ខេត្ដបន្ទាយមានជ័យ ៖ ស្ដ្រីម្នាក់ដែលទើបរៀបការបានជាងមួយខែសោះ តែអំណាចភ្លើងប្រចណ្ឌលើសពី១០០អង្សា បានបង្កើតឱ្យមានការទាស់ពាក្យសំដីជាមួយនឹងប្ដីរបស់ខ្លួន ហើយទីបំផុតនាងប្រល័យជីវិតខ្លួនឯង
ដោយលេបថ្នាំធ្វើអត្ដឃាតនៅ វេលាម៉ោង៤ល្ងាច ថ្ងៃទី២៣ ខែ មិថុនា នៅភូមិក្បាលស្ពាន ឃុំម៉ាឡៃ ស្រុកម៉ាឡៃ ។ មន្ដ្រីនគរបាលស្រុកម៉ាឡៃបានឱ្យដឹងថា ស្ដ្រីដែលលេបថ្នាំធ្វើអត្ដឃាតមានឈ្មោះសឹង្ហ សុភា អាយុ២២ឆ្នាំ មានទីលំនៅភូមិ ឃុំខាងលើ និងមានប្ដីឈ្មោះផែន ភារ៉ា អាយុ២៤ឆ្នាំ ។ គូស្នេហ៍មួយគូនេះ ទើបតែរៀបអាពាហ៍ពិពាហ៍បានប្រហែលជាងមួយខែមុននេះប៉ុណ្ណោះ ។
មន្ដ្រីនគរបាលរូបនោះបានបញ្ជាក់ទៀតថា ប្រការដែលធ្វើឱ្យនាងលេបថ្នាំសម្លាប់ខ្លួន គឺនៅមុនពេលកើតហេតុវេលាម៉ោង១២ថ្ងៃត្រង់ នាងមានទំនាស់សំដីគ្នាជាមួយនឹងប្ដី ដោយប្រចណ្ឌពីរឿងប្ដីបានឱ្យទូរស័ព្ទទៅ នារីផ្សេងម្នាក់នៅភូមិជាមួយគ្នាប្រើប្រាស់ ។ លុះទូរស័ព្ទខូចស្ដ្រីនោះយកមកប្រគល់ឱ្យវិញ ក៏កើតទៅជារឿងប្រចណ្ឌឈ្លោះប្រកែកគ្នាទៅ ។ បន្ទាប់មកបុរសជាប្ដី ក៏យកទូរស័ព្ទ ដែលខូចនោះទៅជួសជុល លុះវេលាម៉ោង៤ ល្ងាចថ្ងៃដដែល ពេលប្ដីត្រឡប់មកផ្ទះវិញ ឃើញទ្វារបិទក៏រុញចូលទៅឃើញប្រពន្ធដេកស្ដូកស្ដឹងបែកពពុះមាត់ស្គុល ។
ពេលនោះក៏មានការភ្ញាក់ផ្អើល ហើយនាំយកប្រពន្ធទៅមន្ទីរពេទ្យបង្អែកស្រុកម៉ាឡៃ ដើម្បីសង្គ្រោះ ។ ប៉ុន្ដែហួសពេលទៅហើយ ដោយគ្រូពេទ្យពុំអាចជួយសង្គ្រោះបាន ព្រោះមិនដឹងថា នាងបានលេបថ្នាំពីស្មើណានោះទេហើយក៏គ្មានអ្នកណាដឹង ។ បុរសជាប្ដីនិយាយថា ពេលដឹកនាងមកដល់មន្ទីរពេទ្យនាងក៏ បានដាច់ខ្យល់ស្លាប់ ។ បើតាមការសន្និដ្ឋាន របស់មន្ដ្រីពេទ្យនាងបានលេបថ្នាំ (ឃ្លូរ៉ូគីន) សំរាប់ព្យាបាលជំងឺគ្រុនចាញ់ច្រើនគ្រាប់
ពេក ។ សពនាងត្រូវបានបញ្ជូនត្រឡប់មក ផ្ទះវិញ ដើម្បីរៀបចំធ្វើបុណ្យទៅតាមប្រពៃ ណី។
យោងតាមសំដីអ្នកជិតខាងបានប្រាប់ សមត្ថកិច្ចនគរបាលស្រុកម៉ាឡៃថា នាងសុភា កាលពីនៅក្រមុំក៏ធ្លាប់លេបថ្នាំធ្វើអត្ដឃាត ចំនួន២លើករួចមកហើយដែរ ឱ្យតែនាងខឹង នឹងបងប្អូនដែលជំទាស់ចិត្ដនាង តែត្រូវបាន បងប្អូន និងអ្នកជិតខាងជួយសង្គ្រោះទាន់ ពេល ។ លើកទី៣នេះ គេជួយពុំទាន់ក៏ស្លាប់ ចោលប្ដីដែលទើបតែរៀបការថ្មីថ្មោងនេះ ទៅ ដោយសារតែការប្រចណ្ឌប្ដីរឿងឱ្យ ទូរស័ព្ទដៃទៅស្រីផ្សេងប្រើ ។ ការស្លាប់បែប នេះគ្មានន័យទាល់តែសោះ ៕
ចែករំលែកព័តមាននេះ