ខេត្តបន្ទាយមានជ័យ ៖ យ៉ាងហោចណាស់ក៏មានយុវជនចំនួន២នាក់ បានស្លាប់ភ្លាមៗក្នុងថ្លុកឈាមនៅកន្លែងកើតហេតុគួរឱ្យរន្ធត់ ដោយសារគ្រោះថ្នាក់ចរាចរណ៍រវាងម៉ូតូ និងម៉ូតូជិះបុកគ្នាយ៉ាងពេញទំហឹងលើផ្លូវជាតិលេខ៦។ ហេតុការណ៍នេះបានកើតឡើងនៅវេលាម៉ោង៦និង៥០នាទីល្ងាច ថ្ងៃទី២១ មីនា លើផ្លូវជាតិលេខ៦ ចន្លោះបង្គោលភ្លើងលេខ០២៩៨-០២៩៩ ស្ថិតក្នុងភូមិភ្នំជញ្ជាំង ឃុំជប់វ៉ារី ស្រុកព្រះនេត្រព្រះ ។
តាមប្រភពពីលោកអនុសេនីយ៍ឯក កែវ ប៊ុនយឿន អធិការនគរបាលស្រុកព្រះនេត្រព្រះ បានឱ្យដឹងថា ជនរងគ្រោះដែលបានស្លាប់ក្នុងឧប្បត្តិហេតុគ្រោះថ្នាក់ចរាចរណ៍គួរឱ្យរន្ធត់នេះ ម្នាក់ឈ្មោះតិះ តូ ភេទប្រុស អាយុ១៨ឆ្នាំ នៅភូមិភ្នំជញ្ជាំង ឃុំជប់វ៉ារី ស្រុកព្រះនេត្រព្រះ បើកបរម៉ូតូម៉ាកហុងដា ធុន C100 ពណ៌ស្លែ ស៊េរី២០០១ ជិះម្នាក់ឯង ។ ម្នាក់ទៀតឈ្មោះផ្លែ ជីវ័ន្ត ភេទប្រុស អាយុ២៤ឆ្នាំ នៅភូមិស្រេះខាងកើត ឃុំព្រះនេត្រព្រះ ខេត្តបន្ទាយមានជ័យ បើកបរម៉ូតូម៉ាកហុងដាវ៉េវ ធុន C110 ពណ៌ខ្មៅលាយក្រហម ស៊េរី២០០២ ឌុបគ្នាចំនួន២នាក់ ម្នាក់ឈ្មោះច្រេះ ភេទប្រុស អាយុ២៣ឆ្នាំ និងម្នាក់ទៀតឈ្មោះជុំ កូលាប ភេទប្រុស អាយុ២៥ឆ្នាំ អ្នកទាំងពីរនេះ របួសធ្ងន់នៅភូមិជាមួយអ្នកបើកបរម៉ូតូ ។
ប្រភពដដែលបានបន្តថា តាមការឱ្យដឹងពីសាក្សីនៅកន្លែងកើតហេតុបានប្រាប់សមត្ថកិច្ចថា មុនពេលកើតហេតុម៉ូតូជិះម្នាក់ឯងបើកបរពីលិចទៅកើត ហើយម៉ូតូដែលឌុបគ្នា៣នាក់បើកបញ្ច្រាសពីកើតទៅលិចក្នុងល្បឿនលឿនដូចគ្នា លុះដល់កន្លែងកើតហេតុម៉ូតូដែលជិះម្នាក់ឯងបានបើកគេចម៉ូតូដែលខូចមួយទៀតនៅខាងស្តាំដៃ ពេលនោះម៉ូតូដែលជិះគ្នា៣នាក់ ក៏បើកគេចអេស្កាវាទ័រខូចនៅខាងស្តាំដៃដូចគ្នា បណ្តាលឱ្យម៉ូតូទាំងពីរគ្រឿងនោះបុកគ្នាយ៉ាងពេញទំហឹងនៅលើទ្រូងផ្លូវស្លាប់អ្នកបើកបរម៉ូតូទាំងពីរនាក់ ចំណែកអ្នកជិះពីក្រោយ២នាក់ទៀតរងរបួសធ្ងន់។
បើតាមសាច់ញាតិខាងអ្នកបើកម៉ូតូជិះឌុបគ្នា៣នាក់និយាយថា ពួកគេមានបំណងទៅលេងបុណ្យបញ្ចុះសីមានៅវត្តគិរីក្ខន្ធបទ ហៅវត្តកក់ ហើយក៏ជួបនូវគ្រោះថ្នាក់ចរាចរណ៍តែម្តង ។ លោកអនុសេនីយ៍ឯក កែវ ប៊ុនយឿន បានបញ្ជាក់ថា សពជនរងគ្រោះទាំង២នាក់បានប្រគល់ឱ្យក្រុមគ្រួសារចាត់ចែងធ្វើបុណ្យតាមប្រពៃណី ឯអ្នករងរបួសធ្ងន់ទាំងពីរនាក់ត្រូវក្រុមគ្រួសារនាំយកទៅព្យាបាលនៅមន្ទីរពេទ្យភ្លាមៗផងដែរ ៕
ចែករំលែកព័តមាននេះ