រាជធានីភ្នំពេញ ៖ បុរសជនជាតិសាំងហ្គាពួរម្នាក់រួមដំណើរជាមួយមិត្តស្រីម្នាក់ទៀតបើករថយន្តមួយគ្រឿងព្យាយាមបើកវ៉ាជែងដោយខ្វះការប្រុងប្រយ័ត្នបណ្តាលឱ្យរថយន្តធន់ធំមួយគ្រឿងទៀតបើកបត់ស្តាំទៅកៀរសំណាងល្អដែលមិនបង្កឱ្យមានអ្នករងរបួស ហេតុការណ៍នេះកើតឡើងកាលពីវេលាម៉ោង៩យប់ ថ្ងៃទី១២ ខែកញ្ញា ឆ្នាំ២០១៨ តាមបណ្តោយផ្លូវម៉ៅសេទុងកែងនឹងផ្លូវ២៣០ ស្ថិតក្នុងសង្កាត់ផ្សារដើមគ ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសពីរនាក់បើករថយន្តមួយគ្រឿង ពណ៌ក្រហម ពាក់ស្លាកលេខ ព្រះសីហនុ ៣A-៣៦៦៣ ជាប្រភេទរថយន្តទម្ងន់១២តោនដឹកបន្លែ ធ្វើដំណើរតាមបណ្តោយផ្លូវម៉ៅសេទុងក្នុងទិសដៅពីត្បូងទៅជើង ។
លុះមកដល់ចំណុចកើតហេតុក៏បានស៊ីញ៉ូបំរុងបត់ស្តាំទៅផ្លូវ២៣០ស្រាប់តែមានថយន្តបើកមកពីក្រោយមួយគ្រឿងទៀតម៉ាក RAV4 ពណ៌ទឹកប្រាក់ ពាក់ស្លាកលេខ ភ្នំពេញ ២AA-៩៨២២ បើកបរដោយបុរសជាជនជាតិសាំងហ្គាពួរម្នាក់ និងរួមដំណើជាមួយមិត្តស្រីជាជនជាតិខ្មែរម្នាក់ទៀតក្នុងទិសដៅស្របទិសគ្នាបានបើកព្យាយាមវ៉ាជែងខាងស្តាំរថយន្តធន់ធំខាងលើតែវ៉ាមិនផុតក៏ត្រូវបានរថយន្តធន់ធំកៀរបណ្តាលឲ្យរថយន្ត RAV4 រងឆ្កូតថ្នាំ និងបែកកង់ក្រោយចំហៀងខាងឆ្វេង ចំណែកឯរថយន្តធន់ធំរងការខូចខាតបន្តិចបន្តួច មិនបង្កឱ្យមានអ្នករងរបួសនោះទេ ។
ក្រោយកើតហេតុសមត្ថកិច្ចមូលដ្ឋានចុះទៅដល់កន្លែងកើតហេតុបានឲ្យភាគីទាំងសងខាងសម្រុះសម្រួលគ្នាជាងកន្លះម៉ោងទើបត្រូវគ្នាដោយសារថយន្តធុនធំមិនចង់មានរឿងវែងឆ្ងាយក៏សុខចិត្តចេញសំណងសងទៅរថយន្តធុនតូចចំនួន១៥០ដុល្លារដើម្បីបញ្ចប់រឿងនៅនឹងកន្លែងកើតហេតុ ៕
ចែករំលែកព័តមាននេះ