រាជធានីភ្នំពេញ ៖ សាលារាជធានីភ្នំពេញ បានអះអាងថា បើគណបក្សសង្គ្រោះជាតិ នៅតែធ្វើពិធីបង្សុកូល នៅមុខអតីតរដ្ឋសភា បំពានបំរាមរបស់អាជ្ញាធរទៀតនោះ ប្រធានស្តីទីគណៈកម្មាធិកាប្រតិបត្តិរាជធានីភ្នំពេញ របស់គណបក្សសង្គ្រោះជាតិ ត្រូវតែទទួលខុសត្រូវចំពោះមុខច្បាប់ជាធរមាន ។
នៅថ្ងៃទី១២ ខែកញ្ញា ឆ្នាំ២០១៧នេះ សាលារាជធានីភ្នំពេញ បានសម្រេចមិនអនុញ្ញាតឱ្យគណបក្សសង្គ្រោះជាតិរៀបចំពិធីបង្សុកូល នៅបរិវេណមុខអតីតរដ្ឋសភា នៅថ្ងៃទី១៣ ខែកញ្ញា ឆ្នាំ២០១៧ ទេ ដោយបង្វែរឱ្យគណបក្សនេះ រៀបចំពិធីខាងលើនៅតាមវត្តអារាមវិញ ដើម្បីកុំឱ្យប៉ះពាល់ដល់សណ្តាប់ធ្នាប់ ។
ក្នុងលិខិតមួយរបស់ លោក ឃួង ស្រេង អភិបាលរាជធានីភ្នំពេញ ផ្ញើជូនគណៈកម្មាធិការប្រតិបត្តិរាជធានីភ្នំពេញរបស់គណបក្សសង្គ្រោះជាតិ ។ នៅក្នុងលិខិតរបស់ លោក ឃួង ស្រេង បានបញ្ជាក់ថា ក្នុងករណីនៅតែមានការជួបជុំ នៅទីតាំងខាងលើ ដោយគ្មានការអនុញ្ញាតធ្វើឱ្យប៉ះពាល់ដល់សន្តិសុខ សុវត្ថិភាព និងរបៀបរៀបរយសាធារណៈ ព្រមទាំងមានការប៉ះទង្គិចណាមួយកើតឡើងនោះ ប្រធានស្តីទីគណៈកម្មាធិការប្រតិបត្តិរាជធានីភ្នំពេញរបស់គណបក្សសង្គ្រោះជាតិ ត្រូវតែទទួលខុសត្រូវចំពោះមុខច្បាប់ជាធរមាន ។
គួរបញ្ជាក់ថា ៖ កាលពីថ្ងៃទី១១ ខែកញ្ញានេះ ប្រធានស្តីទីគណៈកម្មាធិការប្រតិបត្តិរាជធានីភ្នំពេញ របស់គណបក្សសង្គ្រោះជាតិ លោក ស ឡុងដេត បានសរសេរលិខិតស្នើទៅកាន់ អភិបាលរាជធានីភ្នំពេញ ដើម្បីសុំទីតាំងបរិវេណចេតិយខាងមុខអតីតរដ្ឋសភាចាស់ (មុខតុលាការកំពូល) ដើម្បីសង់រោងចំនួន៦ប្រឡោះ ប្រារព្វពិធីបង្សុកូលឧទ្ទិសកុសលជូនដល់វិញ្ញាណក្ខន្ធដល់បាតុករដែលបានស្លាប់នៅមុខរដ្ឋសភាចាស់ កាលពីបាតុកម្មឆ្នាំ១៩៩៧ ៕
ចែករំលែកព័តមាននេះ