រាជធានីភ្នំពេញ ៖ បុរស២នាក់ចេញពីផឹកស៊ីវិញស្រវឹងទោរទន់បានជិះម៉ូតូជ្រុលទៅទាក់នឹងបង្កាន់ដៃស្ពានអាកាសស្ទឹងមានជ័យ បណ្តាលឱ្យអ្នកទាំងពីរដួលម៉ូតូរងរបួសធ្ងន់ហេតុការណ៍នេះបានកើតឡើងនៅវេលាម៉ោង៩និង៥០នាទីយប់ ថ្ងៃទី១២ ខែកញ្ញា ឆ្នាំ២០១៧ នៅលើស្ពានអាកាសស្ទឹងមានជ័យ ផ្លូវ២៧១ សង្កាត់ស្ទឹងមានជ័យ ខណ្ឌមានជ័យ ។ ជនរងគ្រោះទាំងពីរនាក់ដែលរងរបួសធ្ងន់មិនទាន់ឱ្យស្គាល់អត្តសញ្ញាណនៅឡើយទេ គ្រាន់តែដឹងថា ជិះម៉ូតូម៉ាកឌ្រីមសង់ ស៊េរីឆ្នាំ២០១១ ពណ៌ខ្មៅ ។
តាមប្រភពព័ត៌មានពីកន្លែងកើតបានឱ្យដឹងថា មុនពេលកើតហេតុគេបានឃើញបុរស២នាក់មិនដឹងថាចេញពីផឹកស៊ីវិញនៅកន្លែងណានោះទេគឺបានជិះម៉ូតូម៉ាកហុងដាឌ្រីម ស៊េរីឆ្នាំ២០១១ ពណ៌ខ្មៅ ពាក់ស្លាកលេខ ភ្នំពេញ ១AU-៨៤៤៩ បានធ្វើដំណើរតាមផ្លូវ២៧១ក្នុងទិសដៅពីត្បូងទៅជើងក្នុងល្បឿនលឿនព្រមទាំងស្រវឹងផងនោះ ។
ខណៈមកដល់ចំណុចកើតហេតុអ្នកបើកម៉ូតូបានបន្ថែមល្បឿនឡើងស្ពានក៏ជ្រុលទៅទាក់ដៃចង្កូតជាមួយនឹងបង្កាន់ដៃស្ពានអាកាសស្ទឹងមានជ័យបណ្តាលឱ្យអ្នកជិះម៉ូតូទាំងពីរនាក់ដួលបោកក្បាលទៅនឹងផ្លូវសន្លប់ស្តូកស្តឹង ហើយភ្លាមនោះកម្លាំងសមត្ថកិច្ចប៉ុស្តិ៍នគរបាលស្ទឹងមានជ័យដែលកំពុងល្បាតនៅទីនោះឃើញហេតុការណ៍បានជួយហៅរថយន្តសង្គ្រោះឱ្យមកដឹកជនរងគ្រោះយកសង្គ្រោះនៅគ្លិនិកឯកជន ចំណែកម៉ូតូវិញខ្ទាតចេញពីកន្លែងកើតហេតុ១៥ម៉ែត្ររងការខូចខាត ។
ក្នុងហេតុការណ៍នេះដែរបន្ទាប់ពីជនរងគ្រោះត្រូវបានបញ្ជូនទៅសង្គ្រោះបាត់ក៏ស្រាប់តែលេខមុខប្តីប្រពន្ធ២នាក់ដោយនារីជាប្រពន្ធមានអាការស្រវឹងបានអះអាងថា ជាបងបង្អូនជនរងគ្រោះហើយទាមទារយកម៉ូតូទៅតែពេលនោះដែលសមត្ថកិច្ចមិនព្រមឱ្យនោះទេ ដោយលើកហេតុផលប្រាប់ទៅវិញថា ម៉ូតូត្រូវបានសមត្ថកិច្ចយករក្សារទុកឱ្យនៅប៉ុស្តិ៍នគរបាលស្ទឹងមានជ័យរួចហើយចាំព្រឹកឡើង ឱ្យបងប្អូនយកឯកសារពាក់ព័ន្ធមកបញ្ជាក់ត្រឹមត្រូវសមត្ថកិច្ចនឹងប្រគល់ម៉ូតូឱ្យវិញហើយ ។
ពេលនោះនោះដែរស្ត្រីជាប្រពន្ធបានអះអាងថា ជាបងប្អូនជនរងគ្រោះមិនសុខចិត្តព្រោះខ្លាចអស់លុយនៅពេលដែលទៅយកម៉ូតូវិញបានរករឿងនិយាយដៀមដាមព្រមទាំងយកជើងធាក់ម៉ូតូថែមទៀតផង ហើយបន្តិចក្រោយមកឃើញមានបងប្អូនមកដល់ក៏ចាប់អូសស្ត្រីរូបនោះចូលទៅក្នុងរថយន្តជិះចេញទៅបាត់ ។ ក្រោយពេលកើតហេតុម៉ូតូរបស់ជនរងគ្រោះត្រូវបានសមត្ថកិច្ចយកទៅរក្សារទុកនៅប៉ុស្តិ៍នគរបាលស្ទឹងមានជ័យដើម្បីរងចាំប្រគល់ឱ្យម្ចាស់វិញ ៕
ចែករំលែកព័តមាននេះ