រាជធានីភ្នំពេញ ៖ ក្មេងស្រីអាយុ៨ឆ្នាំម្នាក់បានស្លាប់ ដោយសារលង់ទឹកប្រឡាយ ខណៈនាងជិះកង់ជាមួយបងស្រីអាយុជាង១០ឆ្នាំ ចេញពីរៀនត្រឡប់ទៅផ្ទះ ក្រោមតំណក់ទឹកភ្លៀង ស្រោចស្រពលើដងផ្លូវបណ្តាលឱ្យដីជ្រាយពពុលរអិលភ្លីតចុះ ភ្លីតឡើង ធ្វើឱ្យកង់ដួលខ្ទាតនាងធ្លាក់ចូលទៅក្នុងប្រឡាយទឹកតែម្តង ។ ហេតុការណ៍នេះកើតឡើងកាលពីវេលាម៉ោង៥ល្ងាច ថ្ងៃទី២៣ មីនា ២០១១ នៅភូមិព្រៃសណ្តែក សង្កាត់ចោមចៅ ខណ្ឌដង្កោ ។ ក្មេងស្រីរងគ្រោះឈ្មោះយ៉ន ស្រីពេជ្រ អាយុ៨ឆ្នាំ ជាសិស្សថ្នាក់ទី១ រៀននៅសាលាវិហារព្រះយេស៊ូ ភូមិក្រាំងដូនទៃ ឪពុកឈ្មោះទេព យន់ អាយុ៤៥ឆ្នាំ ម្តាយឈ្មោះសេក គន្ធា អាយុ៤៣ឆ្នាំ។ នាងមានបងប្អូន៦នាក់ ក្នុងនោះនាងជាកូនទី៦ មានទីលំនៅក្នុងភូមិជ្រៃកោង សង្កាត់ចោមចៅ ខណ្ឌដង្កោ រាជធានីភ្នំពេញ ។
តាមប្រភពព័ត៌មានឱ្យដឹងថា ក្មេងស្រីរងគ្រោះ និងបងស្រីរបស់នាងបានជិះកង់ឌុបគ្នាធ្វើដំណើរចេញពីរៀននៅវិហារព្រះយេស៊ូ ដែលមានទីតាំងស្ថិតនៅក្នុងភូមិក្រាំងដូនទៃ ។ បងស្រីជាអ្នកឌុប ឯរូបនាងជិះពីក្រោយលើផ្លូវលំ ទើបតែធ្វើថ្មី ខណៈពេលមេឃធ្លាក់ភ្លៀងធ្វើឱ្យផ្លូវរអិល ទើបដួលកង់ជួបគ្រោះថ្នាក់បែបនោះ។ ក្នុងខណៈនោះមានក្មេង២ទៅ៣នាក់ទៀត ដែលធ្វើដំណើរជាមួយគ្នាបានចុះទៅជួយក្មេងស្រីរងគ្រោះតែជួយមិនបាន ។ រីឯបងស្រីបានរត់ទៅហៅអ្នកស្រុកឱ្យជួយប្អូនរបស់ខ្លួន ហើយជួបបុរសម្នាក់ក៏ពឹងឱ្យជួយ ប៉ុន្តែបុរសនោះកំសាកខ្លាំងណាស់មិនហ៊ានចុះជួយទេ បែរជារត់ទៅហៅអ្នកភូមិឱ្យជួយវិញ ។ ទំរាំតែអ្នកស្រុករត់ទៅដល់ ក្មេងស្រីរងគ្រោះបានលិចទៅក្នុងទឹកបាត់ទៅហើយ ដែលពីដំបូងនាងនៅប្រវេប្រវានៅឡើយ ។ អ្នកស្រុកបាននាំគ្នាចុះរាវរក ហើយប្រទះឃើញក្មេងស្រីរូបនោះស្ថិតនៅបាតប្រឡាយស្លាប់បាត់គួរឱ្យសោកស្តាយបំផុត ៕
ចែករំលែកព័តមាននេះ