រាជធានីភ្នំពេញ៖ ក្រុមសមត្ថកិច្ចរួមនឹងសន្តិសុខសណ្តាប់ធ្នាប់ខណ្ឌដូនពេញជាច្រើនរូបត្រូវបានដាក់ពង្រាយជាច្រើនកន្លែងនៅសួនច្បារវត្តបុទុមវត្តី នៅព្រឹកថ្ងៃទី ១៣ ខែកញ្ញា ដើម្បីរារាំងក្រុមសមាជិកសភា និងសកម្មជនគណបក្សសង្គ្រោះជាតិ ដែលមានបំណងប្រារព្ធពិធីរាប់បាត្រនៅមុខអតីតមន្ទីររដ្ឋសភាចាស់ ក្បែរតុលាការកំពូល ។
យោងតាមសេចក្តីប្រកាសព័ត៌មានរបស់គណបក្សសង្គ្រោះជាតិបានឲ្យដឹងថា នៅព្រឹកថ្ងៃទី១៣ ខែកញ្ញា ឆ្នាំ២០១៧នេះ គណបក្សសង្គ្រោះជាតិប្រារព្ធពិធីរាប់បាត្រ និងបង្សុកូលឧទ្ធិស កុសលជូនដូងវិញ្ញាណក្ខន្ធវិរបាតុករ ដែលបានបាត់បងជីវតិដោយសារសភាពការគប់គ្រាប់បែកនៅមុនអតីតមន្ទីររដ្ឋសភា កាលពីថ្ងៃទី៣០ ខែមីនា ឆ្នាំ១៩៩៧ ប៉ុន្តែសាលារាជធានីភ្នំពេញ មិនអនុញ្ញាតនោះទេ ហើយស្នើបក្សប្រឆាំងធ្វើពិធីនៅវត្តអារាមវិញ។
សមត្ថកិច្ចត្រូវបានដាក់ពង្រាយជាច្រើនកន្លែង ដើម្បីរារាំងដល់អ្នកដែលចូលរួមក្នុងពិធីរាប់បាត្រនោះ រួមទាំងសមាជិកសភាគណបក្សសង្គ្រោះជាតិផងដែរ។ មិនត្រឹមតែអ្នកដែលមានបំណងចូលរួមនោះទេ សូម្បីតែអ្នកសារព័ត៌មានដែលរងចាំផ្តិតរូប និងសកម្មភាពរបស់គណបក្សសង្គ្រោះជាតិ ក៏ត្រូវបានសមត្ថកិច្ចមិនអនុញ្ញាតឲ្យឈរនៅក្បែរចេតីយដែលតម្កល់ធាតុ អ្នកដែលស្លាប់ក្នុងហេតុការណ៍គប់គ្រាប់បែកនោះដែរ ។
យោងតាមលិខិតរបស់លោក ឃួង ស្រេង អភិបាលនៃគណៈអភិបាលរាជធានីភ្នំពេញបានលើកឡើងថា សំណើសុំអនុញ្ញាតប្រារព្ធពិធីបង្សុកូលនៅបរិវេនចេតីយ ខាងមុខអតីតមន្ទីរដ្ឋសភា របស់គណបក្សសង្គ្រោះជាតិមិនអនុញ្ញាតនោះទេ ។
លោកថា កាលពីថ្ងៃទី៣០ ខែមីនា ឆ្នាំ២០១៧ រដ្ឋបាលរាជធានីភ្នំពេញ បានអនុញ្ញាត ឲ្យគណបក្សសង្គ្រោះជាតិប្រារព្ធពិធីបង្សុកូលឧទ្ធិកុសលជូនវិញ្ញាណក្ខន្ធអ្នកដែលបានបាត់បង់ជីវិតកាលពីថ្ងៃទី៣០ ខែមីនា ឆ្នាំ១៩៩៧ នៅបរិវេណចេតីយមុខអតីតមន្ទីររដ្ឋសភាម្តងរួចមកហើយ ។
ចែករំលែកព័តមាននេះ