ទីភ្នាក់ងារព័ត៌មានវេណេហ្ស៊ុយអេឡាអេប៊ីអិនរាយការណ៍ថា មានអគ្គីភ័យឆេះនាវាកាហ្គោក្រិចមួយគ្រឿងក្នុងដែនទឹក
វេណេហ្ស៊ុយអេឡាកាលពីថ្ងៃទី២៦ ធ្នូ បណ្ដាលឱ្យមនុស្សស្លាប់៩នាក់ និង៥នាក់ទៀតត្រូវរបួស ។
យោងតាមឧត្ដមនាវីកាឡូស ម៉ាស៊ីម៉ូ អានីអាស៊ី នៃកងកំលាំងជើងទឹកវេណេហ្ស៊ុយអេឡាថា សាកសពមនុស្ស៩នាក់ត្រូវបានរក ឃើញក្នុងនាវាឈ្មោះ “AEGEAN WIND” ដែលឆេះនៅកន្លែងមួយមិនឆ្ងាយប៉ុន្មានពីកោះប្លង់គីលឡា ។ អ្នកស្លាប់៣នាក់ជាជនជាតិក្រិច ហើយ៦នាក់ទៀតជាជនជាតិហ្វីលីពីន ។ អ្នករបួស៥នាក់មានជនជាតិហ្វីលីពីន២នាក់ និងជនជាតិក្រិច៣នាក់ ដែលត្រូវភ្លើងរលាក ។ ពួកអ្នករបួសបញ្ជូនមកមន្ទីរពេទ្យតាមឧទ្ធម្ភាគចក្រ ។ សមាជិកក្រុមនាវិក១០ នាក់រួចផុតពីគ្រោះថ្នាក់ ។ មូលហេតុនៃគ្រោះថ្នាក់នេះនៅពុំទាន់ដឹងនៅឡើយ ។ នាវានេះត្រូវសណ្ដោងទៅកាន់កោះម៉ារហ្គារីតា ជាកន្លែងទេសចរណ៍សំខាន់របស់វេណេហ្ស៊ុយអេឡា ។ នាវាដែលឆេះនេះជួលដោយក្រុមហ៊ុនក្រិចមួយសំរាប់ដឹករ៉ែដែក ដោយវាចាកចេញពីប្រេស៊ីល ហើយបើកសំដៅទៅកាន់រដ្ឋតិចសាស់ ៕
ចែករំលែកព័តមាននេះ