ម៉ាឡេស៊ី ៖ ស្ថិតក្នុងគំរោងនៃការផ្សព្វផ្សាយតំបន់ទេសចរណ៍នៅម៉ាឡេស៊ី អ្នកសារព័ត៌មានកម្ពុជា៥នាក់បានទៅបំពេញទស្សនកិច្ចរយៈពេលមួយសប្ដាហ៍នៅតំបន់ទេសចរណ៍ ទីក្រុងកូឡាឡាំំពួរ និងរដ្ឋសាបា នៃប្រទេសម៉ាឡេស៊ី ។ តាមការកត់សំគាល់ប្រទេសម៉ាឡេស៊ី គឺជាគោលដៅវិស្សមកាលដ៏គួរឱ្យទាក់ទាញមួយ ដែលនឹងផ្ដល់ឱ្យភ្ញៀវទេសចរទាំងឡាយនូវភាពសប្បាយរីករាយគ្រប់ៗគ្នា ។ ភ្ញៀវទេសចរអាចរីករាយជាមួយគោលដៅទេសចរណ៍ចំនួន៣ផ្សេងគ្នានៅម៉ាឡេស៊ីរួមមានឧបទ្វីប ម៉ាឡេស៊ី រដ្ឋសាបា និងរដ្ឋសារាវ៉ាក់ ដែលស្ថិតនៅភាគខាងជើងនៃប្រទេស។ ភ្ញៀវទេសចរជាញឹកញាប់មានការភ្ញាក់ផ្អើល ដែលបានស្វែងយល់អំពីកំរិតនៃការអភិវឌ្ឍន៍របស់ប្រទេសម៉ាឡេស៊ី ព្រមទាំងភាពសំបូរបែបនិងភាពចំរុះនៃប្រពៃណីវប្បធម៌ ។
ដោយឡែក ទីក្រុងកូឡាឡាំពួរ គឺជាទីក្រុងទំនើបដែលមានមនុស្សមកពីគ្រប់តំបន់ក្នុងពិភពលោក ។ ទីក្រុងនេះរួមមានអគារភ្លោះខ្ពស់បំផុតនៅក្នុងពិភពលោកមានកំពស់៤៥២ ម៉ែត្រ ដែលបានបង្អួតរាងយ៉ាងសង្ហានៅលើវេហា ។ ស្ថាបត្យកម្មនេះតំណាងឱ្យវប្បធម៌ ដែលមានភាពលើសលប់របស់ប្រទេសពោលគឺ វប្បធម៌ម៉ាឡេស៊ី ចិន និងឥណ្ឌា ។ ដោយលាយបញ្ចូលជាមួយឥទ្ធិពលកេរដំណែលវប្បធម៌របស់ប្រទេសអង់គ្លេស និងម៉ូរីស ទីក្រុងកូឡាឡាំពួរ មានទស្សនីយភាពទីក្រុងប្រកបដោយភាពស្វាហាប់បំផុតនៅក្នុងទ្វីបអាស៊ី ។
ឆ្នេរដ៏វែងអន្លាយនិងបណ្ដាកោះដែលមានផ្កាថ្មដុះលំអនៅព័ទ្ធជុំវិញប្រទេសម៉ាឡេស៊ី ជាមួយខ្សែវ័ណ្ឌគឺជ្រោយមេឡាកានៅភាគខាងលិច និងសមុទ្រចិនខាងត្បូងនៅភាគខាង កើត បានបង្កើតឡើងនៅឆ្នេរល្អប្រណីតជាច្រើនឥតគណនា ។ កោះមួយចំនួនដូចជាកោះឡាំកាវី ទីអូម៉ាន់ និងប៉ាងករគឺជាទិសដៅ លំហែកាយដ៏ល្បីល្បាញលំដាប់ពិភពលោក ។ កោះប៉េណាំង គឺជាកោះមួយផ្សេងទៀតដែលមានភាពល្បីរន្ទឺ ដោយសារលក្ខណៈពិសេស នៃការផ្ដល់នូវការសំរាកលំហែកាយនិងភាពចំរុះនៃវប្បធម៌។ នៅប៉ែកខាងត្បូងនៃប្រទេស ឯណោះវិញ ជ្រោយម៉ាឡាកា ត្រូវបានស្គាល់ តាមរយៈប្រវត្ដិសាស្ដ្រដែលមានលក្ខណៈជាសារមន្ទីរនិងសហគមន៍បាបាណូយ៉ា ដ៏ពិសេសលើសគេ ។
ចំណែករដ្ឋសាបា និងសារ៉ាវ៉ាក់ ជាតំបន់ ទេសចរណ៍ដ៏ស័ក្ដិសមបំផុតសំរាប់អ្នកស្រឡាញ់ធម្មជាតិ និងអ្នកផ្សងព្រេង ។ គេនឹងអាចស្វែងយល់បន្ថែមអំពីជីវិតដែលរស់នៅក្នុងសមុទ្រដ៏សំបូរបែបនិងព្រៃស្ដុករងទឹកភ្លៀង ខណៈពេលរុករកពិភពបាតសមុទ្រនិងវាលរហោឋាននៃកោះបរណេអូ ។
ទីក្រុងកូឡាឡាំពួរ តាមប្រវត្ដិត្រូវបានបង្កើតនាឆ្នាំ១៨៥៧ នៅត្រង់ចំណុចប្រសព្វនៃទន្លេក្លាង និងទន្លេកុមបាក់ ។ គេអាចចាត់ទុកទីក្រុងមួយនេះគឺជាទីក្រុងមានភាពមមាញឹក បំផុតនៅក្នុងទ្វីបអាស៊ី ។ ទីក្រុងមានអគារខ្ពស់ៗកប់ពពកស្ថានីយអយស្ម័យយានតាមរចនាបថចំណាស់របស់ម៉ូរីស និងវិហារអ៊ិស្លាម ប្រាសាទ និងព្រះវិហារសាសនាគ្រិស្ដជាច្រើន ទៀត ។ ធាតុសំខាន់ៗនៃទីក្រុងកូឡាឡាំពួរ គឺវប្បធម៌ប្រពៃណីរបស់ប្រជាជនម៉ាឡេស៊ី ដែលធ្វើឱ្យទីក្រុងនេះមានលក្ខណៈពិសេសដោយឡែក ។ មានការនិយាយភាសាអង់គ្លេសយ៉ាងទូលំទូលាយ ហើយប្រជាជនក្នុងស្រុកអាចប្រើប្រាស់ភាសានេះបានជាធម្មតា នៅពេលដែលអ្នកទេសចរសួរនាំដើម្បីស្វែងរកទីកន្លែងនានា ។
ទីក្រុងកូឡាឡាំពួរ គឺជាកន្លែងមួយដែល មានភាពផ្ទុយគ្នា ពោលគឺប្រជាជនម៉ាឡេស៊ី មានមោទនភាពចំពោះរចនាសម្ព័ន្ធថ្មីៗនៅក្នុង ប្រទេស ។ ទន្ទឹមនោះសូម្បីតែសំណង់អគារ ចាស់ៗក៏មានភាពទាក់ទាញផងដែរ ។ យើង អាចធ្វើដំណើរទេសចរណ៍ក្នុងក្រុងកូឡាឡាំពួរ តាមរយៈថ្មើរជើង ដំណើរទេសចរណ៍ដែលមាន ការរៀបចំឬមធ្យោបាយធ្វើដំណើរសាធារណៈផងដែរ ។ តំបន់សំខាន់ៗនៃទីក្រុងកូឡាឡាំពួរ ដែលគួរឱ្យចង់ទស្សនានោះគឺទីលានឯករាជ្យ មែរដេកា អគាររបស់ស្ដេចអាប់ឌុលសាមាត សួនបឹងកូឡាឡាំពួរ ឧទ្យានមេអំបៅ ឧទ្យាន សត្វក្ដាន់ ឧទ្យានបក្សី សួនផ្កាអ័រគីដេ មជ្ឈ មណ្ឌលលក់វត្ថុអនុស្សាវរីយ៍ និងហាងលក់មុខ ទំនិញទំនើបៗ ។ ក្រៅពីនោះ នៅមានមជ្ឈ មណ្ឌល KL Tower ដែលមានកំពស់៤២១ ម៉ែត្រ អាចទស្សនាទេសភាពទីក្រុងទាំងមូល ពីលើអាកាស ភោជនីយដ្ឋានចល័ត ដែលអាចបំរើអតិថិជនតាមចំណង់ចំណូលចិត្ដ រួមទាំង ស្ពានអាកាសកំពស់៤១ជាន់ដែលតភ្ជាប់អគារភ្លោះ Petronas Twin Tower ។ អ្នកទេសចរដែលបានទៅទស្សនាម៉ាឡេស៊ី ឬក៏ទីក្រុងកូឡាឡាំពួរ គឺសុទ្ធតែចាប់អារម្មណ៍ និងលាន់មាត់ស្ងើចសរសើរគ្រប់ៗគ្នាថា ជាឋានសួគ៌នៃពិភពលោក ៕
ចែករំលែកព័តមាននេះ