មេដឹកនាំលីប៊ី លោកមូអាម៉ា កាដាហ្វី កាលពីថ្ងៃទី១ មីនា បានដាក់ពង្រាយកងទ័ពនៅតាមព្រំដែនខាងលិចរបស់ប្រទេសដោយបន្តកណ្តាប់ដៃដែកជាមួយសហគមន៍អន្តរជាតិដែលគំរាមកំហែងលោក ក៏ប៉ុន្តែនៅរារែកលើលទ្ធភាពនៃការប្រើកំលាំងយោធាមួយ។ រដ្ឋមន្ត្រីការបរទេសអាមេរិក លោកស្រីហ៊ីលឡារី គ្លីនតុន បានព្យាករណ៍ថា ការបះបោរនៅលីប៊ីនឹងអាចទទួលបានលទ្ធិប្រជាធិបតេយ្យដោយសន្តិវិធីមួយ ឬសង្គ្រាមសីុវិលអូសបន្លាយពេលយូរមួយ។
លោកកាដាហ្វីដែលកាន់អំណាចចាប់តាំងពី៤១ឆ្នាំមកហើយហាក់ដូចជាពុំព្រមចុះញ៉មចំពោះរាល់វិធានការរបស់ពួកប្រឆាំង និងរបស់សហគមន៍អន្តរជាតិ។ កូនប្រុសរបស់លោកដែលក៏ជាអ្នកនាំពាក្យលោកសៃអីុហ្វ អាល់អីុស្លាម អះអាងជាថ្មីថា វរសេនីយ៍ឯកអាយុ៦៨ឆ្នាំរូបនេះនឹងពុំភៀសខ្លួនចេញ ឬលាលែងចេញពីតំណែងឡើយ។ តាមទូរទស្សន៍អង់គ្លេស SKY កូនប្រុសរបស់លោកកាដាហ្វីរូបនេះនិយាយថា ការប្រើកំលាំងប្រឆាំងលីប៊ីពុំអាចទទួលយកបានឡើយពីព្រោះពុំមានហេតុផលណាមួយទេ ក៏ប៉ុន្តែបើគេចង់ប្រើកំលាំងយើងត្រៀមទប់ទល់យើងពុំខ្លាចឡើយ។
១២ម៉ោងក្រោយការប្រកាសរបស់មន្ទីរប៉ង់តាហ្គោនពីការដាក់ពង្រាយកងទ័ពអាមេរិកក្បែរប្រទេសលីប៊ី កងទ័ពលីប៊ីបានបង្ហាញខ្លួននៅដឺហ៊ីបា ជាប៉ុស្តិ៍ព្រំដែនជាមួយទុយនីសីុ។ ម្យ៉ាងទៀតកងទ័ពលីប៊ីបានបន្ថែមកំលាំងនៅក្រុងណាលូតចម្ងាយ៦០គីឡូម៉ែត្រពីទីក្រុងទ្រីប៉ូលីដើម្បីកុំឱ្យទីក្រុងនោះធ្លាក់ក្នុងកណ្តាប់ដៃពួកបះបោរដែលលើកគ្នាមកកាន់ភាគខាងលិចប្រទេស បន្ទាប់ពីដណ្តើមត្រួតត្រាភាគខាងកើតប្រទេសមក។
ពួកអ្នកឯកទេសខាងលីប៊ីយល់ថា លោកកាដាហ្វីពុំប៉ុនប៉ងធ្វើការវាយលុកខាងយោធានាទឹកចុងក្រោយឡើយ ដោយចាត់ទុកការគំរាមកំហែងរបស់លោកថា គ្រាន់ជាល្បិចកលនយោបាយមួយប៉ុណ្ណោះ។
រដ្ឋមន្ត្រីការបរទេសបារាំងថ្មី លោក ALAIN JUPPÉ អះអាងយ៉ាងច្បាស់ថា នឹងពុំមានអន្តរាគមន៍យោធាណាមួយចូលលីប៊ីដោយគ្មានអាណត្តិរបស់ក្រុមប្រឹក្សាសន្តិសុខអ.ស.បឡើយ៕
ចែករំលែកព័តមាននេះ