ ស្រីដា ភេទស្រី អាយុ១៨ឆ្នាំ មុខរបរសិស្ស រស់នៅភូមិអូស្មាច់ សង្កាត់អូស្មាច់ ក្រុងសំរោង រងរបួសធ្ងន់ គ្មានមួកសុវត្ថិភាព និងទី៨-ឈ្មោះ ជឿន ថៃ ភេទស្រី អាយុ១៨ឆ្នាំ រស់នៅភូមិអូរស្មាច់ សង្កាត់អូរស្មាច់ ក្រុងសំរោង មុខរបរសិស្ស រងរបួសធ្ងន់។
មន្ត្រីនគរបាលក្រុងសំរោងបានឱ្យដឹងថា មុនពេលកើតហេតុរថយន្ត និងម៉ូតូបានធ្វើដំណើរស្របទិសគ្នា លុះដល់ចំណុចកើតហេតុស្រាប់តែរថយន្តបើកបរក្នុងល្បឿនយ៉ាងលឿនក៏រេចង្កូតទៅបុកម៉ូតូពីក្រោយយ៉ាងពេញទំហ៊ឹងបណ្តាលឱ្យមនុស្សស្លាប់ម្នាក់ និង៨នាក់រងរបួសធ្ងន់ស្រាល។ ក្រោយពីកើតហេតុ សមត្ថកិច្ចបាននាំយកអ្នករបួសទៅធ្វើការសង្គ្រោះ ចំណែកម៉ូតូ និងរថយន្តយកទៅរក្សាទុកនៅអធិការដ្ឋាននគបាលក្រុង៕
ចែករំលែកព័តមាននេះ