ប្រទេសមីយ៉ាន់ម៉ា ៖ មេដឹកនាំមីយ៉ាន់ម៉ាលោកស្រីអ៊ួង សាន់ស៊ូជី ដែលរងការរិះគន់ចំពោះអំពើហិង្សាដែលបង្ខំឱ្យពួករ៉ូហ៊ីងយ៉ាជាង៣៧០.០០០នាក់ ហើយរត់ភៀសខ្លួនទៅកាន់បង់ក្លាដែស នឹងពុំទៅចូលរួមក្នុងមហាសន្និបាត អ.ស.ប ដែលបើកធ្វើចាប់ពីថ្ងៃអង្គារ ទី១២…
ប្រទេសមីយ៉ាន់ម៉ា ៖ មេដឹកនាំមីយ៉ាន់ម៉ាលោកស្រីអ៊ួង សាន់ស៊ូជី ដែលរងការរិះគន់ចំពោះអំពើហិង្សាដែលបង្ខំឱ្យពួករ៉ូហ៊ីងយ៉ាជាង៣៧០.០០០នាក់ ហើយរត់ភៀសខ្លួនទៅកាន់បង់ក្លាដែស នឹងពុំទៅចូលរួមក្នុងមហាសន្និបាត អ.ស.ប ដែលបើកធ្វើចាប់ពីថ្ងៃអង្គារ ទី១២ កញ្ញា ទៅ នៅក្រុងញូវយ៉កឡើយ ។
ការបង្ក្រាបយ៉ាងសាហាវរបស់កងកម្លាំងសន្តិសុខមីយ៉ាន់ម៉ាជាការឆ្លើយតបចំពោះការវាយប្រហាររបស់ពួកឧទ្ទាមរ៉ូហ៊ីងយ៉ានៅរដ្ឋរ៉ាឃីនញ៉ាំងឱ្យមានការរិះគន់របស់សហគមន៍អន្តរជាតិ ពិសេសរបស់សហរដ្ឋអាមេរិក ។ អ្នកធ្វើអត្ថាធិប្បាយមួយចំនួនរហូតដល់ស្នើឱ្យដកហូតពានរង្វាន់ណូបែលសន្តិភាពដែលផ្តល់ឱ្យអតីតមេដឹកនាំប្រឆាំងរបបយោធារូបនេះកាលពីឆ្នាំ១៩៩១ទៀតផង ។
កាលពីឆ្នាំទៅមិញ ក្នុងសុន្ទរកថាដំបូងរបស់លោកស្រីនៅមហាសន្និបាត អ.ស.ប ក្នុងនាមលោកស្រីជាមេដឹកនាំមីយ៉ាន់ម៉ា លោកស្រីស៊ូជី បានការពារការខិតខំប្រឹងប្រែងរបស់រដ្ឋាភិបាលលោកស្រី ដើម្បីដោះស្រាយវិបត្តិទាក់ទិននឹងជនជាតិភាគតិចអ៊ិស្លាមរ៉ូហ៊ីងយ៉ា ។
ឆ្នាំនេះអ្នកនាំពាក្យម្នាក់របស់គណបក្សលោកស្រីប្រកាសថា លោកស្រីនឹងពុំទៅចូលរួមក្នុងមហាសន្និបាត អ.ស.ប ឡើយ ហើយអ្នកនាំពាក្យរូបនេះក៏មិនបានពន្យល់ពីហេតុផលដែរ តែថ្លែងប្រាប់រ៉យទ័រថា លោកស្រីស៊ូជី ពុំខ្លាចចំពោះការរិះគន់ ឬក៏ប្រឈមមុខនឹងបញ្ហានានាឡើយ នោះប្រហែលមកពីលោកស្រីមានកិច្ចការបន្ទាន់ទាំងឡាយដែលត្រូវធ្វើ ។
ក្រុមប្រឹក្សាសន្តិសុខ អ.ស.ប គ្រោងបើកកិច្ចប្រជុំសម្ងាត់មួយនាថ្ងៃទី១៣ កញ្ញា លើសំណុំរឿងមីយ៉ាន់ម៉ាតាមសំណើរបស់អង់គ្លេស និងស៊ុយអែត ។ ឯកអគ្គរាជទូតអង់គ្លេសប្រចាំ អ.ស.ប លោក MATTHEW RYCROFT សង្ឃឹមថា នឹងមានសេចក្តីថ្លែងការណ៍ជាសាធារណៈមួយក្រោយកិច្ចប្រជុំនេះ ។
អង្គការសិទ្ធិមនុស្ស HUMAN RIGHTS WATCH និង AMNESTY INTERNATIONAL កាលពីថ្ងៃទី១២ កញ្ញា បានសម្តែងការសោកស្តាយចំពោះការគ្មានប្រតិកម្មរបស់ក្រុមប្រឹក្សាសន្តិសុខ អ.ស.ប លើវិបត្តិនៅមីយ៉ាន់ម៉ា ខណៈពួករ៉ូហ៊ីងយ៉ាជិតកន្លះលាននាក់ហើយរត់ភៀសខ្លួនទៅកាន់បង់ក្លាដែស ។ អង្គការមនុស្សធម៌មួយចំនួនដែលមានវត្តមានពុំអាចផ្តល់ទឹកស្អាតដល់គ្រប់គ្នា ហើយលក្ខខណ្ឌអនាម័យនាំឱ្យខ្លាចចំពោះការលេចចេញជំងឺឆ្លងនានា ពិសេសជំងឺអាសន្នរោគ ៕
ចែករំលែកព័តមាននេះ